خطِ پولُس بَلدِه ایماندارای فِیلِیپی
پیشگُفتار
امی خطِ پولُس بَلدِه ایماندارای شارِ فِیلِیپی نوِشته شُده. جماعتِ ایماندارِ شارِ فِیلِیپی اوّلِین جماعتِ ایماندار دَ خاکِ اُروپا بُود که دَ وسِیلِه پولُس بُنیاد شی ایشته شُد. اِی جماعتِ ایماندار دَ مَقدونیه، دَ یکی از ولایت_های امپراطوری رُوم قرار دَشت.
پولُس امی خط ره از بَندی-خانه از شارِ رُوم نوِشته مُونه. مقصدِ پولُس از نوِشته کدونِ امزی خط دَ قَدمِ اوّل تَشَکُر کدو از ایماندارای شارِ فِیلِیپی بخاطرِ تُحفه_های اَسته که اُونا بَلدِه پُوره کدون ضرُورَت_های شی رَیی کدُد. بعد از تَشَکُری پولُس چند مَوضوعِ مُهِم ره بَلدِه ازوا مُوگیه:
۱. اُونا ره از حال-و-احوال خُو باخبر مُونه
۲. اُونا ره تشوِیق مُونه که آزار_ها ره تَحَمُل کده اُستوار بُمنه و دَ غَیتِ سختی_ها ام خوش بَشه
۳. ازوا خاهِش مُونه که رقمِ مسیح فروتن بَشه و دَ مینکل خُو اِتفاق-و-اِتحاد دَشته بَشه
۴. ازوا تقاضا مُونه که از تِیموتائوس و ایپَفرودِیتُس پذِیرایی گرم کُنه
۵. اُونا ره از خطرِ معلِمای دروغی خبردار مُونه
۶. دَ آخِر پولُس تاکِید مُونه که اُونا خوش بَشه، اِطمِینان دَشته بَشه، اِتحاد-و-اِتفاق خُو ره حِفظ کنه، ایمان خُو ره نِگاه کُنه و دَ زِندگی مسیحی خُو اِدامه بِدیه.
یگ چِیزی که کَلو دَ امزی خط دِیده مُوشه شَوق-و-علاقِه پولُس بَلدِه جماعتِ ایماندارِ شارِ فِیلِیپی اَسته.
طبقه-بَندی مَوضوع_ها
دُعا و سلام (فصلِ ۱)
بَندی شُدونِ پولُس و پَخش شُدونِ خوشخبری (فصلِ ۱)
فروتنی و بُزُرگی مسیح (فصلِ ۲)
رقمِ سِتاره_ها روشنی بِدِید (فصلِ ۲)
مسیح مقصدِ حقِیقی زِندگی (فصلِ ۳)
نصِیحَت_ها بَلدِه اِتفاق و یگ‌دِلی (فصلِ ۴)
شُکرگُزاری بَلدِه هدیه_ها (فصلِ ۴)
خاتِمه (فصلِ ۴)