Dauda tə Jigabiya ləvaləva Nyi
21
1 Shantan tə mbadzə təkəra Isra'ila ga chiu ku ɗufwa Dauda ənda cha jigabiya njir Isra'ila. 2 Ngə Dauda tə nar nyi Joab ana gau ka dzuk ka dzəku, <<Ma'i ma hya ki jigabiya ləvaləva, fwatə vu Biyarsheba tsa'a nə Dan. Hya shili par ɗa, ga ya zəndə nda aman ɗanghəkura nda.>>3 Kəl ja, Joab tə ɓəlakə nyi, <<Mada Tlakə tə zhabiya ɗanghkura kura ləvaləva nyi zhanka gharəu ya, a da nə tlakə təl ngə nda ma? Mya gwa'atə tlakə ɗa kwa gwa'a mər ngə na səa? Kami cho təɗəkə nyi təmachi nə Isra'ila.>>
4 Kəl ja, sənda tə na nda ta'i wi nda, ngə Joab tə təra gu dəhə Isra'ila ga ɓəla shili Urshalima. 5 Joab tə shili lamba njir pah nə Dauda. Aku dəhə Isra'ila nji'i kwa nau pah na katsakər, 1,100,000 dəhə ka 470,000 inda vu Yahuda.
6 Kəl ja, a Joab da jiga Levi ana Banyami wa, tang wi nda təl tə tsau nyi bar. 7 A Hyel da ngatə məsəɗakə na sənghə wa ngə cha nənyi ɓwaɓwatə nə njir Isra'ila.
8 Ngə Dauda tə nar nyi nə Hyel, <<A mər təya səpəla'a, ana səngə ya mər nga. Sakan ja, yo gədi ngha, hənda səpəla'a mava ngha. Kəkənkur ngə mər ya.>>
9 Ngə Tlakə tə nar nyi Gad ndər ndzam sə nə Dauda, 10 <<Ma'i ka yi nar nyi nə Dauda, <Jan sənda Tlakə tə na, Jan ya fiya nghə sə makərəu, ka tabiya zhang ku huɗa nda ka ya mərtə ngha.> >>
11 Ngə Gad tə təra ya da Dauda ga nar nyi, <<Jan sənda Tlaka na, <Ka tabiya sənda ko i, 12 fa makə nə huɓa, hya makər njir dawa nghə kwa kura ngha ana katsakər kər ngha, ndara hanyi makər nda Tlakə kwa shili təmachi tə hə'i. Sakan ja, yo i ka par ɗa sənda yo yi nar nyi nə ndər sə ɗa.>>
13 Ngə Dauda tə nar nyi Ggad, <<Ku ɓwaɓwatə ya gagaɗa. Bəliya ya gu cha Tlakə aka təhəɗə nyi gwang tanyi, kəl ja, ngwa ka da ngya ɗa ya gu cha ndə wa.>>
14 Ngə Tlakə tə sətə təmachi təkəra Isra'ila, ya nji məɗəkuməkunyi tə kuɗa. 15 Ya ngə Hyel tə sə chama kacha wazənda mələm Urshalima. Nda chama kwa mər ənga, ngə Tlakə tə ngatə təhuɗə nji ga təɗənda huɗətla nyi. Cha nar nyi nə chama nda, <<A njiti! :bəlandə cha ka!>> Aku biji nga chama Tlakə ta'i tə lar Arauna ndər Jebusi.
16 Dauda tə har lya cha ga la'a chama Tlakə ta'i ku pama huɗamələm ana hə'i, ana katsakər nda cha tsəbiya ga lətə kəra Urshalima. Ngə Dauda ana njirawawa'a tə pəndzə dzaki sə'ingwa ga piya ana huɗəma nda səya hu'i.
17 Dauda tə nar nyi nə Hyel, <<A da ya ngə tə na nja jigabiya ləvaləva ma?Na ngə tə mər səpəla'a ga mər sə ɗimi. Nji'inə nəkə nda kutəng tanyi nga nda. Mi sənda mər nda? Yawa Tlakəu, Hyel ɗa, ngwa huɗətla nghə səya təkəra ya ana njir ki ɗa, kəl ja, ngwa ka ngyar təmachi nə ngya təkəra nji nghə wa.>>
18 Ngə chama Tlakə tə nar nyi nə Gad ənda cha nar nyi nə Dauda, cha təra cha gi hərəya nyi dzəgana nə Tlakə kyatə lar Arauna ndər Jebusi. 19 Ngə Dauda tə təra ga ki mər sənda Gad tə nr nyi ku tləmər Tlakəu.
20 Ku skanda Arauna kwa pi alkama, cha sha ga la'a chama nda, nguil shili nyi fwaɗə inda kə'icha, tə ki mbuta nda. 21 Kəl Dauda tə shili, ya nda Arauna tə dzama ga la'anyi, cha ngyar lar nda ga uzhi mar Dauda ana huɗəma cha səya hu'i.
22 Ngə Dauda tə nar nyi, <<Tlatsə ɗa lar nghə na ka ya hərtə nyi dzəgana nə Tlakə ti, ka nja hənda təmachi nə təkəra nji ɗa. Ɗəl nda ɗa wi sənda njo kina ɗəla.
23 Arauna tə nar nyi Dauda, <<Həti! Ngwa tlakə ɗa təl mər dəhə sənda cho i. Naya tsəu yo nə nghə tla ka nja handa təmachi ni, təwa inə tsəu kwa ɗa ka shilu'u, alkama tsəu ka sər hatəmacha nə uhiuhi. Dəhə sə'inə yo nə ngha.>>
24 Kəl ja, təl Dauda tə ɓəlakə nyi nə Arauna, <<A'a, ba naya na'a, ɗələ yo ɗəla. A da yo hətə sənda nəghə ka ya nə nyi nə tlakə ndara ya hatəmachi ana sənda pa'a vitəku ɗa wa.>>
25 Aka ənga Dauda tə kinda Arauna ana bəjingha nda kwa ɗa kilo məɗəfa. 26 A tangnda ngə Dauda hərəya dzəgana anə Tlakaəu, cha handa təmaci nə nginda ana nə ɓatlə pam. Cha nga Tlakəu, ya ngə Tlakə tə wum nə nyi ki huɗamələm ana hu'u atə dzəgana hatəmachi nə nginda.
27 Ngə Tlakə tə ndər nə chama nda, ngə cha ɓəlau katsakə nyi gu ki nyi. 28 Aku biji nda, nda Dauda tə la'a ənda Tlakə tə wumə nə nyi atə lar Arauna ndər Jebusi, cha hatəmachi tangnda. 29 Aku biji nga madləɓa Tlakə nda Musa tə ɓatlə kwa takəu, ana dzəgana hatəmachi tsəu ta nda kyatə mbwa dzəgam ki Gibiyon. 30 Kəl ja, a Dauda da kwa nau yi nda ka cha jau sə tsa Hyel wa, aka cho ləvər katsakər chama Tlakəu.