خطِ اوّلِ پولُس بَلدِه ایماندارای تِسالونِیکی
پیشگُفتار
امی خط بَلدِه ایماندارای شارِ تِسالونِیکی نوِشته شُده. تِسالونِیکی پایتختِ ولایتِ مَقدونیه بُود و مَقدونیه یکی از ولایت_های امپراطوری رُوم.
پولُس وختِیکه شارِ فِیلِیپی ره ایله کده دَ تِسالونِیکی رفت، اُو مردُمِ ازُونجی ره دعوَت کد که دَ مسیح ایمان بیره و ازوا یگ جماعت جور کد، مگم کَلو وخت تیر نَشُد که یهُودیا قد ازُو مُخالِفَت ره شُروع کد. اُونا وختی دِید که کارِ اِعلان کدونِ خوشخبری پولُس دَ مینکلِ مردُمای غَیرِ یهُود دَ کامیابی پیش موره، قارِ ازوا باله اَمَد و اُونا بَخِیلی ره شُروع کد، چُون کَلو مردُمای غَیرِ یهُود پیش ازُو دَ یهُودیَت دِلچسپی دَشت. مُخالِفَتِ ازوا دَ اندازِه کَلو شُد که پولُس مجبُور شُد تِسالونِیکی ره ایله کنه و دَ شارِ بیریه بوره. بعد از یگ مُدَت وختِیکه پولُس دَ شارِ قُرِنتُس رفت، همکار شی تِیموتائوس بَلدِه ازُو دَ بارِه ایماندارای تِسالونِیکی خبر رَیی کد. مُطابِقِ خبرِ تِیموتائوس، دَ مینکلِ ایمانداری تِسالونِیکی دَ بارِه پس اَمَدونِ مسیح سوال پَیدا شُدُد. امزُو خاطر پولُس لازِم دِید که مَوضوع ره بَلدِه ازوا بیان کُنه.
پولُس دَ امزی خط بَلدِه خبرِ خُوب که دَ بارِه ایمان و مُحَبَتِ ایماندارای تِسالونِیکی شِنِیده، خُدا ره شُکرگُزاری مُونه و دَ یادِ ازوا میره که اُو دَ مینکلِ ازوا چی رقم زِندگی مُوکد. پولُس شَوق و علاقِه خُو ره بَلدِه دُوباره دِیدونِ ازوا اِظهار مُونه و اُونا ره نصِیحَت مُونه که زِندگی پاک و مُقَدَّس دَشته بَشه. بعد ازُو دَ سوال_های که دَ بارِه پس اَمَدون مسیح و دَ بارِه ایماندارای فَوت شُده دَ مینکلِ ازوا پَیدا شُدُد، جواب مِیدیه و دَ بارِه ازی که مسیح چی وخت و چی رقم پس مییه و قد ایماندارای فَوت شُده دَ وختِ اَمَدونِ مسیح چِیز کار مُوشه بَلدِه ازوا بیان مُوکُنه.
طبقه-بَندی مَوضوع_ها
سلام_ها، شُکرگُزاری و دُعا (فصلِ ۱)
خِدمَتای پولُس دَ ایماندارای تِسالونِیکی (فصلِ ۲)
خبرِ خوش و دِلگرم کُنِندِه تِیموتائوس (فصلِ ۳)
زِندگی مُطابِقِ خاستِ خُدا (فصلِ ۴)
پس اَمدونِ مسیح (فصلِ ۴)
تَیاری بَلدِه ظهُورِ مسیح (فصلِ ۵)
نصِیحَت_های آخِری (فصلِ ۵)