خطِ پولُس بَلدِه تِیتُس
پیشگُفتار
امی خط ره پولُس بَلدِه تِیتُس نوِشته کده. تِیتُس یگ ایماندارِ غَیرِ یهُود و همکار و دوستِ پولُس بُود که دَ اِعلان کدونِ خوشخبری اُو ره کومَک مُوکد. پولُس رهبری جماعتِ ایماندارای جزِیرِه کریت ره دَ عُهدِه تِیتُس ایشتُد.
پولُس دَ امزی خط سِه مقصدِ خاص دَره:
۱ دَ شُروع اُو مُشَخَصاتی ره که بَلدِه رهبرای جماعتِ ایماندارا لازِم اَسته بیان مُونه، چُون اِی مَوضوع بخاطرِ طرِیقِه رفتارِ نادُرُستِ مردُمِ کریت اهمیَتِ کَلو دَشت.
۲ اُو تِیتُس ره نصِیحَت مُونه که چی رقم مردُمای مُختلِفِ جماعتِ ایماندارا ره تعلِیم بِدیه.
۳ دَ آخِرِ خط، نصِیحَتای وجُود دَره که دَ بارِه رفتارِ مسیحیا توره مُوگیه، خاص دَ بارِه ضرُورَتِ صُلح طلبی، دوستی، دُوری از آزُرده کدونِ دِیگرو، دُوری از جنگ-و-جنجال و دُوری از تفرِقه دَ بَینِ جماعت ایماندارا.
طبقه-بَندی مَوضوع_ها
دُعا و سلام (فصلِ ۱)
وظِیفِه تِیتُس (فصلِ ۱)
تعلِیمای دُرُست بَلدِه ایماندارا (فصلِ ۲)
رفتارِ ایماندارا (فصلِ ۳)
هِدایت_های آخِری (فصلِ ۳)