عدَد‌ها 29

قُربانی های عِیدِ شیپُور ها

دَ روزِ اوّلِ ماهِ ھفتُم، یگ مجلِشِ مُقَدَّس برگُزار کُنِید و هیچ کارِ روزمرِه خُو ره انجام نَدِید. اُو بَلدِه شُمو یگ روز اَسته که صَدای شیپُورها ره بَلدِه خوشی بُر کُنِید. ‏2 شُمو یگ قُربانی سوختَنی دَ عِنوانِ خوشبُوی مَورِدِ پِسَندِ خُداوند تقدِیم کُنِید؛ اِی قُربانی باید یگ جونه‌گاو، یگ قُوچ و هفت نَربَرِه یگ ساله و بےعَیب بَشه. ‏3 هدیِه غَلّه-و-دانِه ازوا باید سِه حِصّه از دَه حِصِّه یگ ایفه بِهترِین آردِ روغو گٹ شُده بَلدِه ھر گاو و دُو حِصّه از دَه حِصِّه یگ ایفه بَلدِه قُوچ ‏4 و دَهُم حِصِّه یگ ایفه بَلدِه ھر کُدَمِ امزُو هفت نَربَره بَشه. ‏5 یگ ٹَکه ام دَ عِنوانِ قُربانی گُناه تقدِیم کُنِید تا بَلدِه شُمو کِفاره شُنه. ‏6 اَمیا علاوه از قُربانی سوختَنی اوّلِ ماه و هدیِه غَلّه-و-دانِه شی، و علاوه از قُربانی سوختَنی دایمی و هدیِه غَلّه-و-دانِه شی و هدیِه وُچی کدَنی ازوا اَسته که دَ مُطابِقِ مُقرَراتِ ازوا دَ عِنوانِ هدیِه خاص و خوشبُوی مَورِدِ پِسَندِ خُداوند تقدِیم مُوشه.

قُربانی روزِ کِفاره

‏7 دَ روزِ دَھُمِ امزی ماهِ ھفتُم، شُمو یگ مجلِسِ مُقَدَّس برگُزار کُنِید و نفس های خُو ره بُکُشِید. شُمو باید هیچ کار ره انجام نَدِید؛ ‏8 بَلکِه یگ قُربانی سوختَنی دَ عِنوانِ خوشبُوی مَورِدِ پِسَندِ خُداوند تقدِیم کُنِید. اِی قُربانی باید یگ جونه‌گاو، یگ قُوچ و هفت نَربَرِه یگ ساله بَشه. مُتَوَجِه بَشِید که اُونا بےعَیب بَشه. ‏9 هدیِه غَلّه-و-دانِه ازوا باید سِه حِصّه از دَه حِصِّه یگ ایفه بِهترِین آردِ روغو گٹ شُده بَلدِه ھر گاو و دُو حِصّه از دَه حِصِّه یگ ایفه بَلدِه قُوچ ‏10 و دَهُم حِصِّه یگ ایفه بَلدِه ھر کُدَمِ امزُو هفت باره بَشه. ‏11 یگ ٹَکه ام دَ عِنوانِ قُربانی گُناه تقدِیم کُنِید، علاوه از قُربانی گُناه که بَلدِه کِفاره تقدِیم مُوشه و علاوه از قُربانی سوختَنی دایمی و هدیِه غَلّه-و-دانِه شی و هدیه های وُچی کدَنی ازوا.

قُربانی های عِیدِ چَپری ها

‏12 دَ روزِ پوزدَھُمِ ماهِ ھفتُم، باید یگ جلسِه مُقَدَّس برگُزار کُنِید و هیچ کارِ روزمرِه خُو ره انجام نَدِید، بَلکِه هفت روز ره بَلدِه خُداوند عِید بِگِیرِید. ‏13 دَ امزُو روزا قُربانی سوختَنی دَ عِنوانِ خوشبُوی مَورِدِ پِسَندِ خُداوند تقدِیم کُنِید. دَ روزِ اوّل سیزده جونه‌گاو، دُو قُوچ و چارده نَربَرِه یگ ساله بَشه و پگ شی بےعَیب. ‏14 هدیِه غَلّه-و-دانِه ازوا باید سِه حِصّه از دَه حِصِّه یگ ایفه بِهترِین آردِ روغو گٹ شُده بَلدِه ھر کُدَمِ امزُو سیزده گاو و دُو حِصّه از دَه حِصِّه یگ ایفه بَلدِه هر کُدَمِ امزُو دُو قُوچ ‏15 و دَهُم حِصِّه یگ ایفه بَلدِه ھر کُدَمِ امزُو چارده باره بَشه. ‏16 یگ ٹَکه ام دَ عِنوانِ قُربانی گُناه تقدِیم کُنِید، علاوه از قُربانی سوختَنی دایمی و هدیِه غَلّه-و-دانِه شی و هدیِه وُچی کدَنی ازُو.

‏17 دَ روزِ دوّم، دوازده جونه‌گاو، دُو قُوچ و چارده نَربَرِه یگ ساله بَشه، پگ شی بےعَیب. ‏18 هدیه های غَلّه-و-دانه و هدیه های وُچی کدَنی ازوا بَلدِه گاو ها، قُوچ ها و باره‌گو نظر دَ تعدادِ ازوا طِبقِ مُقرَرات بَشه. ‏19 یگ ٹَکه ام دَ عِنوانِ قُربانی گُناه تقدِیم کُنِید، علاوه از قُربانی سوختَنی دایمی و هدیِه غَلّه-و-دانِه شی و هدیه های وُچی کدَنی ازوا.

‏20 دَ روزِ سِوّم، یازده جونه‌گاو، دُو قُوچ و چارده نَربَرِه یگ ساله بَشه، پگ شی بےعَیب. ‏21 هدیه های غَلّه-و-دانه و هدیه های وُچی کدَنی ازوا بَلدِه گاو ها، قُوچ ها و باره‌گو نظر دَ تعدادِ ازوا طِبقِ مُقرَرات بَشه. ‏22 یگ ٹَکه ام دَ عِنوانِ قُربانی گُناه تقدِیم کُنِید، علاوه از قُربانی سوختَنی دایمی و هدیِه غَلّه-و-دانِه شی و هدیِه وُچی کدَنی ازُو.

‏23 دَ روزِ چارُم، دَه جونه‌گاو، دُو قُوچ و چارده نَربَرِه یگ ساله بَشه، پگ شی بےعَیب. ‏24 هدیه های غَلّه-و-دانه و هدیه های وُچی کدَنی ازوا بَلدِه گاو ها، قُوچ ها و باره‌گو نظر دَ تعدادِ ازوا طِبقِ مُقرَرات بَشه. ‏25 یگ ٹَکه ام دَ عِنوانِ قُربانی گُناه تقدِیم کُنِید، علاوه از قُربانی سوختَنی دایمی و هدیِه غَلّه-و-دانِه شی و هدیِه وُچی کدَنی ازُو.

‏26 دَ روزِ پنجُم، نُه جونه‌گاو، دُو قُوچ و چارده نَربَرِه یگ ساله بَشه، پگ شی بےعَیب. ‏27 هدیه های غَلّه-و-دانه و هدیه های وُچی کدَنی ازوا بَلدِه گاو ها، قُوچ ها و باره‌گو نظر دَ تعدادِ ازوا طِبقِ مُقرَرات بَشه. ‏28 یگ ٹَکه ام دَ عِنوانِ قُربانی گُناه تقدِیم کُنِید، علاوه از قُربانی سوختَنی دایمی و هدیِه غَلّه-و-دانِه شی و هدیِه وُچی کدَنی ازُو.

‏29 دَ روزِ شَشُم، هشت جونه‌گاو، دُو قُوچ و چارده نَربَرِه یگ ساله بَشه، پگ شی بےعَیب. ‏30 هدیه های غَلّه-و-دانه و هدیه های وُچی کدَنی ازوا بَلدِه گاو ها، قُوچ ها و باره‌گو نظر دَ تعدادِ ازوا طِبقِ مُقرَرات بَشه. ‏31 یگ ٹَکه ام دَ عِنوانِ قُربانی گُناه تقدِیم کُنِید، علاوه از قُربانی سوختَنی دایمی و هدیِه غَلّه-و-دانِه شی و هدیِه وُچی کدَنی ازُو.

‏32 دَ روزِ ھفتُم، ھفت جونه‌گاو، دُو قُوچ و چارده نَربَرِه یگ ساله بَشه، پگ شی بےعَیب. ‏33 هدیه های غَلّه-و-دانه و هدیه های وُچی کدَنی ازوا بَلدِه گاو ها، قُوچ ها و باره‌گو نظر دَ تعدادِ ازوا طِبقِ مُقرَرات بَشه. ‏34 یگ ٹَکه ام دَ عِنوانِ قُربانی گُناه تقدِیم کُنِید، علاوه از قُربانی سوختَنی دایمی و هدیِه غَلّه-و-دانِه شی و هدیِه وُچی کدَنی ازُو.

‏35 روزِ ھشتُم بَلدِه شُمو خَتمِ عِید اَسته؛ دَمزُو روز هیچ کارِ روزمرِه خُو ره انجام نَدِید، ‏36 بَلکِه یگ قُربانی سوختَنی دَ عِنوانِ خوشبُوی مَورِدِ پِسَندِ خُداوند تقدِیم کُنِید. اُو قُربانی باید یگ جونه‌گاو، یگ قُوچ و هفت نَربَرِه یگ ساله بَشه، پگ شی بےعَیب. ‏37 هدیه های غَلّه-و-دانه و هدیه های وُچی کدَنی ازوا بَلدِه گاو، قُوچ و باره‌گو نظر دَ تعدادِ ازوا طِبقِ مُقرَرات بَشه. ‏38 یگ ٹَکه ام دَ عِنوانِ قُربانی گُناه تقدِیم کُنِید، علاوه از قُربانی سوختَنی دایمی و هدیِه غَلّه-و-دانِه شی و هدیِه وُچی کدَنی ازُو.

‏39 اَمیا ره شُمو باید دَ عِید های تعیِین شُدِه خُو دَ خُداوند تقدِیم کُنِید. اَرے، علاوه از نَذر ها و هدیه های داوطلبانِه خُو اَمیا ره دَ عِنوانِ قُربانی های سوختَنی، هدیه های غَلّه-و-دانه، هدیه های وُچی کدَنی و قُربانی های سلامَتی خُو تقدِیم کُنِید.‘“

‏40 پس مُوسیٰ پگِ چِیزا ره دَ بَنی اِسرائیل گُفت، امُو رقم که خُداوند دَزُو اَمر کدُد.