فصلِ بِیست و هشتُم
دُوباره زِنده شُدونِ عیسیٰ
1 بعد از روزِ آرام، دَ وختِ روز واز شُدو دَ روزِ یگشَمبِه،a مریَمِ مَجدَلیه و امُو مریَمِ دِیگه بَلدِه دِیدونِ قبر رفت 2 و دَ اُونجی بےبلغه یگ زِلزِله شَدِید شُد، چُون یگ ملایکِه خُداوند از آسمو نازِل شُده اَمَد و سنگ ره از دانِ قبر لول دَده دَ بَلِه شی شِشت. 3 چِهرِه شی رقمِ آتِشکِ گُرگُردراغ بُود و کالای شی رقمِ بَرف وَری سفید. 4 از ترسِ ازُو پَیرَدارا دَ لَرزه اَمَد و رقمِ مُرده جور شُد. 5 مگم ملایکه دَ خاتُونو گُفت: ”شُمو ترس نَخورِید، چُون ما مِیدَنُم که شُمو عیسیٰ ره مُوپالِید، کسی ره که دَ صلِیب میخکوب شُد. 6 اُو دَ اِینجی نِیَسته. اُو دُوباره زِنده شُده، امُو رقم که اُو گُفتُد. بیِید، جایی ره که اُو خاو بُود، توخ کُنِید 7 و زُود رفته دَ یارای شی بُگِید که اُو از مُرده_ها دُوباره زِنده شُده و از شُمو کده پیش دَ جلِیلیه موره و شُمو اُو ره دَ اُونجی مِینگرِید. اینه، ما دَز شُمو گُفتُم.“
8 اوخته خاتُونو دَ عَجَله قد ترس و خوشی کَلو از قبر رَیی شُد و دَوِیده رفت تا دَ یارای شی خبر بِدیه. 9 بےبلغه عیسیٰ قد ازوا رُوی دَ رُوی شُد و گُفت: ”سلام.“ و خاتُونو پیش اَمَده دَ پایای ازُو اُفتَد و اُو ره سَجده کد. 10 اوخته عیسیٰ دَزوا گُفت: ”ترس نَخورِید. بورِید و دَ بِرارون مه بُگِید که دَ جلِیلیه بوره؛ دَ اُونجی اُونا مَره مِینگره.“
رِشوَت دَدو دَ پَیره‌دارا
11 دَ حالِیکه خاتُونو مورفت، بعضی از پَیرَدارا دَ شار رفت و تمامِ چِیزای ره که رُخ دَده بُود، دَ پیشوایونِ عالی مقام نقل کد. 12 بعد ازی که پیشوایونِ عالی مقام قد رِیش سفیدا جم شُده دَ بَین خُو مشوَره کد، اُونا یگ مِقدار پَیسه بَلدِه پَیرَدارا دَد 13 و گُفت: ”شُمو بُگِید که ’یارای شی دَ وختِ شاو اَمَده اُو ره دُزی کد دَ غَیتِیکه مو خاو بُودی.‘ 14 و اگه اِی توره دَ گوشِ والی رسِید، مو اُو ره راضی مُونی و شُمو ره از جنجال دُور نِگاه مُونی.“ 15 پس اُونا پَیسه ره گِرِفت و امُو رقم که بَلدِه ازوا گُفته شُدُد، امُو رقم کد. اِی قِصّه تا اِمروز دَ بَینِ یهُودیا گُفته مُوشه.
وظِیفِه بُزُرگ
16 اوخته یازده یار دَ جلِیلیه دَ امزُو کوه رفت که عیسیٰ بَلدِه ازوا هِدایَت دَده بُود. 17 وختِیکه اُونا عیسیٰ ره دِید، اُو ره پرستِش کد. مگم بعضی_های شی شک کد. 18 اوخته عیسیٰ پیش اَمَد و قد ازوا گپ زَده گُفت: ”تمامِ اِختیار-و-قُدرت دَ آسمو و دَ رُوی زمی دَز مه دَده شُده. 19 پس بورِید و تمامِ مِلَّت_ها ره پَیرَو جور کده اُونا ره دَ نامِ آته و باچه و روح اُلقُدس غُسلِ تعمِید بِدِید 20 و دَزوا تعلِیم بِدِید تا از تمامِ چِیزای که دَز شُمو اَمر کدُم اِطاعَت کُنه. و بِدَنِید که ما همیشه قد شُمو اَستُم، تا آخِر زمان.“