خرُوج 39

جور کدونِ کالای پیشوایو

از چُوغ های لاجوَردی، اَرغَوانی و سُرخ رَنگ، اُونا کالاهای بافتَگی بَلدِه خِدمتگارای جایگاهِ مُقَدَّس جور کد. اُونا امچُنان کالای مُقَدَّس ره بَلدِه هارُون تَیار کد، امُو رقمِیکه خُداوند دَ مُوسیٰ اَمر کدُد. ‏2 ایفودِ پیشوا از طِلّا و از چُوغ های لاجوَردی، اَرغَوانی و سُرخ رَنگ و از کتانِ نَرم و مَیده بافت جور شُد. ‏3 اُونا وَرَق های طِلّا ره چکُش زَده بَرِیک کد و دَ شکلِ تارای نازُک بُرِید تاکه دَ وسِیلِه یگ دِست‌دوزِ لایق دَ بَینِ چُوغ های لاجوَردی، اَرغَوانی و سُرخ رَنگ دَ بَلِه کتانِ نَرم کار شُنه. ‏4 اُونا بَلدِه ایفود دُو سرشانه‌یی جور کد که دَ دُو شِنگِ ایفود بَند مُوشُد. ‏5 و بَند ایفود که دَ بَلِه شی بسته مُوشُد، قد خودِ ایفود از یگ رَخت و یگ جِنس بُود یعنی از تارِ طِلّایی و از چُوغ های لاجوَردی، اَرغَوانی و سُرخ رَنگ و از کتانِ نَرم و مَیده بافت جور شُد، فقط امُو رقمِیکه خُداوند دَ مُوسیٰ اَمر کدُد.

‏6 و اُونا دُو سنگِ عقِیقِ آسمانی ره دَ قابَک های طِلّایی سخت کد و نام های باچه های اِسرائیل ره دَ رُوی ازوا نَقش کد، امُو رقم که یگ مُهر نَقش مُوشه. ‏7 بعد ازُو اُونا ره دَ بَلِه دُو سرشانه‌یی ایفود نَصب کد تاکه سنگ های یادگاری بَلدِه بَنی اِسرائیل بَشه، امُو رقمِیکه خُداوند دَ مُوسیٰ اَمر کدُد.

‏8 اُو سِینه-بَند ره مِثلِ ایفود وَری از تارِ طِلّایی و چُوغ های لاجوَردی، اَرغَوانی و سُرخ رَنگ و از کتانِ نَرم و مَیده بافت دَ وسِیلِه یگ دِست‌دوزِ لایق جور کد. ‏9 اُو دَ شکلِ چارکُنج بُود و اُونا اُو ره دُو قت کد که دِرازی شی یگ قرِیش و بَر شی ام یگ قرِیش و دُو قت بُود. ‏10 اُونا دَزُو چار قطار سنگ نَصب کد: دَ قطارِ اوّل عقِیقِ جِگری، یاقُوتِ زَرد و زَمَرُد؛ ‏11 دَ قطارِ دوّم فیروزه، یاقُوتِ نِیلی و اَلماس؛ ‏12 دَ قطارِ سِوّم سنگِ یَمانی، عقِیقِ آوی و لعلِ کَبُود؛ ‏13 و دَ قطارِ چارُم زَبَرجَدِ زَرد، عقِیقِ آسمانی و یَشم. پگ شی دَ قابَک های طِلّایی نَصب شُدُد. ‏14 تعدادِ سنگا دَ مُطابِقِ تعدادِ نام های باچه های اِسرائیل دوازده سنگ بُود و نامِ هر کُدَمِ ازوا دَ بَلِه یگ سنگ نَقش شُدُد، رقمی که دَ مُهر نَقش مُوشه و هر کُدَمِ ازوا قد نام خُو از یکی امزُو دوازده طایفِه اِسرائیل نُمایندَگی مُوکد. ‏15 اُونا دَ بَلِه سِینه-بَند زنجِیرای بافته شُده ره رقمِ ریسپو اَلّی از طِلّای خالِص جور کد. ‏16 اُونا دُو قابَکِ طِلّایی و دُو حَلقِه طِلّایی جور کد. پس امُو دُو حلقه ره دَ دُو لبِ سِینه-بَند محکم کد. ‏17 بعد ازُو امُو دُو زنجِیرِ طِلّایی ره دَ دُو حَلقِه که دَ دُو لبِ سِینه-بَند نَصب شُدُد، بسته کد ‏18 و دُو سرِ دِیگِه امزُو دُو زنجِیر ره دَ دُو قابَک نَصب کد، و امُو دُو قابَک ره دَ دُو شانِه ایفود دَ پیشِ رُوی محکم کد. ‏19 بعد ازُو اُونا دُو حَلقِه طِلّایی دِیگه جور کد و اُونا ره دَ دُو گوشِه سِینه-بَند که دَ لبِ طرفِ داخِلِ ایفود بُود، سخت کد. ‏20 اُونا بسم دُو حَلقِه طِلّایی دِیگه جور کد و اُونا ره دَ تَینه حِصِّه سرشانه‌یی دَ پیشِ رُوی ایفود، نزدِیکِ دَرز شی کم ذَره باله‌تَر از بَندِ ایفود سخت کد. ‏21 بعد ازُو اُونا حلقه های سِینه-بَند ره قد یگ فِیتِه لاجوَردی رنگ دَ حلقه های ایفود بسته کد تاکه دَ بَلِه بَندِ ایفود قرار دَشته بَشه و سِینه-بَند از ایفود جدا نَشُنه، امُو رقمِیکه خُداوند دَ مُوسیٰ اَمر کدُد.

‏22 اُو امچُنان پیرونِ ایفود ره مُکَمَل از چُوغِ لاجوَردی رَنگ دَ وسِیلِه یگ تانِسته باف جور کد. ‏23 بَلدِه جای سر شی، دَ غول، یگ سُلاخ تَیار کد و گِرداگِردِ جاغِه شی ره مِثلِ زِرِّه قِیغ شُده جور کد تاکه پاره نَشُنه. ‏24 دَ قِیغِ دامونِ پیرو اُونا قد چُوغ های لاجوَردی، اَرغَوانی و سُرخ رَنگ و از تارای کتانِ نَرم ٹوپَک ها دَ شکلِ اَنار جور کد. ‏25 اُونا امچُنان زَنگوله ها ره از طِلّای خالِص جور کد و امُو زَنگوله ها ره دَ بَینِ ٹوپَک های اَنار دَ قِیغِ دامونِ پیرو اَوزو کد؛ یعنی دَ گِرداگِردِ دامونِ پیرو دَ بَینِ هر دُو ٹوپَکِ اَنار یگ زَنگوله اَوزو کد: ‏26 یگ زَنگوله و یگ ٹوپَکِ اَنار، یگ زَنگوله و یگ ٹوپَکِ اَنار، دَ گِرداگِردِ دامونِ پیرونِ که بَلدِه خِدمت کدو پوشِیده مُوشُد اَوزو بُود، امُو رقمِیکه خُداوند دَ مُوسیٰ اَمر کدُد.

‏27 اُونا بَلدِه هارُون و باچه های شی پیرونا ره دَ وسِیلِه یگ تانِسته باف از کتانِ نَرم، ‏28 لُونگی ره از کتانِ نَرم، کوله های نُوربَند ره از کتانِ نَرم و زیر پوشی ره از تِکِه کتانِ نَرم و مَیده بافت جور کد. ‏29 و کمربسته ره از کتانِ نَرم و چُوغ های لاجوَردی، اَرغَوانی و سُرخ رَنگ دَ وسِیلِه یگ گُلدوزِ لایق جور کد، امُو رقمِیکه خُداوند دَ مُوسیٰ اَمر کدُد.

‏30 آخِرِکار اُونا نشانِ نِیم‌تاجِ مُقَدَّس ره از طِلّای خالِص جور کد و امُو رقمِیکه یگ حَکاک انگُشتری‌ها ره نَقش مُونه، اینی کلِمه ها ره دَ رُوی شی حَک کد: «وَقف شُدِه خُداوند.» ‏31 و اُونا امُو نشان ره قد یگ فِیتِه لاجوَردی رنگ دَ بَلِه لُونگی بسته کد، امُو رقمِیکه خُداوند دَ مُوسیٰ اَمر کدُد.

‏32 پس پگِ کارای جایگاه یعنی خَیمِه مُلاقات تَکمِیل شُد و بَنی اِسرائیل پگ چِیزا ره امُو رقم که خُداوند دَ مُوسیٰ اَمر کدُد، دَ آخِر رَسَند. ‏33 و اُونا جایگاه ره پیشِ مُوسیٰ اَوُرد: خَیمه و تمامِ اَسباب شی ره قد چنگَک ها، چیو های چارتراش، پُشت‌بَندا، ستُون ها و پایه های شی؛ ‏34 پوش های پوستِ سُرخ شُدِه قُوچ قد پوش های پوستِ نَرم-و-قِیمَتی و پردِه مُقَدَّستَرِین جای؛ ‏35 صندُوقِ شهادَت ره قد دِستَک‌چیو های دِراز و جای کِفاره یعنی سرپوشِ صندُوق؛ ‏36 میز و تمامِ ظرفای شی ره قد نانِ حُضُورِ خُداوند؛ ‏37 چِراغدانِ طِلّای خالِص ره قد چِراغای قطار چِینده شُده و تمامِ اَسباب شی و روغو بَلدِه روشنَی شی؛ ‏38 قُربانگاهِ طِلّایی، روغونِ مَسَح، بُخورِ خوشبُوی و پردِه درگِه خَیمه ره؛ ‏39 قُربانگاهِ برونزی ره قد اُجاقِ برونزی و دِستَک‌چیو های دِرازِ ازُو و دِیگه اَسباب شی؛ حَوض ره قد پایه شی؛ ‏40 پرده های چاردیوالی حَولی ره قد ستُون ها و پایه های شی؛ پردِه درگِه حَولی ره قد ریسپونا و میخ های شی و پگِ اَسباب شی بَلدِه خِدمت کدو دَ جایگاه یعنی خَیمِه مُلاقات؛ ‏41 امچُنان کالا های بافته شُده ره بَلدِه خِدمت کدو دَ جایگاهِ مُقَدَّس، یعنی کالا های مُقَدَّس ره بَلدِه هارُون پیشوا و کالا ها ره بَلدِه باچه های شی بخاطرِ خِدمتِ پیشوایی. ‏42 امُو رقمِیکه خُداوند دَ مُوسیٰ اَمر کدُد، بَنی اِسرائیل تمامِ کارا ره عملی کد ‏43 و مُوسیٰ تمامِ کارای انجام شُده ره توخ کد و دِید که اُونا پگ شی ره دَ مُطابِقِ تورِه خُداوند پُوره کده. پس مُوسیٰ اُونا ره بَرکت دَد.