اِنجِیلِ عیسیٰ مسیح دَ مُطابِقِ مَرقَس
پیشگُفتار
اِنجِیلِ عیسیٰ مسیح که دَ وسِیلِه مَرقَس نوِشته شُده از سِه اِنجِیلِ دِیگه کده قدِیمی‌تَر و مُختَصر‌تَر اَسته. متیٰ و لُوقا ام اِمکان دَره که امزی اِنجِیل بحَیثِ مَنبع اِستِفاده کده بَشه. اِی اِنجِیل تَوَلُدِ عیسیٰ مسیح ره ذِکر نَمُونه، بَلکِه قد واقِعه ظهُورِ یحیای تعمِید دِهِنده شُروع مُوشه و دَ بارِه غُسلِ تعمِید گِرِفتونِ عیسیٰ مسیح و آزمایش شی توره مُوگیه. بعد ازُو کار_ها و مُعجزه_های عیسیٰ مسیح ره بیان کده بطَورِ واضِح تشریح مُونه و نِشو مِیدیه که دَ پالُوی دِیگه مُعجزه_ها عیسیٰ مسیح قُدرتِ بخشِشِ گُناه_ها و بُر کدونِ ارواحِ ناپاک ره ام دَره. دَ فصل_های آخِرِ امزی اِنجِیل دَ بارِه هفتِه آخِرِ زِندگی عیسیٰ مسیح دَ رُوی زمی توره مُوگیه و دَ صلِیب میخکوب شُدو و دُوباره زِنده شُدون شی ره بیان مُوکُنه.
مَرقَس دَمزی اِنجِیل تمامِ مَوضوع_ها ره بطَورِ مُختَصر ذِکر مُونه، چُون از کلِمِه «دِستی» یا «فَوری» کَلو اِستِفاده مُونه تا دَ مَوضوعِ اَصلی که دَ صلِیب میخکوب شُدو و دُوباره زِنده شُدونِ عیسیٰ مسیح اَسته، بِرَسه.
دَ امزی اِنجِیل عیسیٰ کَلو وختا مردُم ره نَمیله که دَ بارِه شی خبر تِیت کُنه؛ امزی خاطر مَرقَس میخایه که مُعجزه_های شفا دَدو و تعلِیم_های عیسیٰ مسیح ره خانِنده_ها دَ روشَنی «دَ صلِیب میخکوب شُدو» و «دُوباره زِنده شُدونِ عیسیٰ مسیح» پَی بُبره.
عالِما دَزی باوَر اَسته که مَرقَس اِی اِنجِیل ره بَلدِه مسِیحیای غَیرِ یهُود نوِشته کده، چُون مَرقَس دَ امزی اِنجِیل بعضی رسم و رَواجِ یهُودیا ره بطَورِ خاص بیان مُونه.
طبقه-بَندی مَوضوع_ها
یحییٰ و غُسلِ تعمِید عیسیٰ مسیح (فصلِ ۱)
کار_ها و تعلِیمِ عیسیٰ مسیح دَ جلِیلیه (فصلِ ۱-۹)
عیسیٰ مسیح دَ اُو لبِ دریای اُردُن (فصلِ ۱۰)
عیسیٰ مسیح پس دَ اورُشَلیم موره (فصلِ ۱۱)
هفتِه آخِرِ عیسیٰ مسیح دَ رُوی زمی و مَرگ و دَفن شُدون شی (فصلِ ۱۱-۱۵)
دُوباره زِنده شُدونِ عیسیٰ مسیح (فصلِ ۱۶)