فصلِ شَشُم
نصِیحَت دَ غُلاما و بادار_ها
1 اُو کسای که دَ تَی یُوغِ غُلامی اَسته، بیلِید که اَربابای خُو ره لایقِ اِحترامِ کامِل بِدَنه تا هیچ کس دَ بارِه نامِ خُدا و تعلِیمِ مسیح بَدگویی نَکُنه. 2 غُلامای که اَربابای ایماندار دَره نَباید دَ دلِیلِ ازی که بِرارِ دِینی شی اَسته، دَزوا بےاِحتِرامی کُنه، بَلکِه اُونا باید خُوبتَر خِدمت کُنه، چُون اُو کسای که از خِدمتِ ازوا فایده مِیگِیره، مومِن و عزِیزِ ازوا اَسته.
نصِیحَت دَ بارِه تعلِیمِ غَلَط و ثُروَتِ حقِیقی
اِی چِیزا ره تعلِیم بِدی و دَ بارِه شی تاکِید کُو. 3 اگه کسی یَگو تعلِیمِ دِیگه بِدیه و تعلِیم شی قد تورای صالِحِ مَولای مو عیسیٰ مسیح و قد تعلِیمِ دِینداری سَم نَه یَه، 4 اُو شخص خود پِسَند اَسته و هیچ چِیز ره نَمُوفامه. برعکس، اِی رقم آدم علاقِه ناسالِم دَ جَر-و-بحث کدو و جنجال کدو دَ بارِه کلِمه_ها دَره که نتِیجِه شی تنگچِشمی، سیالداری، دَو-و-دشنام و بَدگُمانی اَسته. 5 اِیطور نفرا دَ بَین خُو همیشه اِختِلافِ نظر دَره و فِکرِ ازوا فاسِد شُده. اُونا از حقِیقت دُور اَسته و گُمان مُونه که دِینداری یگ وسِیله بَلدِه منافعِه پُولی اَسته. 6 دَ حقِیقت، دِینداری که قد قِناعَت قتی بَشه، یگ مَنبِع کٹِه منافع اَسته. 7 ازی که مو هیچ چِیز ره قد خُو دَ اِی دُنیا نَه اَوُردی، اِی ام ثابِت اَسته که مو هیچ چِیز ره ازی دُنیا قد خُو بُرده نَمِیتَنی. 8 پس اگه مو خوراک و پوشاک دَری، دَمزُو باید قِناعَت کنی. 9 مگم اُونای که میخایه پُولدار شُنه، دَ وَسوَسه و دَ دامِ آرزوهای بےفایده و نُقصان‌دِه گِرِفتار مُوشه که آدما ره سُون تباهی و نابُودی مُوبَره. 10 پُول دوستی سرچشمِه هر رقم بَدی اَسته و بَعضی کسای که دِل شی پَیسه ره تلوَس کده، اُونا از ایمان دُور شُده و خود ره قد دَرد و رَنج_های کَلو گِرِفتار کده. 11 لیکِن تُو، اَی تِیموتائوس بندِه خُدا، ازی چِیزا دُوتا کُو. دَ دُمبالِ راستی، خُداپَرستی، ایمان، مُحَبَت، صَبر و نَرمی بِگردُو. 12 دَ مُسابِقِه بُزُرگِ ایمان زَحمت بِکَش و زِندگی اَبَدی ره محکم بِگِیر، چُون خُدا تُو ره بَلدِه امزی مقصد کُوی کده و تُو ام دَ پیشِ شاهِدای کَلو دَ ایمان خُو اِقرار کدی.
نصِیحَتِ خاصِ پولُس بَلدِه تِیموتائوس
13 دَ حُضُورِ خُدا که پگ ره زِندگی مِیدیه و عیسیٰ مسیح که دَ مُقابِلِ پُنطیوس پیلاتُس شاهِدی نیکو دَد، ما تُو ره وظِیفه مِیدیُم 14 که اِی حُکم ره بِدُونِ کَمی-و-کاستی و بِدُونِ ملامَتی تا روزی که مَولای مو عیسیٰ مسیح ظهُور مُونه، نِگاه کُنی.
15 خُدای مُتَبارَک، یکتا و قادِرِ مُطلَق
که شاهِ شاهان و رَب-اُلارباب اَسته،
امُو واقِعه ره دَ زمانِ مُعیَن شی پُوره مُونه.
16 تنها اُو اَسته که هرگِز از بَین نَموره
و دَ اِی رقم نُور وجُود دَره
که هیچ کس نَمِیتنه دَز شی نزدِیک شُنه.
هیچ اِنسان اُو ره نَدِیده و ام نَمِیتنه اُو ره بِنگره.
عِزَت و قُدرت تا اَبَداُلاباد ازُو باد. آمین.
17 دَ سرمایه‌دارای ازی دُنیا حُکم کُو که مغرُور نَبَشه و دَ مال-و-دَولَتِ که دایمی نِییه، تَوَکُل نَکُنه، بَلکِه دَ خُدای اُمِید دَشته بَشه که هر چِیز ره دَ سَخاوَتمَندی دَز مو مُوبَخشه تاکه مو ازوا لِذَت بُبَری. 18 دَزوا اَمر کُو که خُوبی کُنه و دَ کارای نیک غَنی بَشه، دِستِ واز دَشته بَشه و از سرمایِه خُو دَ دِیگرو بَخشِش کنه. 19 دَزی طرِیقه اُونا بَلدِه خُو یگ گنج ذخِیره مُونه که یگ بُنیادِ محکم بَلدِه آیندِه ازوا اَسته و اُونا صاحِبِ ازُو زِندگی مُوشه که زِندگی واقعی اَسته.