22
1 Ngə Dauda tə na, <<Tangnə ngə ki Hyel Tlakə kwa ki na ɗa, ətsəu dzəgana hatəmachi aka Isra'ila.>>Nja Ɓatləya ka Hər Mbwa'ala
2 Ngə Dauda tə na nja tsəmiya nyi dəhə nji shilshili inda na ngya Isra'ila, ya aku pama nda cha ɗəmtsə njir tla hangu ka nda ɓatləya hangu inda njo hər ki Hyel ni. 3 Cha sjili na lyang 'ualə ka nja ɓatlə gədanya ni ka nyavi ana alenya fitins, ana bronz nda pa'a njo nau dəkəti. 4 Ətsəu cha shili na wur ceda nda pa'a njo nau jigabiya, aka njir Sidon ana Taya tə shili ni 'ualə anə Dauda.
5 Ngə Dauda tə na, <<Tsəu tanyi zər ɗa Saloman kushiu ya a səda cho zəndə wa, ya ki nda njo kina hər nə Tlakə kwa ki na səli gagaɗa, ana degalkur abiyamar dəhə jul nji. Aka ənga yo ɓatləya akari.>> Aka ənga Dauda tə ɓatləya gagaɗa təvi bijir tə nyi.
6 Ngə cha nga Saloman zər nyi ga tsau nyi bar, cha hərtə nyi ki anə Tlakəu, Hyel Isra'ila. 7 Dauda tə nar nyi Saloman, <<Zər ɗa, a hətə təya ku ɗufwa ya ka ya hərtə nyi ki nə tləmər Hyel Tlakə ɗa. 8 Kəl ja, ɓwanya Tlakə tə shili da ya bəra, <'Ual ka pah, ya a kuɗənda təkə nji ɗanghəu. A da ko hər ki anə tləmə ɗa wa, aka ka pənda mashi 'ual tə ly aya. 9 kəl ja, ko uya zər nda kwa ɗa ka ndər piyarɗəfu ana ɓəlsar, ya yo nə nyi ɓəlsar tsa dəhə njir dawa nyi mada təwa bari. Njo nga nyi Saloman, ya yo nənyi piyarɗəfu nə Isra'ila ana ɓəlsar aku bijir təlkur nyi. 10 Nacha ngə ndə nda kwa hərəya nyi ki anə tləm ɗa. Cha ɗa ka zər ɗa, naya tsəu yo ɗa ka ada nyi. Ya yo mərtə təlkur ku Isra'ila ba'anawa.>
11 <<Sakan ja zər ɗa, Tlakə cha ngya tsa'a na ka, ka uya biyama ana ka hərəya ki Hyel Tlakə ngha, tang wi nda cha na kwa ɗa. 12 Ga Tlakə nənghə zəndi ana ngabiya ma cha nə nghə təlkur təkəra Isra'ila, ga ka ɓəlatə gadlagadla Hyel Tlakə ngha. 13 Ana ənga ko uya biyama ma ka ɓəlatə gadlagadla ana tsaubar nda Tlakə tə nə nyi nə Musa aka Isra'ila. Ka ɗa na dunama ana tsəɗufu. Ngwa ka da ləvər ndara ɗufwa kə tsəyadzə wa.
14 <<Aku ɓwaɓwatə ya tsəmtə bɨjingha ton 3,400 ana azurfa kwa ɗa ton 34,000 aka hər ki Tlakəu. Ətsəu ndzəu da nda a da njo nau jigabiya wa, ana wua, ba'a hangu, ko nau tskəngəri təkəri. 15 Njir mər tlər da tsakə ɗanghəu, njir hangu, njir həra, njir tla wua, ba'a nji'inda skild aku tlər pampaməu, 16 tlə bəjingha ana azurfa, ndza ana lyang a da njo nau jigabiya nda wa. Sakan ja, ghəya tləra, Tlakə tsəu kwa nəu na ka.>>
17 Ngə Dauda tə tsau nyi bar nə dəhə njirawawa'a Isra'ila ənda nda vala zər nyi Saloman. 18 Cha nar nda, <<A Hyel Tlakən hi da tsa'a na hi ma? A da cha nəhi ɓəlsar ku kala mbwa ma? Aka cha na'a dəhƴ nji'inda na ngya tə hə'i ku cha ya, ya hə'i ku cha Tlakəu ana nji nyi. 19 Sakan ja, hya fiya ɗufwa hi ana pya hi ka gwa'a Hyel Tlakən hi. Hya ghəya hər ki Hyel Tlakəu, ka hya shili na gwarara mbandər Tlakə ana alenya sə karti nə Hel shili ku mbwa'alə nda njo hərtə aka tlər Tlakəu.>>