فصلِ نوزدَهُم
تقسِیمِ طایفِه شِمعون
1 پِشکِ دوّم بَلدِه شِمعون بُر شُد، یعنی بَلدِه طایفِه اَولادِه شِمعون دَ مُطابِقِ اَولادِ بابه های ازوا. تقسِیمِ ازوا دَ مینکلِ مُلکِ اَولادِه یهُودا رَسِید. 2 و اینی جایا شامِلِ مُلک ازوا شُد: بِئیر-شِبَع، یعنی شِبَع، مولادہ، 3 حَصَر-شُوعال، بالَح، عِصِم، 4 اِلتولَد، بِتُول، حُرمه، 5 صِقلَگ، بَیت مَرکَبوت، حَصَر-سُوسه، 6 بَیت-لِباعوت و شارُوحِن. سیزده شار قد آغِیلای شی. 7 عین، رِمّون، عاتر و عاشان. چار شار قد آغِیلای شی؛ 8 و پگِ آغِیلای دِیگه که دَ گِرد-و-بَرِ امزی شارا تا بَعلَت-بِئیر بُود، یعنی تا رامِه جنُوبی. اِی بُود مُلکِ طایفِه اَولادِه شِمعون دَ مُطابِقِ اَولادِ بابه های ازوا. 9 تقسِیمِ اَولادِه شِمعون از مُلکِ اَولادِه یهُودا گِرِفته شُد، چُون مُلکِ اَولادِه یهُودا بَلدِه ازوا غَدر کَلو بُود. پس اَولادِه شِمعون تقسِیمِ خُو ره دَ مینکلِ مُلکِ ازوا گِرِفت.
تقسِیمِ طایفِه زِبُولُون
10 پِشکِ سِوّم بَلدِه اَولادِه زِبُولُون دَ مُطابِقِ اَولادِ بابه های ازوا بُر شُد. سرحدِ مُلکِ ازوا تا سارِید مِیرَسِید. 11 سرحدِ ازوا طرفِ غَرب تا مَرعَله باله مورفت و دَ دباشِت گٹ شُده تا درِّه که رُوی دَ رُوی یُقنعام اَسته، مِیرَسِید. 12 و از سارِید سُون آفتَو بُرشُد طرفِ شَرق دَور مُوخورد و تا سرحدِ کِسلوت-تابور مورفت و دَ دابرَت رفته تا یافیَع مِیرَسِید. 13 ازُونجی طرفِ شَرق تا جَت-حِفِر و عِت-قاصِین تیر شُده دَ رِمّون مورفت و سُون نیعه دَور مُوخورد. 14 بعد ازُو سرحد دَ شمال دَوره زَده تا حناتون مورفت و دَ درِّه یِفتَح-ئیل خَتم مُوشُد. 15 قَطه، نَھَلال، شِمرون، یدَله و بَیت-لَحَم ام مربُوطِ ازوا مُوشُد. دوازده شار قد آغِیلای شی. 16 اِی بُود مُلکِ اَولادِه زِبُولُون دَ مُطابِقِ اَولادِ بابه های ازوا، شارا و آغِیلای شی.
تقسِیمِ یسّاکار
17 پِشکِ چارُم بَلدِه یسّاکار بُر شُد، یعنی بَلدِه اَولادِه یسّاکار دَ مُطابِقِ اَولادِ بابه های ازوا. 18 اینی شارا شامِلِ سرزمِینِ ازوا مُوشُد: یِزرعیل، کِسلوت، شُونِم، 19 حَفارایم، شیئون، اَناحَرَت، 20 رَبِیت، قِشیون، آبِص، 21 رِمِت، عین-گنِّیم، عین-حَدہ و بَیت-فَصیص. 22 سرحدِ ازوا دَ کوهِ تابور، شَحَصِیمه و بَیت-شَمس مِیرَسِید و دَ دریای اُردُن خَتم مُوشُد. شونزده شار قد آغِیلای شی. 23 اِی بُود مُلکِ طایفِه اَولادِه یسّاکار دَ مُطابِقِ اَولادِ بابه های ازوا، شارا و آغِیلای شی.
تقسِیمِ طایفِه اَشِیر
24 پِشکِ پنجُم بَلدِه طایفِه اَولادِه اَشِیر دَ مُطابِقِ اَولادِ بابه های ازوا بُر شُد. 25 اینی شارا شامِلِ سرزمِینِ ازوا مُوشُد: حِلقَت، حَلی، بِطِن، اَخشاف، 26 اَلمَلِک، عَمعاد و مِشال. سرحدِ ازوا طرفِ غَرب دَ کوهِ کَرمَل و شِیحور لِبنه مِیرَسِید. 27 بعد ازُو طرفِ شَرق دَور خورده دَ بَیت-داگون مورفت و دَ زِبُولُون و دَرِّه یِفتَح-ئیل گٹ شُده سُون شمال تا بَیت-عِمیق و نِعِیئیل مِیرَسِید؛ ازُونجی طرفِ چَپ اِدامه پَیدا کده دَ کابُول، 28 عَبدون،a رِحوب، حَمون و قانه مورفت تا صَیدونِ بُزُرگ. 29 بعد ازُو سرحد سُون رامه دَور خورده دَ شارِ دیوالدارِ صُور مِیرَسِید و ازُونجی طرفِ حوصه دَور مُوخورد و آخِر شی دَ پالُوی دریای کٹه دَ منطقِه اَخزِیب، 30 عُمه، اَفیق و رِحوب مِیرَسِید. بِیست و دُو شار قد آغِیلای شی. 31 اِی بُود مُلکِ طایفِه اَولادِه اَشِیر دَ مُطابِقِ اَولادِ بابه های ازوا، شارا و آغِیلای شی.
تقسِیمِ طایفِه نَفتالی
32 پِشکِ شَشُم بَلدِه نَفتالی بُر شُد، یعنی بَلدِه اَولادِه نَفتالی دَ مُطابِقِ اَولادِ بابه های ازوا. 33 سرحدِ ازوا از حِلِف، از دِرختِ بَلُوطی که دَ صَعنِیم اَسته شُروع مُوشُد و دَ اَدامی-نِقِب و یَبنئیل اِدامه پَیدا کده تا لَقُوم مِیرَسِید و دَ دریای اُردُن خَتم مُوشُد. 34 بعد ازُو اِی سرحد سُون غَرب دَ اَزنوت-تابور دَور مُوخورد و ازُونجی دَ حُقوق رفته دَ جنُوب قد زِبُولُون، دَ غَرب قد اَشِیر و دَ شَرق قد شارِ یهُود دَ نزدِیکِ دریای اُردُن گٹ مُوشُد. 35 شارای دیوالدارِ ازوا صِدِیم، صیر، حَمَت، رَقَت، کِنِرِت، 36 اَدامه، رامه، حاصور، 37 قادِش، اِدرعَی، عین-حاصور، 38 یرون، مِگدَل-ئیل، حوریم، بَیت-عَنات و بَیت-شَمس بُود. نوزدہ شار قد آغِیلای شی. 39 اِی بُود مُلکِ طایفِه اَولادِه نَفتالی دَ مُطابِقِ اَولادِ بابه های ازوا، شارا و آغِیلای شی.
تقسِیمِ طایفِه دان
40 پِشکِ ھفتُم بَلدِه طایفِه اَولادِه دان دَ مُطابِقِ اَولادِ بابه های ازوا بُر شُد. 41 اینی شارا شامِلِ سرزمِینِ ازوا مُوشُد: صُرعه، اِشتائول، عِیر-شَمس، 42 شعَلَبِین، اَیالون، یتله، 43 ایلون، تِمنه، عِقرون، 44 اِلتقیه، گِبِتون، بَعله، 45 یهُود، بَنی-بِرَق، جَت-رِمّون، 46 میاہ-یَرقون و رَقون قد سرحدی که رُوی دَ رُوی یافا اَسته. 47 وختِیکه اَولادِه دان مُلک خُو ره دَ دِست اَوُرده نَتنِست، اُونا رفته قد لِشِم جنگ کد و اُو ره گِرِفت. اُونا اُو ره قد دَمِ شمشیر زَده تَصَرُف کد و دَز شی جای-دَ-جای شُد و لِشِم ره دان نام کد، مُطابِقِ نامِ دان که بابه‌کَلونِ ازوا بُود. 48 اِی بُود مُلکِ طایفِه اَولادِه دان دَ مُطابِقِ اَولادِ بابه های ازوا، شارا و آغِیلای شی.
تقسِیمِ یوشِع
49 وختِیکه اُونا زمی ره دَ مُطابِقِ حِصّه های شی تقسِیم کده فارِغ شُد، بَنی اِسرائیل دَ مینکل خُو یگ تقسِیم دَ یوشِع باچِه نُون دَد. 50 دَ مُطابِقِ اَمرِ خُداوند، اُونا امُو شار ره که اُو طلب کد، یعنی تِمنه-سارَح ره دَ کوهِستونِ اِفرایم دَزُو دَد. یوشِع امُو شار ره آباد کد و دَز شی جای-دَ-جای شُد.
51 اینَمیا جای های بُود که اِلعازار پیشوا قد یوشِع باچِه نُون و کٹه‌کَلونای طایفه های بَنی اِسرائیل دَ شِیلوه دَ حُضُورِ خُداوند دَ دانِ درگِه خَیمِه مُلاقات دَ وسِیلِه پِشک تقسِیم کد. دَ امزی رقم اُونا تقسِیم کدونِ زمی ره تکمِیل کد.