فصلِ چارُم
1 اَی بادارا، قد غُلامای خُو عادِلانه و دَ اِنصاف رفتار کُنِید، چُون شُمو مِیدَنِید که شُمو ام دَ عالمِ باله یگ بادار دَرِید.
2 دَ دُعا پایبَند بَشِید و مُتَوَجِه بَشِید که قد شُکرگُزاری قتی بَشه. 3 و دَ عَینِ وخت بَلدِه ازمو ام دُعا کُنِید که خُدا یگ درگه ره بَلدِه رسَندونِ کلام واز کُنه تا مو بِتَنی رازِ مسیح ره اِعلان کُنی که ما بخاطر شی بَندی اَستُم. 4 دُعا کُنِید که ما امی راز ره بطَورِ واضِح بَرمَلا کنُم، امُو رقم که بَلدِه مه فرض اَسته. 5 دَ برابرِ کسای که از بُرو اَسته عاقِلانه رفتار کده امزُو فرصت خُوب اِستِفاده کُنِید. 6 گُفتُگوی شُمو همیشه پُرفَیض و سَنجِیدهa بَشه تا بِدَنِید که دَ هر کس چی رقم جواب بِدِید.
سلام_های آخِری
7 تِیخِیکاس شُمو ره از تمامِ احوال مه باخبر مُونه. اُو بِرارِ عزِیز، خِدمتگارِ وفادار و همکار مه دَ خِدمتِ مَولا اَسته. 8 ما اُو ره بَلدِه امزی مقصد دَ پیش شُمو رَیی مُونُم که شُمو از احوال مو باخبر شُنِید و تا اُو شُمو ره دِل-جمی بِدیه. 9 اُو ره قد اونیسِیمُس، بِرارِ وفادار و دوست-دَشتَنی مو که یکی ازشُمو اَسته، قَتی رَیی مُونُم. اُونا دَ بارِه تمامِ چِیزای که دَ اِینجی رُخ مِیدیه بَلدِه شُمو مُوگیه.
10 اَرِستَرخُس که قد ازمه یگجای بَندی اَسته و مَرقَس باچِه کاکای بَرنابا شُمو ره سلام مُوگیه. دَ بارِه مَرقَس بَلدِه شُمو هِدایَت دَده بُودُم که هر وخت اُو دَ پیش شُمو اَمَد از شی پذِیرایی کُنِید. 11 و یسوع که دَ نامِ یوستُس یاد مُوشه، ام شُمو ره سلام مُوگیه. تنها اینَمیا از جمِ یهُودیاb دَ مینکلِ همکارای مه اَسته که بَلدِه پادشاهی خُدا کار مُونه و اَمیا باعِثِ آرامِش مه شُده. 12 ایپَفراس که یکی ازشُمو و خِدمتگارِ مسیح عیسیٰ اَسته، شُمو ره سلام مُوگیه. اُو همیشه دَ دُعاهای خُو بَلدِه شُمو جِدی دُعا مُونه تا دَ ایمان بالِغ شُنِید و دَ پَی بُردونِ تمامِ خاست-و-اِرادِه خُدا کامِلاً مُتَیقِین شُنِید. 13 ما دَ بارِه ازُو شاهِدی مِیدیُم که اُو بخاطرِ ازشُمو و ایماندارای لائودِیکیه و هیراپولِیس غَدر زَحمت مِیکشه. 14 لُوقا طبِیبِ دوست-دَشتنی و دیماس شُمو ره سلام مُوگیه.
15 بَلدِه بِرارونی که دَ لائودِیکیه اَسته و بَلدِه خوار مو نیمفا و جماعتِ ایماندارا که دَ خانِه شی اَسته، سلام_های مَره بِرسَنِید. 16 وختِیکه اِی خط بَلدِه شُمو خانده شُد، توخ کُنِید که بَلدِه جماعتِ ایماندارای لائودِیکیه ام خانده شُنه و شُمو ام خطی ره که بَلدِه لائودِیکیه نوِشته شُده بِخانِید. 17 دَ اَرخِیپُس بُگِید: ”توخ کُو، خِدمتی که دَ راهِ مَولا دَز تُو دَده شُده، اُو ره تَکمِیل کُنی.“
18 ما پولُس، امی دُعا-و-سلام ره قد دِستِ خود خُو نوِشته کدیم. دَ یاد دَشته بَشِید که ما بَندی اَستُم. فَیض نصِیب شُمو شُنه. [آمین.]c