خطِ دوّمِ پولُس بَلدِه ایماندارای تِسالونِیکی
پیشگُفتار
سوال_های که دَ بارِه پس اَمَدونِ مسیح دَ مینکلِ ایماندارای تِسالونِیکی پَیدا شُده بُود، باعِثِ مُشکِلاتِ کٹه شُدُد. امزُو خاطر پولُس دَ خطِ دوّم خُو بَلدِه تِسالونِیکیا واضِح مُونه که پیش از اَمَدونِ مسیح، بَدی و شرارَت زیرِ راهنُمایی یگ نفر که «شرِیر» و یا «زِشتِ بیروکار» گُفته شُده دَ آخرِین حد مِیرَسه. اُو نفر دَ ضِدِ مسیح باله مُوشه، ولے مسیح دَ وختِ پس اَمَدون خُو اُو ره قد نَفَسِ دان خُو نابُود مُونه.
پولُس دَ امزی خط قد تاکِیدِ کَلو از ایماندارای تِسالونِیکی خاهِش مُونه که باوجُودِ مُشکِلات و سختی_ها دَ ایمان خُو مُستَحکم بُمنه و بَلدِه نَفقِه خُو رقمِ پولُس و همکارای شی کار کُنه و دَ کارای نیک اِدامه بِدیه.
طبقه-بَندی مَوضوع_ها
سلام_ها، شُکرگُزاری و دُعا (فصلِ ۱)
ظهُورِ دَجال پیش از ظهُورِ عیسیٰ مسیح (فصلِ ۲)
درخاستِ دُعا و پرهیز از ٹمبلی (فصلِ ۳)