Batəbatər Tsaubar Dauda nə Saloman
2
1 Nda bəjir tər Dauda tə ɗa ləhəu, ngə cha nga zər nyi Saloman ga nə nyi tsaubar.2 Cha na, <<Bəjir tə ɗa ɗatə ləhəu, aka ənga ka ɗa na dunama ka char ənda sal ka, 3 ka ɓəlatə sə inda Tlakə kwa gwa'a ka ɓəlati, ka ma'i ku laku nyi, ka nəubiya ɓwanya nyi ana tsaubar nyi ana gadlagadla nyi, ana sə inda cho gwa'a ka məra, wi nda cha tsəfətsəfənyi ku gadlagadla Musa, tsa'aka ko biyama ku dəhə sə inda ko məra, ana dəhə banda ko ma'i ti. 4 Tsa'aka Tlakə kwa nyabiya alkawal nyi nda cha mər na'a bəra, <Ma nyandəla ka tə ɓəlatə ngya kənda, ga ɗa na jiri ku ma'i kənda biyama ɗa ana dəhə ɗufwa nda ana pya nda, a da ko tar ndə nda kwa ngya ku dzəga təlkur Isra'ila ku huɗa nyandəla kə wa.>
5 <<Nakə kərnghə zəndə tə sə nda Joab zər Zeruya tə mərtə ɗa ana sə nda cha mərtə nyi nə Abner zər Ner ana Amasa zər Jetar, gau ləvaləva Isra'ila mətlə inda. Cha kuɗənda nda, cha pənda mashi ku bəjir piyarɗufəu wi ku pah, cha səwandə gyarakən nyi ana ɓiɓi nyi na mashi. 6 Ka mərtə nyi sənda məlməl na dəma ngha, kəl nda ngwa ka ngya nyi cha hala, cha tah ku piyarɗufə wa.
7 <<Kəl ja, ka char nyi mənakəkur nə nguli shili Barzilai ndər Gileyad, ka ngyanda nda ɗa zhang ku huɗa nji inda kwa səm sərsum kə'i ka. Aka nda vala ɗa ku bəji nda ya hwi tsa zamə nghə Absalom nda.
8 <<Ətsəu, ka ɗənghatə Shimai zər Gera, nyandəla Banyami hya'atə vu Bahurim, ndə nda ngəlnda ɗa ɗimiɗimi pəshinda ya yi Mahanayim nda. Nda cha səya ka eo ɓə vu Urdən, ya səmnda nyi fəla na tləmər Tlakə bəra, <A da yo tsəya nghə na katsakər wa.> 9 Kəl ja, tuku ka tlanda nyi nəuma. Ndər dəma ka, a zəndə tə kə sə nda ko kina mərtə nyi. Tuku ka la'a ənda tsəya nyi tə nji.>>
10 Kəl ngə Dauda tə tah, ngə nja haɗiya nyi ku mələm Dauda. 11 Dauda tə səm təlkur təkəra njir Isra'ila fa fwaɗəkumnyi, fa məɗəfə vu Hebron, fa makərkumnyi parnya makər vu Urshalima. 12 Ngə Saloman tə go dzəga təlkur ada nyi Dauda, ya təlkur nyi tə kukuyadzə gagaɗa.
Tər Adonija
13 Ngə Adonija zər Hagit tə təra yi da Batsheba amanya Saloman. Ngə Batsheba jau nyi, <<A shili tə kə yiying ma?>> Ngə Adonija tə wuma, <<Ah, shili tə ya yiyinghəu.>> 14 Ngə Adonija ɓəla na, <<Vanya sə da yo i ya nar ngha.>>
Ngə Batsheba tə na, <<Mi səsənya?>>
15 Ngə Adonija tə na, <<Wi nda ka zəndə ənda na'a ngə təlkur, ya dəhə njir Isra'ila har tə ənga. Kəl ja, ngə səsənyi ba'a bəlatədza, ngə zamə ɗa tə ɗa ka təl, aka sə nda Tlakə tə ɓatliya nga. 16 Sakan ja, sə zhang da yo gədi tsa ka. Ngwa katə ɗa wa.>>
Ngə Batsheba tə wum ga na, <<Dəkar ɗa sə nda ko i.>>
17 Ngə Adonija tə na, <<Maki, ɓwanya nə təl Saloman, a zəndə tə ya a da cho ngyar səhimi da kə wa, nar nyi cha na'a Abishag kwa Shunam nga ka mala ɗa.>> 18 Ngə Batsheba tə wuma, <<Yau, yo ɓwanya nə təl təkəra ka.>>
19 Nda Batsheba yada təl Saloman ka cho ɓwanya nə nyi təkəra Adonija, ngə təl tə hya'atə ka cho usar ama nyi, ngə cha uzhi nə nyi ga ɓəla səya ngyata nyi ku dzəga təlkur nyi. Ngə cha sə nja shili na nyi hwakə nə ama nyi, ngə cha ngyata nyi təwa chisəma cha.
20 Ngə ama nyi tə na, <<Sə da kushiu nda yo i ya gədi tsa ka, ngwa katə ɗa wa.>> Ngə təl tə wuma, <<Ɓwanya ama, a da yo katə nghə wa.>>
21 Ngə cha na, <<Ngyar Abishag kwa Shunam nga cha hə zamə nghə Adonija ka sal nyi.>>
22 Ngə təl Saloman tə wum ga na, <<Mya gwa'atə ko gədi ya ngya nyi na Abishag kwa Shunam nə Adonija? Əngə tanyi ko da gədi tsə'u ya ngya nyi na təlkur mana zamə ɗa ngə nda dəgal matsa ya, ya Abiyatar pərist ana Joab zər Zeruya tsəu, a biyahi nyi nda!>>
23 Ngə təl Saloman tə səmnda fəla na tləmər Tlakə ga na, <<Ga Hyella tsəya ɗa ma a da ya mərtə Adonija tə kinda gədi nə cha gədi nə na pya cha wa! 24 Tlakə kukuya ɗa tə ku dzəga təlkur ada ɗa Dauda, ətsə'u, a nyabiya tə cha alkawal nyi ga na'a təlkur ana nyandəla ya. Səmnda tə ya fəla na tləmər Tlakə nda na pi, Adonija kwa tə ənya na!>> 25 Kəl ngə təl Saloman tə sə Benaya zər Jehoyada, ngə cha tsəya Adonija.
26 Ngə təl tə nar nyi nə Abiyatar pərist bəra, <<Təra ya tə hə'i nghə vu Anatot. A ki tə ka tah, kəl ja, a da yo tsəya nghə sakan wa, aka ka hə gwarara Tlakə Ndər Gyalkur Dəhə ku bəji nda kə tsa'a na ada ɗa Dauda, ga sa ɓwaɓwatə tsa'a na cha.>> 27 Aka ənga, Saloman tə həbiya Abiyatar ku Pəristkur nə Tlakəu, ana ənga cha nyabiya ɓwanya Tlakə nda cha pə vu Shilo təkəra ki Eli nda.
28 Nda labar tə həya Joab, nda tə chindzə nyi hi nə Adonija, madangə a da cha hir Absalom wa, cha hwita nyi yo madləɓa Tlakə ga yi gəziya tələma dzəgana. 29 Ngə nja nar nyi nə Saloman ənda Joab hwita nyi tə yo madləɓa Tlakəu, ya dza dzəgana. Kəl ngə Saloman tə nar nyi nə Benaya zər Jehoyada bəra, <<Ma'i, ka yi tsəya nyi!>>
30 Aka ənga Benaya tə gwa ku madləɓa Tlakə ga gwa nar nyi nə Joab, <<Təl tə na bəra, <Zəbiya!> >>
Kəl ja, cha wum ga na, <<A'a, tangnə yo tah.
Ngə Benaya tə yi nar nyi nə təl bəra, <<Janə sə nda Joab tə wum nə na'a.>>
31 Ngə təl tə tsau nyi bar nə Benaya bəra, <<Mər wi sə nda cha na. Tsəya nyi ka haɗiya nyi, təwa ənga ko hənda bikər pənda mashi nji kəla bikə nda Joab tə pənda. 32 Tlakə kwa kibiya bikər pənda mashi nda cha pənda, Aka cha pah nji mətlə inda ndiya nyi mənakəkur, Abner zər Ner gau ləvaləva njir Isra'ila, ana Amasa zər Jetar gau ləvaləva njir Yahuda, cha kuɗənda nda na katsakər a da na zəndəkur ada ɗa Dauda wa. 33 Aka ənga, bikər pənda mashi kənda kwa ngya təkəra Joab ana nyandəla cha ba'anawa. Kəl ja, papa'akur Tlakə kwa ngya təkəra Dauda ana nyandəla cha, ana ki nyi ana dzəga təlkur nyi ba'anawa.>>
34 Aka ənga Benaya zər Jehoyada tə gwa tsəya Joab ku madləɓa Tlakə nda, ngə nja haɗiya nyi ku ki nyi nda tə dadil takəu. 35 Ngə təl tə fəkər Benaya zər Jehoyada təkəra ləvaləva a təvira Joab, ga fiya Zadok ka Pərist a təvira Abiyatar.
36 Ngə təl tə sə nja nga Shimai, ngə cha nar nyi, <<Hərtə nyi ki nə kərnghə vu Urshalima ka ngya hinda, kəl ja, ngwa ka ma'i kya tə vanyi mbwa wa. 37 Pəshi nda ka ngyar mbwa ngə ga dləgəlbiya Dakə Kidron, ka zəndə təkəɗəu, ko tah, ya bikər pənda mashi nghə kwa ɗa təkəra kərngha.>>
38 Ngə Shimai tə wuma, <<Sə ngə ka na ngə mənakəu. Mava nghə kwa mər wi ngə tlakə ɗa təl tə na nga.>> Ngə shimai tə ngya vu Urshalima nə bəji 'ualəu.
39 Kəl ja, ahir fa makərəu, mətlə ku huɗa mavi'i Shimai tə hwita nda yada Akish zər Ma'aka, təl Gat, ngə nja nar nyi nə Shimai bəra, <<Wula mavi'i nghə vu Gat.>> 40 Ana ənga Shimai tə sətə lifaru tə ya kwara nyi ga təra yada Akish vu Gat, ka ki gwa'a mavi'i nyi. Ənga cha təra ga ki shili na mavi'i nyi inda hya'atə vu Gat.
41 Nda nja nar nyi nə Saloman ənda Shimai ngyar tə Urshalima ga yi Gat ga ɓəl shili, 42 ngə təl tə nga Shimai ga shili nar nyi, <<A da ka səmnda ɗa fəla na tləmər Tlakə ndan pəshir ya tsau nghə bar ənda, <Pəshinda ka ngyar mbwa ngə ga ma'i kya tə vanya mbwa ko tə ma?> Pəshinda ka nar ɗa <Sə ngə ka pə ngə mənakəu. Yo mər wi nga.> 43 Ya mya gwa'atə a da ka nyabiya səmfəla nghə nə Tlakə ga nəubiya tsaubar nda ya nə nghə wa?>>
44 Ngə təl tə nar nyi nə Shimai tsə'u, <<A zəndə tə kə dəhə ɗimkur nda ka mər nə ada ɗa Dauda. Sakana Tlakə kwa shakə nghə ɗimkur ngha. 45 Kəl ja, njo səkə nyi papa'akur nə təl Saloman, ya dzəga təlkur Dauda kwa kukuyadzə ba'anawa huɗə Tlakəu.>>
46 Ngə təl tə tsau nyi bar nə Benaya zər Jehoyada, ngə cha təra ga ki tsəya Shimai.
Saka ngə ja, təlkur tə dzugwa ɗa ngyangya nyi ku cha Saloman.