3
1 Saloman tə daɓtəkər na Fir'auna təl Masar təwa həbiya kwa nyi. Ngə cha shili na cha ku mələm Dauda kəl nda cha wurandə hər patla nyi ana Mbwa'alə Tlakəu, ana ɓangtili nda tə ɓandə Urshalima. 2 Aku bəji nda a nja taa hərtə mbwa'alə ka tləmər Tlakə wa, aka ənga nji kwa hatəmachi tə dzəgana inda tə mbwar həsəli pampaməu. 3 Saloman tə char nyi nyida nə Tlakəu təwa ma'i tsa'atsa'a wi nə ada nyi Dauda, kəl ja, cha hatəmachi tə dzəgana inda tə mbwar həsəli pampaməu.4 Ngə təl tə təra yi Gibiyon aka hinda ngə mbwar hatəmachi nda 'ualəu, ka cha yi hatəmachi i'i. Saloman handa təmachi dəbu təwa nginda. 5 Ngə Tlakə tə chabiya nyi dzə nə Saloman ku shi'uni əvu'i vu Gibiyon, ngə Hyel tə nar nyi, <<Gədi dəhə sənda ko i ya nə ngha.>>
6 Ngə Saloman tə wuma, <<Ka char nyi mənakəkur dəgal nə ada ɗa Dauda nda mava ngha, aka cha nəu nghə na jiri, tsa'atsa'akur ana jiri ku ɗufwa cha. Nakə tsə'u ka biyama na char nyi ngəna mənakəkur, ka nə nyi zər ka cha ngya ku dzəga təlkur tə pəchi nə ənya na.
7 <<Sakan ja Hyel Tlakə ɗa, a fiya tə kə mava ngha ka təl tə məngya ada ɗa Dauda. Kəl ja, naya zər ya, a da yo zəndə ənda njo ma'i na təlkur wa. 8 Janə mava ngha ku pama nji nghə nda ka tabiya, nji ɗang nda a da njo nau jigabiya wa. 9 Aka ənga, nə nyi ɗufə nə ngabiya nə mava ngha, ənda cho ɗana nau nəu na nji nghə ku jiri, ga cha nau təkəbiya sə mənakə ana sə ɗimi. Aka wa kwa nau nəu na nji nghə inə ɗang ina?>>
10 Tlakə tə ngatə məsəɗakəkur na sə nda Saloman tə gədi. 11 Ngə Hyel tə nar nyi, <<Mangə ka gədi dəma, a da ka gədi pya ka təɗardzə ndara gəna nə kərnghə wa, ya a da ka gədi ka njir dawa nghə kuɗə wa, kəl nda aka ga ka nau təkəbiya sə mənakəu ana sə ɗimi ku təlkur ngha, 12 yo nə nghə sə ngə ka gədi nga. Yo nə nghə dəma ana ɗufə nə ngabiya nda a da nja taa uya vanya ndə wi nakə wa, ya vanya ndə da kwa ɗa wi nakə wa. 13 Ətsə'u, yo nə nghə sə nda a da ka gədi wa. Dəhə ngya ngha, ko ɗa na gəna ana səli ndiya matsa kala təl ku bəji ngha. 14 Ətsə'u, maka nəu nya ya ga ɓəlatə gadlagadla ɗa ana tsaubar ɗa, wi nda ada nghə Dauda tə məra, yo təɗar pya ka.>> 15 Kəl ngə Saloman tə sha ga ngabiya ənda shi'uni nda.
Cha ɓəl shili Urshalima, cha shili ta'i biyamar Gwarara Mbandər Tlakəu, ga handa təmachi nə nginda ana nə daɓkər. Ngə cha ɓatliya nyi ladər nə njirawawa'a nyi.
Nəuma Dza'u nda Saloman tə Tlanda
16 Vanya pəchi zawar mətlə tə shili huɗə təl Saloman. 17 Ngə zhang ku pama nda tə na, <<Tlakə ɗa, naea na mala na ku ki zhang ea. Ya yah zərdizəu, ya ku bəji nda tangnda cha. 18 Nda ya yah zər ɗa, a hir hanyi makər ngə mala nə tə yah ma'a nacha. Naea səkəea, a ndə da ku ki wa, kəl naea səkəea.
19 <<Əvu'i ngə mala na piyata nyi tə zər nyi ngə a tah. 20 Ngə cha hya'atə adala vu'i ga hənda zər ɗa dzə ɗa ku bəji nda mava nghə ku hanyi. Cha yi pinda dzə nyi ga hətə zər tətə nda ga shili pinda dzə ɗa. 21 Nda vu'i tə wura, ya hya'tə ka yo nə nyi 'ua nə zər ɗa, ma ya la'a a təti! Kəl ja, nda ya ndzamtə mənakə mbudla, kəl ya la'a a da zər nda ya yah nda nda wa.>>
22 Ngə vanya mala nda na, <<A da wa! Zər ngə na pi nga, na'a nga, tətə nyi nga, nə nghə nga.>>
Kəl ja, mala tangərma nda na, <<A da wa! tətə nyi ngə nə nghə nga, ngə na pi na'a nga.>> Əngə ndo kəpal mar təl.
23 Ngə təl tə na, <<Nənnə kwa na <Zər ɗa ngə ngə na pi nga, nə nghə ngə tətə nyi nga,> nənnə kwa na, <A da wa! Zər nghə ngə tətə nyi nga, na'a ngə ngə na pi nga.> >>
24 Ngə təl tə na, <<Anda ma na katsakər.>> Ngə nda shili na nyi katsakər nə təl. 25 Ngə cha na bəra, <<Təkəu zər ngə na pi ngə tatsəməta, nja nə nyi manyi nə kala mala.>>
26 Kəl təhuɗə tə nyandə ɗufwa təkəɗər amanya zər nda na pi nda, cha na, <<Maki tlakə ɗa, ngwa ka tsa zər ngə wa! Ngyanyi ma ni!>>
Kəl ja, vanya mala nda na, <<Ndə da njo nə nyi ku pama ea wa, təkəu nji tatsəməta!>>
27 Kəl ngə təl tə na, <<Nə nyi ma zər ngə na pi ngə nə mala tangərma nda. Ngwa hya tsa nyi wa, nacha ngə amanya zər nga.>>
28 Nda dəhə njir Isra'ila tə ngatə chul tla nəuma təl nda, cha ɗa na səli gagaɗə tə lya dəhə nji, aka a zəndə tə nda ənda Hyel nə nyi tə dəma nda cho ɓatliya pama nji ku jiri.