Saloman tə Ɓatliya ka Hər Mbwa'ala
5
1 Nda Hiram təl Taya tə ngatə ənda dzəviya tə nji Saloman ka təl ka cha dləu cha ada nyi Dauda, ngə cha sə nji tə dəbar nyi nda yi usa nyi, aka bazhibazhi nda na Dauda ku dəhə ngya nyi. 2 Ngə Saloman tə sətə nyi kurakə nə Hiram bəra,3 <<A zəndətə ka aka pah inda tə wendə ada ɗa Dauda mada təwabari, a da cha nau hərtə mbwa'alə ka tləmər Tlakəu, Hyel nyi wa, kəl nda Tlakə tə fəu njir dawa nyi da kiɗa hya cha. 4 Kəl ja, sakana, Tlakə na'a tə ɓəlsar mada təwabari, a tsə'u njir dawa ndara təmachi da wa. 5 Aka ənga, yo gwa'a ya hərtə mbwa'ala ka tləmər Tlakəu, Hyel ɗa, wi nda Tlakə tə nar nyi nə ada ɗa Dauda, bəra, <Zər nghə nda ka fəu ku dzəga təlkur tə məngya ngha kwa hərtə mbwa'ala ka tləm ɗa.>
6 Aka ənga, ka ɓwanya nja gəgatsə ɗa wur seda nə hə'i Lebanon. Njir mər tlər ɗa ana njir mər tlər ngha kwa daɓtə chi, naya tsə'u yo kinda nghə wazəba njir mər tlər ngha wi nda ka na. Aka a zəndətə ka a ndər nau gəga udzəm da ku huɗa nji ɗa wi njir Sidon wa.>>
7 Nda Hiram tə ngatə mafakə Saloman, cha ngatə məsəɗakə gagaɗə ga na, <<Fal ngya tə nə Tlakə ənya, aka cha nə nyi zər nda na dəma nə Dauda ka cha səm təlkur təkəra jul nji ɗang ina.>>
8 Aka ənga Hiram tə sətə nyi ɓwanya nə Saloman bəra,
<<A ngatə tə ya mafakə nda ka sətə ɗa, ya yo mər dəhə sə nda ko i təkəra udzəm seda ana nə fir. 9 Mavi'i ɗa kwa səya nə hya'atə vu Lebanon səya nya fa'a, yo na nda mbatəmbatə tsa'aka ma'i tə ɓiti, səya tsa'a tə mbwa nda ka na nda. A tangnda nji ɗa kwa pəlnda, nji nghə tsə'u kwa fa'atə hya'atə tangnda. Nakə tsə'u ko kibiya kwambiyakur ngə təwa shili na sərsum ka njir ki ɗa.>>
10 Təwa ənga Hiram tə biyama na nə nyi udzəm seda ana fir nə Saloman wi sə nda cho gwa'a, 11 Ngə Saloman tə nə nyi alkama gwashala 20,000 nə Hiram aka sərsum nə njir ki nyi, ana mal zaitul tsa'amunyi shikmal 20,000. Saloman tə biyama na mər ənga ka fa ka fa. 12 Tlakə tə nə nyi dəma nə Saloman tang wi nda cha mərtə nyi alkawal. Ngya mənakə da ku pama ka Hiram ana Saloman, ya ngə kya'akura nda tə mbandəra.
13 Ngə təl Saloman tə chiu nji 30,000 ku dəhə hə'i Isra'ila ku tlər tuku. 14 Cha təkəbiya nda ka dzuku makərəu, cho maka sə nda gwa Lebanon, nji 10,000 kwa gwa mər hya zhang, ba'a nda ɓəl shili ku ki nda shili mər hya mətləu, alenya nji 10,000 tsə'u kwa təra gwa. Ngə cha fiya Adoniram ka gau njir mər tlər tuku. 15 Ətsə'u, njir dzəɗə hangu 80,000 da tsa Saloman, ana njir fa'a 70,000. 16 Ngə Saloman tə fiya nji 3,300 ka njirawawa'a inda kwa cha ana ndzam tlər kənda. 17 A təwa tsaubar təl, nda dzəɗəbiya hangu wawa'a inda na dunama, ka ghəya hya hər mbwa'alə nda. 18 Ngə njir hər nə Hiram ana nə Saloman ana njir Gebal tə ɓatliya hangu ana udzəm ka hər mbwa'alə nda.