Njirawawa'a nə Patla Saloman
Azariya zər Zadok ngə pərist,
3 Elihoref ana Ahija, nguli shili Shisha ingə njir tsəfa,
Jehoshafat zər Ahilud ngə ndər tsəf labar;
4 Benaya zər Jehoyada gau ləvaəva;
Zadok ana Abiyatar ingə pərist;
5 Azariya zər Natan ngə dəgal təkəra njirawawa'a mətla i'i;
Zabud zər Natan tsə'u pərist cha ya ndər dəkə dəma nə təl.
6 Abishar nacha ngə dəgal təkəra patla;
Adoniram zər Abda ngə gau təkəra tlər tuku.
7 Saloman tsə'u tə fiya nji kwabəmətlə ka njirawawa'a mətla i'i nə Isra'ila. Nanda ingə kwa shili na sərsum nə təl ana njir ki nyi. Kala ndə kwa shili na sərsum nə hya zhang ku kala fa. 8 Ja'inə tləmən nda:
Benhur ngə gau təkəra mələm dəgəldəgəl nə Ifərem;
9 Bendeka, ngə gau vu Mikaz, Sha'albim ngə gau vu Bet Shemesh ana Elon a vu Bet hanan;
10 Benhesed ngə gau vu Arubot, Soko ana dəhə hə'i Hefa.
11 Ben Abinadab nda hə Tafat kwar Saloman ngə gau vu Nafot Dor;
12 Ba'ana zər Ahilud ngə gau vu Ta'anak ana Magido, ana ku dəhə Bet Shan ləhə dza Zaretan səya mar Jezrel, fwatə vu Bet Shan tsa'a vu Abel Mehola bətə biya Jokmim;
13 Bengeba ngə gau vu Ramot Giliyad tangnda Jair zər Manasa na ngya tə vu Gileyad, əngə ma'a mətla Argob a vu Bashan ana mələm wawa'a kwakumnyi inda ku ɓangtili ana sər haɗə nya mələm nə ndzəa;
14 Ahinadab zər Iddo ngə gau vu Mahanayim;
15 Ahimaz nda hə Basemat kwar Saloman ka mala nyi ngə gau vu Naftali;
16 Ba'ana zər Hushai ngə gau vu Asha ana Alot;
17 Jehoshafat zər Paruwa ngə gau vu Isaka;
18 Shimei zər Ela ngə gau vu Banyami;
19 Geba zər Uri ngə gau vu Giliyad, hə'i Sihon təl njir Amori ana mələm Og təl Bashan. Nacha ngə gau nə mətla inga.
Dəma Saloman ana Gəna nyi
20 Njir Yahuda ana Isra'ila ɗang gagaɗa, wi mishishi'ua nya fa'a, ndo səma, ndo sa, ndo mər hirgyaɗi wa'atanyi. 21 Saloman tsə'u tə səm təlkur təkəra dəhə təlkur fwatə nya Dəl tsa'a tə hə'i njir Filisti, bətə gwa tə gəla nda ka Masar. Hə'i inga kwa shili na tsachi kənda nə Saloman, nda ɗa ka sər cha cha tsa'a tə ɓəlkər pya cha.
22 Sərsum ki Saloman nə pəchi zhang nacha ngə, upə zhizhi gwa shala makərkumnyi, ana upə sə uhiuhi gwa shala kwakumnyi, 23 tla ngətləngətlə kuma, ana tla ɓəla ku sar mətləkumnyi, ana kətəng 100, a da nja jiga kanyaɗəu, jigəl, ka təga wa. 24 Saloman tə səm təlkur təkəra hə'i nda təwa təɗərpəchi nə Dəl, fwatə vu Tifsa tsa'a vu Gaza, ya piyarɗufə da ku pama nda ka hə'i inda təwul kənda mada təwabari. 25 Njir Yahuda ana Isra'ila tə ngya ɓəlaɓəlanyi ku bəjir Saloman, fwatə tə hə'i Dan tsa'a vu Biyersheba. Kala ndə na ki nyi, fa anap nyi ana fa kanda nyi.
26 Dləma taku 40,000 da tsa Saloman aka taku i'i nə charkaina nyi, ana njir dlə taku 12,000.
27 Kala ndə zhang ku huɗa gau mətla inda, hya nyi da nda cho shili na sərsum nə təl Saloman, aka ki nyi ana nji inda kwa səm sərsum kə'i təl, kala ndə da kwa i nja tar madami wa. 28 Ətsə'u ndo shili na uhi nda njo nga bale ana dzangar aka taku inda kwa təɗə charkaina ana alenya taku tangnda nja piya nda ti.
Dəma Saloman
29 Hyel tə nə nyi dəma ana ndzuɗwakər zəndi, ana ngabiya nə Saloman nda a sər məməlandə nə da wa. 30 Dəma Saloman ndiya tə dəma nə dəhə njir zədərpəchi, ndara nə njir Masar. 31 A ndiya tə cha madawa na dəma, dəhə ka ma'a Etan nyandəla Ezra, ana Heman, Kalkol ana Darda, zər Mahol. Tə ɗa tləm nyi tə tiwi tə dəhə hə'i inda tə ɓandə nda. 32 Cha pə ɓwanya karapəu 3,000, ana miya 1,005. 33 Cha ɓwanya təkəra wua ana sə tsətsə i'i, fwatə tə wur seda nə Lebanon tsa'a tə izop nda kwa həa, kwa ndəɗiya kəra ɓangtili. Ətsə'u cha ɓwanya təkəra sərshishi, eakəu, sər təɗə na ta, ana kalfi. 34 Ka təl ka təl nə dunəya mada təwabari, inda tə ngatə dəma Saloman, tə sə nji nda shili səhimi da cha.