لاویا
کِتابِ تَورات - بَخشِ سِوّم
پیشگُفتار
لاویا کِتابِ سِوّمِ تَورات اَسته و نامِ امزی کِتاب از نامِ «لاوی» که یکی از طایفه های بَنی اِسرائیل اَسته گِرِفته شُده. لاویا دَ خانه خُدا وظِیفه های مُختلِف دَشت و خِدمتگارای خانِه خُدا بُود. دَ امزی کِتاب بَلدِه پیشوایو دستُورای مُشَخَص دَده شُده تا اُونا بَنی اِسرائیل ره دَ عِبادتِ خُدا رهبری کنه. امچُنان بَلدِه قَومِ خُدا هِدایَت های وجُود دَره که اُونا چی رقم مِیتَنه یگ زِندگی مُقَدَّس دَشته بَشه.
اگه کِتابِ لاویا ره جم-بَندی کنی، مَوضوعی که کَلوتر از دِیگه مَوضوع‌ها دِیده مُوشه قُدُوسیَتِ خُدا اَسته و اِی مَوضوع باربار تِکرار شُده. خُدا امی احکام ره بَلدِه قَوم خُو دَد تا قَوم خُو ره تقدِیس کنه.
دَ هفت فصلِ اوّلِ امزی کِتاب دَ بارِه قُربانی های مُختلِف دَ تفصِیل تشریح دَده شُده. بعد ازُو دَ فصل های ۸ تا ۱۰ دَ بارِه تقدِیسِ هارُون و باچه های شی نوِشته شُده که اُونا چی رقم خِدمتِ پیشوایی ره شُروع کد. باقی فصل های کِتاب دَ بارِه قانُونای پاک شُدو و احکامِ مُختلِف اَسته و دَ بارِه عیدها و چِیزای که دَ خُداوند وَقف مُوشه.
فهرِستِ عِنوان‌ها
قُربانی سوختَنی (۱:۱)
هدیِه غَلّه-و-دانه (۱:۲)
قُربانی سلامَتی (۳:۱)
قُربانی گُناه (۴:۱)
مُقرَرات دَ بارِه جُرمانه (۵:۱)
مُقرَراتِ مُختلِف دَ بارِه قُربانی ها و هدیه ها (۶:۸)
قُربانی خطا (۷:۱)
مُقرَراتِ قُربانی سلامَتی (۷:۱۱)
مُقرَرات دَ بارِه چربی و خُون (۷:۲۲)
حقِ پیشوایو (۷:۲۸)
مَسَح کدونِ هارُون و باچه های شی بَلدِه وظِیفِه پیشوایی (۸:۱)
شُروعِ خِدمتِ پیشوایو (۹:۱)
گُناهِ ناداب و اَبِیهُو (۱۰:۱)
هِدایَت ها بَلدِه پیشوایو (۱۰:۸)
خوراکِ پاک و ناپاک (۱۱:۱)
پاکی خاتُونو بعد از زَیدو (۱۲:۱)
مُقرَرات بَلدِه مَرَض های جلدی (۱۳:۱)
مُقرَرات دَ بارِه پوپَنَک (۱۳:۴۷)
قانُون بَلدِه پاک شُدو از مَرَضِ کولی (۱۴:۱)
مُقرَرات دَ بارِه پوپَنَک زَده‌گی خانه (۱۴:۳۳)
ناپاکی دَ وسِیلِه آوی که از جِسم بُر مُوشه (۱۵:۱)
مُقرَرات دَ بارِه روزِ کِفاره (۱۶:۱)
هِدایت دَ بارِه خُون (۱۷:۱)
مَنعِ معامِلِه جِنسی نامشروع (۱۸:۱)
قانُونای مُختلِف (۱۹:۱)
مجازات بَلدِه گُناه های مُختلِف (۲۰:۱)
مُقرَرات بَلدِه پیشوایو (۲۱:۱)
دَ بارِه مُقَدَّس بُودونِ هدیه ها (۲۲:۱)
قُربانی که قبُول نَمُوشه (۲۲:۱۷)
دَ بارِه زمان های تعیِین شُده (۲۳:۱)
روزِ آرام (۲۳:۳)
عِیدِ پِصَح و فطِیر (۲۳:۴)
عِیدِ نَوبَرِ حاصِلات (۲۳:۹)
عِیدِ پِنجاهُم (۲۳:۱۵)
عِیدِ شیپُورها (۲۳:۲۳)
روزِ کِفاره (۲۳:۲۶)
عِیدِ چَپری ها (۲۳:۳۳)
قانُون دَ بارِه چِراغدان و میزِ نان (۲۴:۱)
نانِ مُقَدَّس (۲۴:۵)
مجازاتِ آدمِ کُفرگوی (۲۴:۱۰)
سالِ آرام (۲۵:۱)
سالِ پِنجاهُم (۲۵:۸)
بازخرِیدِ مُلک-و-زمی (۲۵:۲۳)
کومَک بَلدِه غرِیبا (۲۵:۳۵)
دَ بارِه آزادی غُلاما (۲۵:۳۹)
بَرکت بَلدِه کسای که اِطاعَت مُونه (۲۶:۱)
جَزای نااِطاعتی (۲۶:۱۴)
بازخرِیدِ کسای که خود ره وَقف کده (۲۷:۱)