فصلِ شَشُم
رفتارِ نیک قد پگِ مردُم
1 اَی بِرارو، اگه یَگو کس دَ حینِ خطا گِرِفتار مُوشه، شُمو کسای که روحانی اَستِید اُو ره دَ مُلایمَتی اِصلاح کُنِید. مگم هُوش خُو ره بِگِیرِید، نَشُنه که شُمو ام گِرِفتارِ وَسوَسه شُنِید. 2 بارهای مُشکِلاتِ یگدِیگِه خُو ره تَحَمُل کنِید و دَمزی رقم شریعتِ مسیح ره پُوره کُنِید. 3 اگه کُدَم کس خود خُو ره یَگو چِیز فِکر مُونه دَ حالِیکه هیچ چِیز نِییه، اُو خود ره بازی مِیدیه. 4 هر کس باید اعمال-و-رفتارِ خود خُو ره اِمتِحان کُنه، اوخته اِفتخارِ اعمال شی تنها بَلدِه خودِ ازُو اَسته، بِدُونِ که خود ره قد دِیگه کس برابر کُنه، 5 چُون هر کس باید بارِ خود خُو ره بُبره.
6 کسای که از کلامِ خُدا تعلِیم مِیگِیره، باید معلِم خُو ره دَ تمامِ چِیزای خُوب خُو شرِیگ کُنه. 7 خود ره بازی نَدِید، خُدا رِیشخَند نَمُوشه، چُون هر چِیزی که اِنسان کِشت کُنه، امُو ره دِرَو مُونه. 8 چُون کسی که بَلدِه جِسم خُو کِشت کُنه، اُو از جِسم فِساد دِرَو مُونه؛ لیکِن کسی که بَلدِه روح کِشت کُنه، اُو از روح زِندگی اَبَدی دِرَو مُونه. 9 پس بیِید که از انجامِ کارِ نیک مَنده نَشُنی، چُون اگه دِست از کار نَکشی، حاصِلات ره دَ وخت شی دِرَو مُونی. 10 امزی خاطر تا وختِیکه مو فرصت دَری، بیِید که دَ پگِ مردُم نیکی کنی، خصُوصاً دَ کسای که از جمِ ایماندارا اَسته.
توره_های آخِر
11 توخ کُنِید که قد چی حرفای کٹه ما امی خط ره قد دِستِ خود خُو بَلدِه شُمو نوِشته کدُم. 12 کسای که میخایه خود ره دَ جِسم خُوب-و-دِیندار نِشو بِدیه، اُونا کوشِش مُونه که شُمو ره مجبُور کُنه تا ختنه شُنِید، تنها بَلدِه ازی که بخاطرِ صلِیبِ مسیح آزار-و-اَذیَت نَشُنه. 13 حتیٰ امُو کسای که ختنه مُوشه، خودون شی از شریعت اِطاعَت نَمُونه، ولے اُونا خاهِش دَره که شُمو ختنه شُنِید تا اُونا دَ بارِه جِسم شُمو اِفتخار کُنه. 14 لیکِن از مه دُور بَشه که بغَیر از صلِیبِ مَولای مو عیسیٰ مسیح دَ بَلِه کُدَم چِیزی دِیگه اِفتخار کنُم، چُون دَ وسِیلِه ازُو بُود که دُنیا بَلدِه مه دَ صلِیب میخکوب شُد و ما بَلدِه دُنیا. 15 نَه ختنه شُدو اهمیَت دَره و نَه ام ختنه نَشُدو، بَلکِه خِلقتِ نَو مُهِم اَسته. 16 و کسای که امزی قانُون پَیرَوی کُنه، آرامِش و رَحمت نصِیبِ ازوا شُنه و نصِیبِ اِسرائیل قَومِ خُدا.
17 بعد ازی دِیگه هیچ کس مُزاحِم مه نَشُنه، چُون ما دَ جِسم خُو داغ_های ره دَرُم که بخاطرِ عیسیٰ خوردیم.
18 فَیضِ مَولای مو عیسیٰ مسیح قد روحِ شُمو باد، اَی بِرارو. آمین.