خطِ پولُس بَلدِه ایماندارای اِفِسُس
پیشگُفتار
مقصدِ امزی خط اِی اَسته که ساحِه دِیدِ ایماندارای شارِ اِفِسُس دَ بارِه نقشِه اَزَلی و اَبَدی خُدا و دَ بارِه فَیضِ خُدا وَسعت پَیدا کُنه تا اُونا هَدَف_های نیکِ خُدا ره که بَلدِه جماعتِ ایماندارا اَسته پَی بُبره.
پولُس دَ امزی خط بیان مُونه که قَصدِ خُدا اینی اَسته که تمامِ چِیزا ره از آسمو و زمی زیرِ فرمانِ مسیح بیره. اُو امی مطلب ره دَ سِه فصلِ اوّلِ خط بطَورِ واضِح تشریح مُوکُنه. پولُس نِشو مِیدیه که نقشِه خُدا اِی اَسته که یهُود و غَیرِ یهُود دَ میراثِ خُدا و دَ جماعتِ مسیح که «جِسمِ مسیح» گُفته مُوشه، شرِیک بَشه. بعد ازُو دَ سِه فصلِ دِیگه از ایماندارای مسیح خاهِش مُونه که بطَوری زِندگی کُنه که لیاقتِ میراثِ خُدا و جِسمِ مسیح ره دَشته بَشه.
پولُس بَلدِه نِشو دَدونِ اِتحادِ یهُود و غَیرِ یهُود دَ جِسمِ مسیح مَثَل_های کَلو میره: اُو جماعتِ ایماندارا ره «جِسم» مُوگیه و مسیح ره «سرِ جِسم،» جماعتِ ایماندارا ره «ساختُمان» مُوگیه و مسیح ره «سنگِ اَصلی ساختُمان.» دَ یگ جای دِیگه پولُس دَ بارِه رابِطِه خانَوارا مِثال اَوُرده جماعتِ ایماندارا ره مِثلِ «خاتُو» و مسیح ره مِثلِ «شُوی» بیان مُونه. پولُس قد فِکرِ غَوُج فَیضِ خُدا ره که دَ مسیح اَسته تشریح مُونه و دلِیل_های محکم و قاطِع میره. دَ حقِیقت تمامِ دلِیل_ها که دَ بارِه مُحَبَت، فِداکاری، بَخشِش، فَیض و قُدُوسیَتِ مسیح بیان مُوشه، یگ حِسِ خاص دَره.
طبقه-بَندی مَوضوع_ها
دُعا و سلام (فصلِ ۱)
مقصدِ اِلٰهی بَلدِه ایماندارای مسیح (فصلِ ۱)
زِندگی نَو قد مسیح (فصلِ ۲)
پولُس، رسُول بَلدِه مردُمای غَیرِ یهُود (فصلِ ۳)
اِتفاق و اِتحاد دَ جِسمِ مسیح (فصلِ ۴)
زِندگی کدو دَ نُور و رابِطِه خاتُو و شُوی (فصلِ ۵)
رابِطِه آته-و-آبه قد بچکِیچا (فصلِ ۶)
سَلاح بَلدِه جنگِ روحانی (فصلِ ۶)
سلام_های آخِری (فصلِ ۶)