فصلِ ببِیست و پنجُم
موآب بَنی اِسرائیل ره گُمراه مُونه
1 وختِیکه بَنی اِسرائیل دَ شِطِیم خَیمه زَده بُود، مردُم قد دُخترونِ موآبی زِناکاری ره شُروع کد. 2 امی دُخترو مردُم ره دَ مراسِمِ قُربانی بَلدِه خُدایون خُو دعوَت مُوکد و مردُم ام مُوخورد و ام خُدایونِ ازوا ره سَجده مُوکد. 3 دَ امزی رقم بَنی اِسرائیل زیرِ یُوغِ بُتِ بَعل-فِغور رفت و آتِشِ قارِ خُداوند دَ خِلافِ بَنی اِسرائیل داغ شُد. 4 و خُداوند دَ مُوسیٰ گُفت: ”پگِ کٹه‌کَلونای قَوم ره بِگِیر و اُونا ره دَ روشَنی آفتَو دَ حُضُورِ خُداوند دَ دار بِزَن تا شِدَّتِ قارِ خُداوند از بَلِه قَومِ اِسرائیل دُور شُنه.“ 5 پس مُوسیٰ دَ قاضی های اِسرائیل گُفت: ”هر کُدَم شُمو باید مردُمای خُو ره که زیرِ یُوغِ بُتِ بَعل-فِغور رفته، بُکُشِید.“
6 دَ امزُو غَیت یگ مَردِ اِسرائیلی یگ خاتُونِ مِدیانی ره دَ پیشِ نظرِ مُوسیٰ و تمامِ جماعتِ بَنی اِسرائیل دَ مینکلِ قَومای خُو دَ خَیمِه خُو اَوُرد، دَ حالِیکه اُونا هنوز دَ دانِ درگِه خَیمِه مُلاقات دَرَو چخرا-و-ماتم مُوکد. 7 وختِیکه فِینحاس باچِه اِلعازار، نوسِه هارُون پیشوا اِی کار ره دِید، اُو از مینکلِ جماعت باله شُده یگ نَیزه ره دَ دِست خُو گِرِفت 8 و از پُشتِ امزُو مردِ اِسرائیلی دَ مَنِه خَیمه رفت و نَیزه ره دَ جِسمِ ھر دُوی ازوا گور کد که نَیزه از مَردِ اِسرائیلی تیر شُده دَ کَورِه امزُو خاتُو دَر اَمَد. اوخته بَلای که دَ بَلِه بَنی اِسرائیل اَمدُد، قُوی شُد. 9 ولے تِعدادِ کسای که دَ وسِیلِه بَلا کُشته شُد، بِیست و چار هزار نفر بُود.
10 پس خُداوند قد مُوسیٰ گپ زَده گُفت: 11 ”فِینحاس باچِه اِلعازار، نوسِه هارُون پیشوا غَضَب مَره از بَلِه بَنی اِسرائیل دُور کد. اُو بخاطرِ ازمه دَ مینکلِ ازوا غَیرَت کد تاکه ما بَنی اِسرائیل ره دَ حینِ غَیرَت خُو نابُود نَکنُم. 12 پس دَزُو بُگی که ما عهدِ سلامَتی خُو ره دَزُو مُوبخشُم. 13 اِی عهد بَلدِه ازُو و بَلدِه اَولادِه شی که بعد ازُو مییه یگ عهدِ پیشوایی دایمی اَسته، چراکه اُو بخاطرِ خُدای خُو غَیرَت کد و بَلدِه بَنی اِسرائیل کِفاره کد.“
14 نامِ امزُو مَردِ اِسرائیلی که قد خاتُونِ مِدیانی کُشته شُد، زِمری باچِه سالُو بُود، رهبرِ یگ اَولادِ بابه از طایفِه شِمعون. 15 نامِ خاتُونِ مِدیانی که کُشته شُد، کُزبی دُخترِ صُور بُود؛ صُور کٹِه یگ اَولادِ بابه دَ مِدیان بُود.
16 بعد ازُو خُداوند قد مُوسیٰ گپ زَده گُفت: 17 ”مِدیانی ها ره خار-و-ذلِیل کُو و اُونا ره بِزَن، 18 چراکه اُونا شُمو ره قد چَلبازی خُو خار-و-ذلِیل کد؛ اُونا شُمو ره دَ مَسئلِه بُتِ بَعل-فِغور و دَ مَسئلِه خوار خُو کُزبی، دُخترِ رهبرِ مِدیان که دَ روزِ بَلا دَ نتِیجِه پرَستِشِ بَعل فِغور کُشته شُد، بازی دَد.“