فصلِ پنجُم
رفتار دَ مُقابِلِ اَفرادِ مُختلِف دَ جماعتِ ایماندارا
1 آدمِ رِیش سفید ره هرگِز دَ تَلخی-و-تُندی سرزَنِش نَکُو، بَلکِه اُو ره رقمِ آتِه خُو اَلّی دَ مُلایمت نصِیحَت کُو. قد مَردای جوان رقمِ بِرارای خُو اَلّی، 2 قد خاتُونوی پِیر رقمِ آبِه خُو اَلّی و قد دُخترونِ جوان رقمِ خوارای خُو اَلّی دَ پاکی رفتار کُو.
3 خاتُونوی بیوه ره که واقِعاً بیوه بَشه، عِزَت کُو.a 4 و اگه یگ خاتُونِ بیوه اَولادا یا نوسه‌گو دَشته بَشه، بیل که اوّل اُونا مسئُولیَت دِینی خُو ره دَ جای اَوُرده حقِ آته و آبه و بابه‌کَلونای خُو ره پُوره کُنه، چراکه اِی کار دَ نظرِ خُدا قابِلِ قبُول اَسته. 5 خاتُونی که واقعاً بیوه یَه و هیچ کسی ره نَدره، اُمِیدِ ازُو دَ خُدا یَه و اُو شاو و روز خُو ره دَ راز-و-نیاز و دَ دُعا تیر مُونه. 6 مگم خاتُونِ بیوِه که تسلِیمِ عیاشی مُوشه، حتیٰ اگه زِنده ام بَشه، دَ حقِیقت اُو مُرده یَه. 7 اِی چِیزا ره دَزوا اَمر کُو تاکه اُونا از ملامَتی دُور بَشه. 8 اگه یَگو کس ضرُورَت_های قَومای خُو ره و خصُوصاً ضرُورَت_های اَعضای خانَوادِه خُو ره تَهیه نَکُنه، اُو اَصلاً ایمان خُو ره اِنکار مُونه و از یگ شخصِ بےایمان کده بَدتَر اَسته. 9 خاتُونِ بیوِه که سِن شی کَلوتر از شصت سال بَشه و از یگ شُوی زیاد نَکده بَشه، باید نام شی ثَبت شُنه. 10 علاوه ازی، اُو باید دَ نیکوکاری معرُوف بَشه: مَثلاً، بچکِیچا ره تَربیه کده بَشه، مِهمونَواز بُوده بَشه، پایای ایماندارا ره شُشته بَشهb و دَ یاری بےچاره‌گو رسِیده بَشه. خُلاصه، اُو باید دَ هر کارِ نیک عمل کده بَشه. 11 لیکِن نامِ خاتُونوی بیوِه جوان ره نوِشته نَکُو، چُون وختی خاهِشاتِ نَفسانی ازوا اُونا ره از مسیح دُور کُنه، اُونا خاهِشِ توی کدو ره مُونه. 12 اوخته قد ازی کار خُو اُونا پَیمانِ اوّلی خُو ره قد مسیح مَیده مُونه و ملامَت مُوشه. 13 علاوه ازی، اُونا بےکاری و ٹمبلی ره یاد مِیگِیره و خانه دَ خانه مِیگرده؛ اُونا نَه تنها بےکاره و ٹمبل مُوشه، بَلکِه دُواَنداز و چُغُول ام مُوشه و چِیزای ره مُوگیه که نَباید بُگیه. 14 ازی خاطر ما خاهِش مُونُم که بیوه_های جوان دُوباره شُوی کُنه و صاحِبِ بچکِیچا شُده دَ خانَداری مشغُول شُنه و بَلدِه دُشمو مَوقِع ملامَت کدو ره نَدیه. 15 چُون بَعضی از خاتُونوی بیوه پیش ازی ام گُمراه شُده و از پُشتِ شَیطو رفته. 16 اگه یَگو خاتُونِ ایماندار دَ مَنِه قَومای خُو بیوه_ها دَشته بَشه، بیل که خود شی اُونا ره یاری بِدیه تاکه اُونا بارِ دوشِ جماعتِ ایماندارا نَشُنه. دَزی رقم جماعتِ ایماندارا مِیتنه دَ بیوه_های واقِعی کومَک کُنه.
رفتار قد بُزُرگای جماعت
17 بُزُرگای که کارای جماعت ره دَ خُوبی پیش مُوبره، خصُوصاً اُونای که دَ وَعظ و تعلِیمِ کلام زَحمت مِیکشه، مُستَحقِ دُو برابر اِحترام بَشه. 18 چُون نوِشته_های مُقَدَّس مُوگیه: ”دانِ گاو ره دَ غَیتِ جُغُول کدو بسته نَکُو.“ و امچُنان مُوگیه: ”کارگر حقدارِ مُزد خُو اَسته.“ 19 هیچ تُهمَت ره دَ ضِدِ یَگو بُزُرگِ جماعت قبُول نَکُو، سِوای که دَ وسِیلِه دُو یا سِه شاهِد تایِید شُنه. 20 لیکِن اُونای ره که دَ گُناهِ خُو اِدامه مِیدیه، دَ پیشِ پگ سرزَنِش کُو تاکه دِیگرو عِبرَت گِرِفته ترس بُخوره. 21 دَ حُضُورِ خُدا و مسیح عیسیٰ و ملایکه_های اِنتِخاب شُده، تُو ره قَسم مِیدُم که اِی دستُورا ره بِدُونِ تعصُب-و-تبعِیض اِجرا کُو و هیچ کاری ره از رُوی طرفداری نَکُو.
22 دَ دِست کشِیدو بَلِه کسc عَجَله نَکُو و دَ گُناه_های دِیگرو ام شرِیک نَشُو. خود ره پاک نِگاه کُو. 23 امچُنان، تنها آو وُچی نَکُو، بَلکِه از خاطرِ کَورِه خُو و از خاطرِ ناجوریای که اَکثرِ وخت دَری، یگ کَمَک وَری شرابِ انگُور ام وُچی کُو.