فصلِ بِیست و سِوّم
تورای آخرِ داوُود
1 اینَمیا تورای آخرِ داوُود اَسته:
”وَحی داوُود باچِه یسّی،
وَحی مَردی که بِلند مَرتبه شُد،
وَحی مَسَح شُدِه خُدای یعقُوب
و سرُودخانِ مَورِدِ پِسَندِ اِسرائیل؛
2 روحِ خُداوند از طرِیقِ ازمه توره مُوگیه
و کلامِ ازُو دَ سرِ زِبون مه اَسته.
3 خُدای اِسرائیل توره گُفت،
قادِه-و-پناهگاهِ اِسرائیل دَز مه گُفت:
’کسی که دَ بَلِه مردُم عادِلانه حُکمرانی کنه
و دَ خُدا-ترسی پادشاهی کنه،
4 اُو رقمِ روشَنی صُبح اَسته،
رقمِ آفتَوی که دَ یگ صُبحِ بےآوُر بُر مُوشه،
رقمِ روشَنی بعد از بارو
که علف ره از زمی سَوزدلجی مُونه.‘
5 آیا خانَوار مه دَ حُضُورِ خُداوند امی رقم نِییه؟
چُون اُو قد ازمه عهدِ اَبَدی بسته کده
که از هر نِگاه با ترتِیب و مُستَحکم اَسته.
آیا اُو باعِث نَمُوشه که تمامِ کامیابی مه
و تمامِ آرزوهای مه دَ ثَمر بِرَسه؟
6 لیکِن آدمای شرِیر-و-بَدکار رقمِ خار های اَسته که دُور اَندخته مُوشه،
چراکه اُونا قد دِست گِرِفته نَمُوشه.
7 کسی که میخایه دَزوا دِست بِزَنه،
باید یگ اَسبابِ آینی یا یگ چیوِ نَیزه ره اِستِفاده کنه.
اُونا دَ امُونجی که اَسته دَ امُونجی سوختَنده مُوشه.“
نفرای جنگی داوُود
8 نام ھای مَردای دلیر-و-جنگی داوُود اینیا اَسته: یوشیب-بَشِبتِ تَحکِمونی که سرکردِه قومَندانا بُود، اُو نَیزِه خُو ره دَ خِلافِ هشت صد نفر باله کد و اُونا ره دَ یگ زمان کُشت.
9 بعد ازُو اِلعازار باچِه دودو نوسِه اَخوخی بُود. وختِیکه داوُود فَلَسطِینیای ره که دَ اُونجی بَلدِه جنگ جَم شُدُد دَ مُبارِزه طلب کد، اِلعازار یکی امزُو سِه نفرِ دلیر-و-جنگی بُود که قد داوُود قتی اَمَدُد. مَردای اِسرائیل عَقَب نِشِینی کد، 10 لیکِن اِلعازار ایسته شُده قد فَلَسطِینیا جنگ کد تا غَیتِیکه دِست شی مَنده شُد و شمشیر دَ دِست شی چسپِید. خُداوند دَ امزُو روز یگ پیروزی کٹه نصِیبِ ازوا کد. اوخته لشکر دُوباره دَ پیشِ ازُو اَمَد، لیکِن فقط بخاطرِ لُچ کدونِ کُشته شُده‌ها.
11 بعد ازُو شَمّه باچِه اَگے هَراری بُود. وختِیکه فَلَسطِینیا دَ لِحی جم شُد، دَ جای که یگ پَٹی زمی پُر از عَدَس بُود؛ لشکرِ اِسرائیل از پیشِ فَلَسطِینیا دُوتا کد، 12 لیکِن شَمّه دَ مینکلِ امزُو پَٹی زمی ایسته شُده اُو ره نِگاه کد و فَلَسطِینیا ره شِکست دَد. دَ امزی رقم خُداوند یگ پیروزی کٹه نصِیبِ ازوا کد.
13 دَ دَورونِ جم کدون حاصِلات سِه قومَندان از جُملِه سی قومَندان تاه شُده دَ غارِ عَدُلام دَ پیشِ داوُود اَمَد؛ دَ امزُو غَیت یگ لشکرِ فَلَسطِینیا دَ دَرِّه رِفائیم خَیمه زَدُد. 14 داوُود دَ اُو زَمان دَ پناهگاهِ خُو بُود و پَیره‌دارخانِه فَلَسطِینیا دَ بَیت-لَحَم قرار دَشت. 15 داوُود هَوَس کده گُفت: ”کشکِه یَگو کس از چاهی که دَ نزدِیکِ درگِه بَیت-لَحَم اَسته دَز مه آو بیره تا وُچی کنُم.“ 16 اوخته امُو سِه نفرِ دلیر-و-جنگی لشکرِ فَلَسطِینیا ره از مینکل شی شَق کده از چاهی که دَ نزدِیکِ درگِه بَیت-لَحَم بُود آو کشِید و گِرِفته دَ پیشِ داوُود اَوُرد؛ لیکِن داوُود آو ره وُچی نَکد، بَلکِه اُو ره دَ عِنوانِ هدیه بَلدِه خُداوند لَوُو کد 17 و گُفت: ”اَی خُداوند، از مه دُور بَشه که اِی کار کنُم! آیا اِی خُونِ امزی مَردای نِییه که جان خُو ره دَ خطر اَندخته رفتُد؟“ امزی خاطر اُو نَخاست که آو ره وُچی کنه. امی کارای بُود که امُو سِه نفرِ دلیر-و-جنگی انجام دَدُد.
18 اَبِیشای بِرارِ یوآب باچِه صَرُویه سرکردِه امزُو قومَندانا بُود.a اُو قد نَیزِه خُو دَ خِلافِ سِه صد نفر جنگ کده اُونا ره کُشت و رقمِ امزُو سِه نامتُو شُد.b 19 اُو نامتُوتَرِینِ امزُو سِه بُود و قومَندانِ ازوا شُد، لیکِن دَ سِه نفرِ اوّل نَمِیرَسِید.
20 بِنایا باچِه یهویاداع یگ مَردِ دلیر از قَبصئیل بُود که کارای کٹه کدُد؛ اُو دُو باچِه اَرِیئیلِ موآبی ره کُشت و دَ یگ روزِ بَرفی دَ یگ چُقُوری تاه شُده یگ شیر ره از بَین بُرد. 21 اُو یگ مَردِ خوش-اَندامِ مِصری ره ام کُشت. امُو مَردِ مِصری دَ دِست خُو یگ نَیزه دَشت، ولے بِنایا قد یگ سوٹه-چیو دَ جنگ ازُو رفت و نَیزه ره از دِستِ امزُو مِصری گِرِفته اُو ره قد نَیزِه خود شی کُشت. 22 امی کارای بُود که بِنایا باچِه یهویاداع انجام دَد و رقمِ امزُو سِه نفرِ دلیر-و-جنگی نامتُو شُد. 23 اُو دَ مینکلِ امزُو سی نفرِ نامتُو صاحِبِ اِحترام شُد، لیکِن دَ سِه نفرِ اوّل نَمِیرَسِید و داوُود اُو ره قومَندانِ مُحافِظِین خُو مُقرَر کد.
24 اینی کسا شامِلِ امزُو سی نفر بُود:
عَسائیل بِرارِ یوآب،
اِلحانان باچِه دودوی بَیت-لَحَمی،
25 شَمِّه حَرودی،
اِلیقای حَرودی،
26 حالَصِ فَلطی،
عِیرا باچِه عِقیشِ تِقوعی،
27 اَبِیعِزرِ عَناتوتی،
مِبونای حوشاتی،
28 صَلمونِ اَخوخی،
مِهرای نِطوفاتی،
29 حالب باچِه بعنِه نِطوفاتی،
اِتای باچِه ریبای از جِبعِه بِنیامِین،
30 بِنایای پِرعاتونی،
هِدّای از تَنگی های جاعَش،
31 اَبوعلبونِ عَرباتی،
عزماوِتِ بَرحومی،
32 الیَحبای شَعلبونی یکی از باچه‌گونِ یاشَن،
اَخیام باچِه شاررِ ھَراری،
34 اِلیفِلِط باچِه اَحَسبای مَعکاتی،
اِلیعام باچِه اَخِیتوفِل جِیلونی،
35 حِصرای کَرمَلی،
پَعرای اَربی،
36 یگال باچِه ناتان از صوبه،
بانی جادی،
37 صالِقِ عمونی،
نَحرای بئیروتی سلاح-بَردارِ یوآب باچِه صَرُویه،
38 عِیرای یَتری،
گارِبِ یَتری
39 و اوریای حِتی.
جُمله سی و ھفت نفر.