فصلِ پنجُم
تَیاری بَلدِه ظهُورِ مسیح
1 بِرارونِ عزِیز، دَ بارِه وخت و زمانِ امزی واقِعه_ها لازِم نِییه که یَگو چِیز بَلدِه شُمو نوِشته کنُم، 2 چُون شُمو خُوب مِیدَنِید که روزِ خُداوند رقمِ دُزی اَسته که دَ غَیتِ شاو مییه. 3 دَ امزُو وخت که مردُم مُوگه: ”صُلح و اَمنیَت اَسته،“ بےبلغه مُصِیبت، خرابی و وَیرانی دامونگِیرِ مردُم مُوشه مِثلی که دَردِ زَیدو دَ سُراغِ خاتُونِ شِکامتُو مییه و هیچ راه بَلدِه دُوتا کدو نِییه. 4 لیکِن شُمو، اَی بِرارو، دَ ترِیکی نِیَستِید که اُو روز شُمو ره رقمِ یگ دُز غافِلگِیر کُنه، 5 چُون شُمو بچکِیچای نُور و روز اَستِید. مو نَه دَ ترِیکی کار دَری و نَه دَ شاو. 6 پس، بیِید که رقمِ دِیگرو وَری خاوبُرده نَبَشی، بَلکِه بیدار و آدِر بَشی. 7 چُون کسای که خاو مُونه، اُونا شاو دَ خاو موره و کسای که خود ره نِشه مُونه اُونا ام از طرفِ شاو نِشه مُوکُنه. 8 ولے مو که دَ روشنَیی روز تعلُق دَری، باید آدِر بَشی و ایمان و مُحَبَت خُو ره مِثلِ زِرِه وَری دَ جان خُو کنی و اُمِیدِ نِجات ره رقمِ کولِه آینی وَری دَ سر خُو کنی. 9 چُون خُدا مو ره بَلدِه ازی اِنتِخاب نَکده تا دَ غَضَبِ ازُو گِرِفتار شُنی، بَلکِه بَرای ازی که دَ وسِیلِه مَولای مو عیسیٰ مسیح نِجات پَیدا کنی. 10 اُو جان خُو ره بَلدِه ازمو فِدا کد تاکه مو دَ وختِ ظهُور شی قد ازُو قَتی زِندگی کنی، چی بیدار بَشی، چی خاو.a 11 پس دَزی تَرتِیب دَ تشوِیق و تَقوِیه یگدِیگِه خُو اِدامه بِدِید، امُو رقم که آلی ام مُوکُنِید.
نصِیحَت_های آخِری
12 آکُو بِرارو، مو از شُمو خاهِش مُونی تا امُو کسای ره که دَ بَین شُمو دَ نامِ مَولا عیسیٰ زَحمت مِیکشه و شُمو ره دَ راهِ مَولا نصِیحَت و راهنُمایی مُونه، دَ عِنوانِ پیشوایون خُو شِنَخته دَزوا اِحترام کنِید 13 و اُونا ره از خاطرِ امزُو زَحمت_ها قد جان و دِل خُو مُحَبَت و عِزَت کنِید و قد یگدِیگِه خُو دَ صُلح-و-صفا زِندگی کُنِید. 14 بِرارو، مو از شُمو خاهِش مُونی که آدمای ٹمبل و جُوربَغَل ره سرزَنِش کنِید، اَفرادِ کم‌دِل و ترسَندُک ره دِلداری بِدِید، از نفرای ضعِیف و کم‌وَس پُشتِیوانی کنِید و قد پگِ مردُم صَبر-و-حَوصِله کنِید. 15 هُوش کنِید که دَ عِوَضِ بَدی، بَدی نَکنِید، بَلکِه همیشه کوشِش کنِید که قد یگدِیگِه خُو و ام قد تمامِ مردُمِ دِیگه خُوبی کنِید. 16 هر غَیت خوش بَشِید. 17 همیشه دُعا کنِید. 18 دَ هر حالت که اَستِید، از خُدا شُکرگُزاری کنِید، چراکه اینَمی خاست-و-اِرادِه خُدا بَلدِه شُمو دَ راهِ عیسیٰ مسیح اَسته. 19 آتِشِ روح اُلقُدس ره گُل نَکنِید. 20 پیشگویی_ها ره سُبُک-و-اَندَک فِکر نَکنِید، 21 مگم دَ بارِه تمام چِیزا تحقِیق کنِید و هر چِیزِ خُوب ره محکم بِگِیرِید. 22 خودون خُو ره از هر رقم بَدی دُور نِگاه کنِید.
23 خُدای که سرچشمِه صُلح-و-سلامَتی اَسته، خود شی شُمو ره کامِلاً پاک-و-مُقَدَّس کنه تاکه روح و جان و جِسم شُمو تا روزِ ظهُورِ مَولای مو عیسیٰ مسیح، بےعَیب و سالِم بُمَنه. 24 امُو که شُمو ره دعوَت دَده قابِلِ اعتِماد و باوَفا اَسته و حتماً امی کارا ره پُوره مُونه.
25 بِرارو، دَ حقِ ازمو دُعا کُنِید. 26 پگ بِرارو ره از دِلِ پاک قد رُوی ماخی سلام بُگِید. 27 ما دَ نامِ مَولا شُمو ره قَسم مِیدُم که امی خط ره دَ تمامِ بِرارو بِخانِید.
28 فَیضِ مَولای مو عیسیٰ مسیح نصِیبِ پگ شُمو شُنه. آمین.