فصلِ شوزدَهُم
تقسِیمِ اَولادِه یوسُف
1 مُلکِ اَولادِه یوسُف از دریای اُردُن از بَغلِ اَریحا، از شرقِ آوهای اَریحا شُروع شُده دَ بیابو مورفت و از اُونجی باله رفته دَ کوهِستونِ بَیت-ئیل مِیرَسِید؛ 2 و از بَیت-ئیل دَ لُوزa رفته از منطقِه اَرکیا دَ عَطاروت تیر مُوشُد. 3 بعد ازُو سُون غَرب دَ سرحدِ یفلیطیا تاه مورفت و تا بَغلِ بَیت-حورونِ تَینه و تا جازر مِیرَسِید و دَ دریای کٹه خَتم مُوشُد.
4 دَ امزی تَرتِیب اَولادِه یوسُف، یعنی مَنَسّی و اِفرایم مُلک خُو ره گِرِفت.
5 مُلکِ طایفِه اِفرایم دَ مُطابِقِ اَولادِ بابه های شی ازی قرار بُود: سرحدِ مُلکِ ازوا طرفِ شَرق از عَطاروت-اَدّار تا بَیت-حورونِ بالنه مورفت 6 و اِی سرحد ازُونجی سُون دریای کٹه تا مِکمِتَت دَ شمال اِدامه پَیدا مُوکد. بعد ازُو طرفِ شَرق سُون تانَت-شِیلوه دَور مُوخورد و ازُو تیر شُده دَ شَرق دَ یانوَح مِیرَسِید. 7 و از یانوَح دَ عَطاروت و نَعَره تاه رفته دَ اَریحا مِیرَسِید و دَ دریای اُردُن خَتم مُوشُد. 8 اِی سرحد از تپُوَح سُون غَرب تا درِّه قانه مورفت و دَ دریای کٹه خَتم مُوشُد. اِی بُود مُلکِ طایفِه اَولادِه اِفرایم دَ مُطابِقِ اَولادِ بابه های ازوا؛ 9 علاوه ازی چندِین شار ام بَلدِه اَولادِه اِفرایم دَ مینکلِ مُلکِ اَولادِه مَنَسّی جدا شُدُد، پگِ امزُو شارا و آغِیلای شی. 10 اُونا کِنعانی های ره که دَ جازر زِندگی مُوکد، هَی نَکد. پس امُو کِنعانیا تا اِمروز دَ مینکلِ طایفِه اِفرایم زِندگی مُونه، لیکِن اُونا وادار شُده که جَبری کار کُنه.