فصلِ بِیست و هشتُم
قُربانی های روزانه
1 دَمزُو غَیت خُداوند قد مُوسیٰ گپ زَده گُفت: 2 ”دَ بَنی اِسرائیل اَمر کُو و دَزوا بُگی، ’فِکر شُمو بَشه که هدیِه خوراکی مَره دَ عِنوانِ هدیه ھای خاص که خوشبُوی مَورِدِ پِسَند مه اَسته دَ وختِ مُعیَّن شی دَز مه تقدِیم کُنِید.‘ 3 و ام دَزوا بُگی، ’هدیِه خاص ره که شُمو باید دَ خُداوند تقدِیم کُنِید، اینی اَسته: هر روز دُو نَربَرِه یگ ساله و بےعَیب دَ عِنوانِ قُربانی سوختَنی دایمی باید تقدِیم شُنه؛ 4 بارِه اوّل ره دَ وختِ صُبح تقدِیم کُو و بارِه دوّم ره دَ وختِ شام تقدِیم کُو 5 و قد هر باره دَهُم حِصِّه یگ ایفهa بِهترِین آرد ره که قد چارُم حِصِّه یگ هِینb روغونِ زَیتُون گٹ شُده بَشه دَ عِنوانِ هدیِه غَلّه-و-دانه بَیر. 6 اینَمی قُربانی سوختَنی دایمی اَسته که دَ کوهِ سِینا دَ عِنوانِ خوشبُوی مَورِدِ پِسَند و هدیِه خاص بَلدِه خُداوند تعیِین شُد. 7 هدیِه وُچی کدَنی ازُو باید چارُم حِصِّه یگ هِین شراب بَلدِه هر باره بَشه؛ اِی هدیِه وُچی کدَنی ره بَلدِه خُداوند دَ جایگاهِ مُقَدَّس شیو کُو. 8 بارِه دوّم ره دَ وختِ شام تقدِیم کُو؛ اُو ره رقمِ قُربانی صُبح قد هدیِه غَلّه-و-دانه و هدیِه وُچی کدَنی شی تقدِیم کُو. اِی یگ هدیِه خاص و خوشبُوی مَورِدِ پِسَندِ خُداوند اَسته.
قُربانی روزِ آرام
9 دَ روزِ آرام دُو نَربَرِه یگ ساله و بےعَیب ره قد هدیِه غَلّه-و-دانِه شی که دُو حِصّه از دَه حِصِّه یگ ایفهc بِهترِین آردِ روغو گٹ شُده بَشه و قد هدیِه وُچی کدَنی شی تقدِیم کُو. 10 اِی قُربانی سوختَنی بَلدِه هر روزِ آرام اَسته، علاوه از قُربانی سوختَنی دایمی و هدیِه وُچی کدَنی شی.
قُربانی ماهوار
11 دَ روزای اوّلِ ماه های خُو یگ قُربانی سوختَنی ره دَ خُداوند تقدِیم کُنِید؛ اِی قُربانی باید دُو جونه‌گاو، یگ قُوچ و هفت نَربَرِه یگ ساله بَشه و پگ شی بےعَیب بَشه. 12 امچُنان سِه حِصّه از دَه حِصِّه یگ ایفهd بِهترِین آردِ روغو گٹ شُده بَلدِه هدیِه غَلّه-و-دانِه هر گاو و دُو حِصّه از دَه حِصِّه یگ ایفهe بِهترِین آردِ روغو گٹ شُده بَلدِه هدیِه غَلّه-و-دانِه قُوچ 13 و دَهُم حِصِّه یگ ایفهf بِهترِین آردِ روغو گٹ شُده بَلدِه هدیِه غَلّه-و-دانِه هر باره. اِی قُربانی سوختَنی خوشبُوی مَورِدِ پِسَند و یگ هدیِه خاص بَلدِه خُداوند اَسته. 14 و هدیه های وُچی کدَنی ازوا نِیمِ یگ هِینg شرابِ انگُور بَلدِه هر گاو، سِوّم حِصِّه یگ هِینh بَلدِه قُوچ و چارُم حِصِّه یگ هِینi بَلدِه هر نَربَره بَشه. اِی قُربانی سوختَنی ماهوار اَسته دَ ھر ماهِ سال. 15 علاوِه از قُربانی سوختَنی دایمی و هدیِه وُچی کدَنی شی، باید یگ ٹَکه دَ عِنوانِ قُربانی گُناه دَ خُداوند تقدِیم شُنه.
قُربانی های عِیدِ پِصَح
16 دَ روزِ چاردَهُمِ ماهِ اوّل، قُربانی پِصَح دَ خُداوند تقدِیم شُنه. 17 دَ روز پوزدَھُمِ امزی ماه عِید اَسته و بَلدِه هفت روز باید نانِ فطِیر خورده شُنه. 18 دَ روزِ اوّل باید یگ مجلِسِ مُقَدَّس برگُزار شُنه. دَ امزُو روز شُمو هیچ کارِ روزمرِه خُو ره انجام نَدِید؛ 19 بَلکِه شُمو یگ قُربانی سوختَنی دَ عِنوانِ هدیِه خاص دَ خُداوند تقدِیم کُنِید؛ اِی قُربانی باید دُو جونه‌گاو، یگ قُوچ و هفت نَربَرِه یگ ساله بَشه؛ مُتَوَجِه بَشِید که اُونا بےعَیب بَشه. 20 هدیِه غَلّه-و-دانِه ازوا باید سِه حِصّه از دَه حِصِّه یگ ایفه بِهترِین آردِ روغو گٹ شُده بَلدِه ھر گاو و دُو حِصّه از دَه حِصِّه یگ ایفه بَلدِه قُوچ 21 و دَهُم حِصِّه یگ ایفه بَلدِه ھر کُدَمِ امزُو هفت نَربَره بَشه. 22 امچُنان یگ ٹَکه ره دَ عِنوانِ قُربانی گُناه تقدِیم کُنِید تا بَلدِه شُمو کِفاره شُنه. 23 اَمیا ره علاوِه از قُربانی سوختَنی صُبح که قُربانی سوختَنی دایمی اَسته، تقدِیم کُنِید. 24 دَ امزی طرِیقه دَ هر روزِ امزُو هفت روز خوراکِ هدیِه خاص ره دَ عِنوانِ خوشبُوی مَورِدِ پِسَندِ خُداوند تقدِیم کُنِید؛ اِی باید علاوِه از قُربانی سوختَنی دایمی و هدیِه وُچی کدَنی شی تقدِیم شُنه. 25 دَ روزِ ھفتُم، بسم مجلِسِ مُقَدَّس برگُزار کُنِید و هیچ کارِ روزمرِه خُو ره انجام نَدِید.
قُربانی بَلدِه عِیدِ هفته ها
26 دَ روزِ نَوبَرِ حاصِلات، وختِیکه دَ دَورونِ عِیدِ هفته های خُو یگ هدیِه غَلّه-و-دانه از حاصِلِ نَو دَ خُداوند تقدِیم مُونِید، شُمو یگ جلسِه مُقَدَّس برگُزار کُنِید و هیچ کارِ روزمرِه خُو ره انجام نَدِید. 27 شُمو یگ قُربانی سوختَنی دَ عِنوانِ خوشبُوی مَورِدِ پِسَندِ خُداوند تقدِیم کُنِید؛ اُو قُربانی باید دُو جونه‌گاو، یگ قُوچ و هفت نَربَرِه یگ ساله بَشه. 28 هدیِه غَلّه-و-دانِه ازوا باید سِه حِصّه از دَه حِصِّه یگ ایفه بِهترِین آردِ روغو گٹ شُده بَلدِه ھر گاو و دُو حِصّه از دَه حِصِّه یگ ایفه بَلدِه قُوچ بَشه 29 و دَهُم حِصِّه یگ ایفه بَلدِه هر کُدَمِ امزُو هفت نَربَره. 30 یگ ٹَکه ام تقدِیم کُنِید تا بَلدِه شُمو کِفارِه شُنه. 31 اَمیا ره علاوه از قُربانی سوختَنی دایمی قد هدیِه غَلّه-و-دانِه شی و هدیه های وُچی کدَنی شی تقدِیم کُنِید؛ مُتَوَجِه بَشِید که اُونا بےعَیب بَشه.