فصلِ سِوّم
بےخُدایی دَ زمانِ آخِر
1 مگم اِی ره بِدَنِید که دَ روزای آخِر اَوقاتِ تَلخ اَمدَنی اَسته؛ 2 چُون مردُم خود پرَست و پُول دوست، لافُک و مغرُور مُوشه. اُونا تورای زِشت و کُفرآمیز مُوگیه و از اَیدِ آته و آبِه خُو نَمُوشه؛ اُونا ناشُکر، ناپاک، 3 بےمِهر، سخت‌دِل، چُغُول، ناپرهیزگار، وَحشی، دُشمونِ نیکی، 4 خیانَتکار، تُندخُوی و بےپَروا و پُر پُف-و-پَٹاق مُوشه و اُونا دَ جای ازی که خُدا ره دوست بِدَنه، عیاشی ره کَلوتر دوست مِیدَنه. 5 ظاهِراً اُونا خود ره دِیندار نِشو مِیدیه، مگم قُدرتِ دِینداری ره رَد مُونه. از اُو رقم مردُم دُوری کُو. 6 دَ بَینِ ازوا کسای اَسته که دَ چَل-و-نَیرَنگ دَ مَنِه خانه_های مردُم راه پَیدا مُونه و خاتُونوی کم عقل ره که دَ تَی بارِ گُناه خَم شُده و دَ زیرِ تاثِیرِ هَوَس_های رقم رقم رفته، دَ چنگ خُو میره. 7 اِی رقم خاتُونو هر وخت تعلِیمِ نَو حاصِل مُونه، مگم هیچ وخت حقِیقت ره دَرک نَمِیتنه. 8 امُو رقم که «یَنّیس و یَمبریس»a قد مُوسیٰ پَیغمبر مُخالِفَت کد، امی نفرای چَلبازام مُخالِفِ حقِیقت اَسته. فِکرای ازوا گنڈه شُده و اُونا از نِگاهِ ایمان رَد شُده. 9 مگم اُونا کَلوتر ازی پیشرَفت نَمُونه، چراکه لَوڈَگی ازوا دَ پگ معلُومدار مُوشه، امُو رقم که حماقتِ یَنّیس و یَمبریس دَ پگ معلُوم شُد.
10 لیکِن تُو از تعلِیم، رفتار، هَدَف، ایمان، صَبر و حَوصِلِه، مُحَبَت و بُردباری از مه سرمَشق گِرِفتے 11 و از آزار_ها و رَنج_های که دَ شارای اَنطاکیه، قونیه و لِستره دِیدُم، خبر اَستی و مِیدَنیکه چی زَجر_ها ره دَ اُونجی کشِیدُم، ولے مَولا عیسیٰ مَره از پگ شی خلاص کد. 12 دَ حقِیقت، تمامِ کسای که میخایه دَ راهِ مسیح عیسیٰ دَ دِینداری زِندگی کُنه، رَنج-و-آزار ره مِینگره. 13 لیکِن مردُمای شرِیر و مکار از بَد بَدتَر مُوشه. اُونا دِیگرو ره بازی مِیدیه و خودون شی ام بازی مُوخوره. 14 مگم تُو دَمزُو چِیزای که یاد گِرِفتی و ایمان اَوُردی اُستوار بُمَن، چُون تُو مِیدَنی که اُونا ره از کِی یاد گِرِفتی؛ 15 و ازی که تُو از ریزگَگی قد کِتابِ مُقَدَّس آشنا بُودی، اُو مِیتنه دَز تُو حِکمت بِدیه تا دَ وسِیلِه ایمان دَ عیسیٰ مسیح نِجات پَیدا کنی. 16 تمامِ نوِشته_های مُقَدَّس از جانِبِ خُدا اِلهام شُده و بَلدِه تعلِیم، سرزَنِش، اِصلاح و تَربیه دَ راهِ عدالت فایده‌مند اَسته، 17 تاکه بندِه خُدا بَلدِه هر کارِ نیک کامِلاً آماده-و-مُجَهَز بَشه.