خطِ اوّلِ پولُس بَلدِه تِیموتائوس
پیشگُفتار
امی خط ره پولُس بَلدِه تِیموتائوس نوِشته کده. تِیموتائوس یگ ایماندارِ جوان از مردُمِ ولایتِ غلاتیه بُود که غلاتیه دَ تُرکیِه اِمروزی مَوقعیت دَشت. آبِه تِیموتائوس یهُودی و آتِه شی غَیرِ یهُودی بُود. تِیموتائوس همکار و دوستِ پولُس بُود که دَ سَفر_های شی قد ازُو مورفت و دَ اِعلان کدونِ خوشخبری دَ بارِه مسیح اُو ره کومَک مُوکد. پولُس تِیموتائوس ره بَلدِه رهبری جماعت_های ایماندارا تعیِین کدُد، بطَورِ نَمُونه بَلدِه جماعتِ ایماندارای شارِ اِفِسُس.
پولُس بَلدِه تِیموتائوس پَیغام نوِشته مُونه تا اُو ره دَ خِدمت تشوِیق کنه و دَ بارِه عقِیده_های غَلَطی که دَ مینکلِ ایماندارا پَیدا شُده اُو ره باخبر کُنه. یکی از عقِیده_های غَلَط اِی بُود که نِجات دَ وسِیلِه کارای مِثلِ نَخوردونِ بعضی خوراک_ها و توی نَکدو دَ دِست مییه. پولُس امچُنان دَ بارِه اِداره و عِبادتِ جماعتِ ایماندارا و دَ بارِه تعیِین کدونِ رهبرا دَ جماعت_ها تِیموتائوس ره راهنُمایی مُونه.
طبقه-بَندی مَوضوع_ها
سلام_ها و اَخطار دَ بارِه تعلِیمای غَلَط (فصلِ ۱)
لُطفِ خُدا دَ سرِ پولُس (فصلِ ۱)
هِدایَت دَ بارِه دُعا و عِبادت (فصلِ ۲)
اخلاقِ سرپرَست و خِدمتگارِ جماعتِ ایماندارا (فصلِ ۳)
نصِیحَت بَلدِه خادِمِ خُوبِ مَولا مسیح (فصلِ ۴)
رفتار دَ مُقابِلِ اَفرادِ مُختلِف دَ جماعتِ ایماندارا (فصلِ ۵)
نصِیحَت_های مُختلِف (فصلِ ۶)