خطِ دوّمِ پولُس بَلدِه تِیموتائوس
پیشگُفتار
امی خطِ دوّمِ پولُس که بَلدِه تِیموتائوس نوِشته شُده، کَلونی شی نصِیحَتای شخصی پولُس بَلدِه تِیموتائوس اَسته، چُون تِیموتائوس دَ عِنوانِ همکار و دوستِ جوانِ پولُس دَ نصِیحَتای پولُس ضرُورَت دَشت. مَوضوعِ اَصلی امزی خط صبر و بُردباری اَسته. دَ امزی خط پولُس تِیموتائوس ره تشوِیق مُونه که باوجُودِ سختی_ها و مُخالِفَت_ها وفادار باقی بُمنه و دَ بارِه عیسیٰ مسیح دَ شاهِدی دَدون خُو اِدامه بِدیه، دَ تعلِیمی که واقعاً از کِتابِ مُقَدَّس اَسته پایبَند بَشه و وظِیفِه خُو ره دَ عِنوانِ اِعلان کُنِندِه خوشخبری و معلِم دَ خُوبی انجام بِدیه. پولُس تِیموتائوس ره سخت خبردار مُونه که دَ جَر-و-بحث_های غَیرِ عقلانی و غَیرِ مَنطِقی نَشِینه، چُون هیچ فایده نَدره، بَلکِه باعِثِ از بَین رفتونِ شِنَوِنده_ها مُوشه.
پولُس بَلدِه بیان کدونِ پگِ امزی مَوضوع_ها طرِیقِه زِندگی خود خُو ره مِثال مِیدیه و تِیموتائوس ره تشوِیق مُونه که از طرِیقِه زِندگی ازُو سرمَشق بِگِیره، چُون ایمان، صبر-و-حَوصِله و پایَداری که پولُس دَشت و رَنج_های ره که اُو تَحَمُل مُوکد، پگ شی مِیتنِست تِیموتائوس ره دَ انجام دَدونِ خِدمت شی تشوِیق کُنه.
طبقه-بَندی مَوضوع_ها
سلام_ها و تشوِیق دَ وفاداری (فصلِ ۱)
مُشَخَصاتِ خِدمتگارِ خُدا (فصلِ ۲)
بےخُدایی دَ زمانِ آخِر (فصلِ ۳)
اهمیَتِ کلامِ خُدا (فصلِ ۴)
نصِیحَت_های شخصی پولُس (فصلِ ۴)