خطِ پولُس بَلدِه ایماندارای کولُسی
پیشگُفتار
اِی خط بَلدِه جماعتِ ایماندارِ شارِ کولُسی نوِشته شُده. کولُسی دَ شرقِ اِفِسُس دَ تُرکیِه اِمروزی مَوقعیت دَشت. پولُس خبر شُدُد که دَ مینکلِ جماعتِ ایماندارِ کولُسی کسای جای گِرِفته که خود ره ایماندار مُوگه، ولے نِییه. امُو کسا مُوگُفت که بَلدِه شِنَختونِ خُدا و نِجات پَیدا کدو تنها ایمان دَشتو دَ مسیح بس نِییه، بَلکِه اَرواح و قُدرت_های روحانی ره ام باید پرستِش کنی و احکامِ شریعت ره ام دَ جای بیری.
پولُس قد امزی طرزِ فِکر مُخالِفَت مُونه و شخصیَتِ مسیح ره بیان کده مُوگیه:
۱. مسیح چِهرِه خُدای نادِیده اَسته
۲. اُو از اَزَل بُوده و دُنیا دَ وسِیلِه ازُو خَلق شُده
۳. اُو اوّلِین کسی اَسته که از مُرده_ها زِنده شُده
۴. ذاتِ اِلٰهی کامِلاً دَزُو وجُود دَره
۵. اُو مو ره قد خُدا آشتی مِیدیه
۶. اُو کامِلاً تَوانایی ازی ره دَره که اِنسان ره نِجات بِدیه
پولُس دَ حالِیکه ایماندارا ره امزی طرزِ فِکرِ غَلَط باخبر مُوکُنه، امچُنان اُونا ره تشوِیق مُونه که زِندگی خُو ره مُطابِقِ تعلِیمِ عیسیٰ مسیح پیش بُبره.
امی خط ره پولُس دَ بَندی‌خانه نوِشته کده از دِستِ تِیخِیکاس و اونیسِیموس دَ کولُسی رَیی کد.
طبقه-بَندی مَوضوع_ها
دُعا و سلام (فصلِ ۱)
شخصیَتِ و بُزُرگی مسیح (فصلِ ۱)
زَحمتای پولُس بَلدِه جماعتِ ایماندارا (فصلِ ۱ - ۲)
آزادی ایماندارای مسیح از رسم-و-رواج_های دُنیایی (فصلِ ۲)
اصُول و مُقرَراتِ زِندگی روحانی (فصلِ ۳)
مُقرَرات بَلدِه رابِطِه خانَوارِ مسیحی (فصلِ ۳)
توره_ها و سلام_های آخِری (فصلِ ۴)