خرُوج 40

ایستَلجی کدونِ جایگاهِ مُقَدَّس

بعد ازُو خُداوند دَ مُوسیٰ گُفت: ‏2 ”دَ روزِ اوّلِ ماهِ اوّل، جایگاه یعنی خَیمِه مُلاقات ره ایستَلجی کُو ‏3 و صندُوقِ شهادَت ره دَ اُونجی بیل و بعد ازُو پردِه مُقَدَّستَرِین جای ره پیشِ رُوی شی اَوزو کُو. ‏4 میز ره دَ خَیمه بیَر و اَسباب شی ره دَ بَلِه ازُو دَ تَرتِیب بِچی و چِراغدان ره ام داخِل اَوُرده چِراغای شی ره برابر کُو. ‏5 قُربانگاهِ طِلّایی ره بَلدِه بُخورِ خوشبُوی رُوی دَ رُوی صندُوقِ شهادَت بیل و پردِه درگِه جایگاه ره اَوزو کُو. ‏6 قُربانگاهِ قُربانی سوختَنی ره پیشِ درگِه جایگاه یعنی خَیمِه مُلاقات جای-دَ-جای کُو ‏7 و حَوض ره بَینِ خَیمِه مُلاقات و قُربانگاه بیل و دَ مَنِه ازُو آو شیو کُو. ‏8 گِرداگِردِ حَولی ره پرده بِگِیر و پردِه درگِه حَولی ره ام دَ جای شی اَوزو کُو. ‏9 روغونِ مَسَح ره بِگِیر و جایگاه ره قد تمامِ چِیزای که دَ مَنِه شی اَسته و قد تمامِ اَسباب شی مَسَح کده تقدِیس کُو و اُو پاک مُوشه. ‏10 پس ازُو قُربانگاهِ قُربانی سوختَنی ره قد پگِ اَسباب شی مَسَح کده قُربانگاه ره تقدِیس کُو و قُربانگاه بیخی مُقَدَّس مُوشه. ‏11 امچُنان حَوض و پایه شی ره مَسَح کده تقدِیس کُو. ‏12 بعد ازُو هارُون و باچه‌های شی ره دَ دانِ خَیمِه مُلاقات بیَر و اُونا ره قد آو غُسل بِدی ‏13 و هارُون ره قد کالاهای مُقَدَّس بُپوشَن و اُو ره مَسَح کده تقدِیس کُو تاکه اُو بحَیثِ پیشوا مَره خِدمت کُنه. ‏14 اوخته باچه‌های شی ره بیَر و پیرونای ازوا ره دَزوا بُپوشَن. ‏15 اُونا ره ام مَسَح کُو، امُو رقمِیکه آتِه ازوا ره مَسَح کدی، تاکه اُونا ام بحَیثِ پیشوایو مَره خِدمت کُنه. مَسَح شُدونِ ازوا دَ مقامِ پیشوایی بَلدِه دایم اَسته و دَ تمامِ نسل های ازوا اِدامه پَیدا مُونه.“ ‏16 و مُوسیٰ پگ چِیزا ره امُو رقم که خُداوند دَزشی اَمر کدُد، دقِیق امُو رقم انجام دَد.

‏17 پس دَ ماهِ اوّلِ سالِ دوّم، دَ روزِ اوّلِ ماه، جایگاه مُنَظم باله شُد ‏18 یعنی مُوسیٰ جایگاه ره باله کد: اُو پایه‌های شی ره شَند و چیو های چارتراش شی ره محکم کد، پُشت‌بَند های ازوا ره بَند و ستُونای شی ره ایستَلجی کد. ‏19 بعد ازُو خَیمه ره بَلِه جایگاه اَوار کد و پوشِ خَیمه ره دَ سرِ ازُو کَش کد، امُو رقمِیکه خُداوند دَ مُوسیٰ اَمر کدُد. ‏20 اُو امُو دُو لَوحِ شهادَت ره دَ مَنِه صندُوق ایشت و دِستَک‌چیو های دِراز ره دَ حلقه های صندُوق جای-دَ-جای کد و جای کِفاره یعنی سر پوشِ صندُوق ره بَلِه شی ایشت. ‏21 بعد ازُو صندُوقِ شهادَت ره داخِلِ جایگاه اَوُرد و پردِه مُقَدَّستَرِین جای ره اَوزو کده دَ پیشِ رُوی شی کَش کد، امُو رقمِیکه خُداوند دَ مُوسیٰ اَمر کدُد. ‏22 اُو امچُنان میز ره دَ خَیمِه مُلاقات اَوُرده طرفِ شَمالِ خَیمه بُرو از پردِه که دَ پیشِ رُوی صندُوق بُود، جای-دَ-جای کد ‏23 و نانِ مُقَدَّس ره دَ بَلِه شی دَ حُضُورِ خُداوند ایشت، امُو رقمِیکه خُداوند دَ مُوسیٰ اَمر کدُد. ‏24 اُو چِراغدان ره داخِلِ خَیمِه مُلاقات رُوی دَ رُوی میز طرفِ جنُوبِ جایگاه ایشت ‏25 و چِراغای شی ره دَ حُضُورِ خُداوند روشو کد، امُو رقمِیکه خُداوند دَ مُوسیٰ اَمر کدُد. ‏26 اُو قُربانگاهِ طِلّایی ره ام دَ خَیمِه مُلاقات پیشِ رُوی پرده ایشت ‏27 و دَ بَلِه شی بُخورِ خوشبُوی ره سوختَنده دُود کد، امُو رقمِیکه خُداوند دَ مُوسیٰ اَمر کدُد. ‏28 بعد ازُو پردِه درگِه جایگاه ره اَوزو کد ‏29 و قُربانگاهِ قُربانی سوختَنی ره پیشِ درگِه جایگاه، یعنی خَیمِه مُلاقات ایشت و دَ بَلِه شی قُربانی سوختَنی و هدیِه غَلّه-و-دانه ره تقدِیم کد، امُو رقمِیکه خُداوند دَ مُوسیٰ اَمر کدُد. ‏30 بعد ازُو حَوضِ برونزی ره دَ مابَینِ خَیمِه مُلاقات و قُربانگاه ایشت و دَ مَنِه ازُو بَلدِه شُشت-و-شوی آو شیو کد ‏31 و مُوسیٰ، هارُون و باچه‌های شی دِست و پایای خُو ره قد آوِ ازُو شُشت. ‏32 هر وختِیکه اُونا دَ خَیمِه مُلاقات داخِل مُوشُد و یا نزدِیکِ قُربانگاه میمَد، اوّل خود ره مُوشُشت، امُو رقمِیکه خُداوند دَ مُوسیٰ اَمر کدُد. ‏33 بعد ازُو چاردیوالی ره دَ گِرداگِردِ جایگاه و قُربانگاه جای-دَ-جای کد و پردِه درگِه حَولی ره اَوزو کد. دَمزی رقم مُوسیٰ کار ره تَکمِیل کد.

جلالِ خُداوند

‏34 پس آوُر خَیمِه مُلاقات ره پوشَند و جلالِ خُداوند جایگاه ره پُر کد ‏35 و مُوسیٰ نَتنِست دَ خَیمِه مُلاقات داخِل شُنه، چراکه آوُر دَ بَلِه شی تاه شُدُد و جلالِ خُداوند جایگاه ره پُر کدُد. ‏36 دَ تمامِ سَفرای بَنی اِسرائیل، هر وختِیکه آوُر از بَلِه جایگاه باله مُوشُد، اُونا کوچ مُوکد. ‏37 ولے اگه آوُر از بَلِه جایگاه باله نَمُوشُد، اُونا تا روزِ باله شُدون شی ره کوچ نَمُوکد، ‏38 چراکه آوُرِ خُداوند از طرفِ روز دَ بَلِه جایگاه مَوجُود بُود و دَ وختِ شاو آتِش دَ بَینِ آوُر وجُود دَشت و دَ نظرِ پگِ قَومِ اِسرائیل دَ تمامِ سَفرای شی معلُوم مُوشُد.