اِنجِیلِ عیسیٰ مسیح دَ مُطابِقِ لُوقا
پیشگُفتار
اِنجِیلِ عیسیٰ مسیح مُطابِقِ لُوقا کَلو دَ تفصِیل نوِشته شُده. لُوقا دَ امزی اِنجِیل عالی‌جناب تیوفِیلُس ره مخاطِب قرار دَده دَ بارِه زِندگی عیسیٰ مسیح دَ تفصِیل توره مُوگیه. کَلو دانِشمَندا دَزی عقِیده اَسته که تیوفِیلُس یگ شخصِ بِلند رُتبِه رُومی بُوده. هَدَفِ لُوقا از نوِشته کدونِ امزی کِتاب تشوِیق کدونِ تیوفِیلُس و دوستای ایماندار شی اَسته تا اُونا دَ ایمان خُو اُستوار و مُستَحکم بُمنه. دَمزی اِنجِیل لُوقا نِشو مِیدیه که خِدمتِ عیسیٰ مسیح بخاطرِ پُوره شُدونِ وعده و مُحَبَتِ خُدا بَلدِه قَوم شی بُوده. لُوقا عیسیٰ ره نِجات دِهِندِه معرفی مُونه که خُدا وعدِه اَمدونِ شی ره دَده بُود و اُو باعِثِ نِجاتِ بَنی اِسرائیل و باقی مردُمِ دُنیا مُوشُد. امچُنان دَمزی اِنجِیل مُعجزه_ها، مَثَل_ها و تعلِیمای عیسیٰ مسیح غَدر کَلو دِیده مُوشه نِسبَت دَ دِیگه اِنجِیل_ها. بطَورِ نَمُونه مَثلِ «باچه گُم شُده» یکی از مَثَل_های مشهُورِ امزی اِنجِیل اَسته که هر ایماندارِ عیسیٰ مسیح اُو ره دَ حافِظِه خُو دَره. خانِنده_ها بعد از خاندونِ امزی کِتاب مِیتَنه پَی بُبره که تمامِ واقِعه_های که پیش از ظهُورِ عیسیٰ مسیح و بعد از ظهُور شی رُخ دَد مُطابِقِ اِرادِه خُدا بُود و هر واقِعه دقِیق دَ وختِ مُعیَن خُو رُخ دَد.
دَ مینکلِ بَخش_های عهدِ جدِید دُو کِتاب نوِشتِه لُوقا اَسته: اِنجِیلِ عیسیٰ مسیح و اعمالِ رسُولا. کِتابِ اوّلِ لُوقا اِنجِیل نام دَره که دَ بارِه زِندگی، خِدمت، مَرگ و دُوباره زِنده شُدونِ عیسیٰ مسیح اَسته و کِتابِ دوّم شی اعمالِ رسُولا نام دَره که دَ باره خِدمتِ یارا و ایماندارای عیسیٰ مسیح اَسته که اُونا چی رقم خوشخبری ره دَ مینکلِ مردُم یهُود و غَیرِ یهُود اِعلان کد. ادبیاتی که دَمزی دُو کِتاب دَ کار رفته عام-فام و رَوان اَسته. امزی خاطر خاندو و فامِیدون شی بَلدِه هر کس کَلو آسو یَه.
طبقه-بَندی مَوضوع_ها
مقصدِ لُوقا از نوِشته کدونِ زِندگی نامِه عیسیٰ مسیح (فصلِ ۱)
تَوَلُدِ یحییٰ و عیسیٰ مسیح (فصلِ ۲)
پَیغامِ یحییٰ و غُسلِ تعمِیدِ عیسیٰ مسیح (فصلِ ۲-۳)
مُعجزه_ها و تعلِیمِ عیسیٰ مسیح دَ منطقِه جلِیلیه (فصلِ ۴-۹)
سَفر سُون اورُشَلیم (فصلِ ۹-۱۹)
هفتِه آخِرِ عیسیٰ مسیح دَ رُوی زمی و مَرگ و دَفن شُدون شی (فصلِ ۱۹-۲۳)
دُوباره زِنده شُدونِ عیسیٰ مسیح (فصلِ ۲۴)