فصلِ بِیست و شَشُم
سرشُماری نسلِ نَو
1 بعد از مَرَضِ وُبا، خُداوند دَ مُوسیٰ و اِلعازار باچِه هارُون پیشوا گُفت: 2 ”تمامِ جماعتِ بَنی اِسرائیل ره که بِیست ساله و باله‌تَر بَشه دَ مُطابِقِ خانَوار های بابه کَلونای ازوا سرشُماری کُنِید، یعنی پگِ کسای ره که بِتَنه قد لشکرِ اِسرائیل دَ جنگ بوره، حِساب کُنِید.“ 3 پس مُوسیٰ و اِلعازار پیشوا دَ دَشتِ موآب، دَ بَغلِ دریای اُردُن رُوی دَ رُوی اَریحا قد رهبرا گپ زَده گُفت: 4 ”مَردای ره که بِیست ساله و باله‌تَر بَشه، حِساب کُنِید.“ اوخته دَ اَمرِ خُداوند مُوسیٰ و بَنی اِسرائیل قَوم ره بسم سرشُماری کد، رقمی که بعد از بُرو اَمَدونِ ازوا از سرزمِینِ مِصر اُونا ره حِساب کدُد:
5 رئوبین اوّلباری اِسرائیل بُود. اَولادِه رئوبین:
از حَنوخ، اَولادِ بابِه حَنوخیا؛
از فَلُّو، اَولادِ بابِه فَلُّویا؛
6 از حِصرون، اَولادِ بابِه حِصرونیا؛
از کَرمی، اَولادِ بابِه کَرمیا دَ وجُود اَمَد.
7 اینَمیا اَولادِ بابه های رئوبینیا بُود؛ کسای که از جَمِ ازوا حِساب شُد، چِل و سِه هزار و هفت صد و سی نفر بُود. 8 باچِه فَلُّو اِلیاب بُود. 9 باچه های اِلیاب: نِموئیل، داتان و اَبِیرام. داتان و اَبِیرام امُو کسا بُود که از جماعت اِنتِخاب شُد و دَ ضِدِ مُوسیٰ و هارُون قد گروهِ قورَح قَتی شُده شورِش کد و دَ حقِیقت شورِشِ ازوا دَ خِلافِ خُداوند بُود. 10 امزی خاطر زمی دان خُو ره واز کده اُونا و قورَح ره یگ جای قُورت کد. وختِیکه امُو گروه مُرد و آتِش امُو دُو صد و پِنجاه نفر ره سوختَند، اُونا یگ نَمُونِه عِبرَت جور شُد. 11 لیکِن اَولادِه قورَح نَمُرد.
12 اَولادِه شِمعون دَ مُطابِقِ اَولادِ بابه های ازوا:
از نِموئیل، اَولادِ بابِه نِموئیلیا؛
از یامِین، اَولادِ بابِه یامِینیا؛
از یاخِین، اَولادِ بابِه یاخِینیا؛
13 از زارِح، اَولادِ بابِه زارِحیا؛
از شائول، اَولادِ بابِه شائولیا دَ وجُود اَمَد.
14 اینَمیا اَولادِ بابه های شِمعونیا بُود و از جمِ ازوا بِیست و دُو هزار و دُو صد نفر حِساب شُد.
15 اَولادِه جاد دَ مُطابِقِ اَولادِ بابه های ازوا:
از صَفون، اَولادِ بابِه صَفونیا؛
از حَجّی، اَولادِ بابِه حَجّیا؛
از شونی، اَولادِ بابِه شونیا؛
16 از اُزنی، اَولادِ بابِه اُزنیا؛
از عیری، اَولادِ بابِه عیریا؛
17 از اَرود، اَولادِ بابِه اَرودیا؛
از اَرئیلی، اَولادِ بابِه اَرئیلیا دَ وجُود اَمَد.
18 اینمیا اَولادِ بابه های نسلِ جاد بُود؛ کسای که از جَمِ ازوا حِساب شُد، چِل هزار و پَنج صد نفر بُود.
19 از جَمِ باچه های یهُودا عیر و اونان کسای بُود که دَ سرزمِینِ کِنعان مُرد. 20 اَولادِه یهُودا دَ مُطابِقِ اَولادِ بابه های ازوا:
از شیله، اَولادِ بابِه شیلئیا؛
از فارِص، اَولادِ بابِه فارِصیا؛
از زارِح، اَولادِ بابِه زارِحیا دَ وجُود اَمَد.
21 اَولادِه فارِص:
از حِصرون، اَولادِ بابِه حِصرونیا؛
از حامُول، اَولادِ بابِه حامُولیا دَ وجُود اَمَد.
22 اینَمیا اَولادِ بابه های یهُودا بُود؛ کسای که از جمِ ازوا حِساب شُد، هفتاد و شَش هزار و پَنج صد نفر بُود.
23 اَولادِه یسّاکار مُطابِقِ اَولادِ بابه های ازوا:
از تولاع، اَولادِ بابِه تولاعیا؛
از فُوَه، اَولادِ بابِه فُوَئیا؛
24 از یَشُوب، اَولادِ بابِه یَشُوبیا؛
از شِمرون، اَولادِ بابِه شِمرونیا دَ وجُود اَمَد.
25 اینمیا اَولادِ بابه های یسّاکار بُود؛ کسای که از جَمِ ازوا حِساب شُد، شصت و چار هزار و سِه صد نفر بُود.
26 اَولادِه زِبُولُون دَ مُطابِقِ اَولادِ بابه های ازوا:
از سارِد، اَولادِ بابِه سارِدیا؛
از ایلون، اَولادِ بابِه ایلونیا؛
از یحلی‌ئیل، اَولادِ بابِه یحلی‌ئیلیا دَ وجُود اَمَد.
27 اینَمیا اَولادِ بابه های زِبُولُونیا بُود؛ کسای که از جَمِ ازوا حِساب شُد، شصت هزار و پَنج صد نفر بُود.
28 اَولادِه یوسُف دَ مُطابِقِ اَولادِ بابه های ازوا، از طرِیقِ مَنَسّی و اِفرایم:
29 اَولادِه مَنَسّی:
از ماخِیر، اَولادِ بابِه ماخِیریا؛ ماخِیر آتِه جِلعاد بُود؛
از جِلعاد، اَولادِ بابِه جِلعادیا دَ وجُود اَمَد.
30 اَولادِه جِلعاد:
از ایعِزِر، اَولادِ بابِه ایعِزِریا؛
از حِلِق، اَولادِ بابِه حِلِقیا؛
31 از اَسرِیئیل، اَولادِ بابِه اَسرِیئیلیا؛
از شِکیم، اَولادِ بابِه شِکیمیا؛
32 از شِمِیداع، اَولادِ بابِه شِمِیداعیا؛
از حِفِر، اَولادِ بابِه حِفِریا دَ وجُود اَمَد.
33 صِلُفِحاد باچِه حِفِر، باچه نَدَشت، مگم پَنج دُختر دَشت: نام ھای دُخترونِ صِلُفِحاد مَحله، نوعه، حُجله، مِلکه و تِرصه بُود.
34 اینَمیا اَولادِ بابه های مَنَسّی بُود. کسای که از جَمِ ازوا حِساب شُد، پِنجاه و دُو هزار و ھفت صد نفر بُود.
35 اَولادِه اِفرایم دَ مُطابِقِ اَولادِ بابه های ازوا:
از شوتِلاح، اَولادِ بابِه شوتِلاحیا؛
از باکِر، اَولادِ بابِه باکِریا؛
از تاحَن، اَولادِ بابِه تاحَنیا دَ وجُود اَمَد.
36 اَولادِه شوتِلاح:
از عیران، اَولادِ بابِه عیرانیا دَ وجُود اَمَد.
37 اینَمیا اَولادِ بابه های نسلِ اِفرایم بُود. کسای که از جَمِ ازوا حِساب شُد، سی و دُو هزار و پَنج صد نفر بُود. اَمیا اَولادِه یوسُف دَ مُطابِقِ اَولادِ بابه های خُو بُود.
38 اَولادِه بِنیامِین دَ مُطابِقِ اَولادِ بابه های ازوا:
از بالِع، اَولادِ بابِه بالِعیا؛
از اَشبیل، اَولادِ بابِه اَشبیلیا؛
از اَخِیرام، اَولادِ بابِه اَخِیرامیا؛
39 از شفُوفام، اَولادِ بابِه شفُوفامیا؛
از حُوفام، اَولادِ بابِه حُوفامیا دَ وجُود اَمَد.
40 اَولادِه بالِع از طرِیقِ اَرد و نعمان:
از اَرد، اَولادِ بابِه اَردیا؛
از نعمان، اَولادِ بابِه نعمانیا دَ وجُود اَمَد.
41 اینَمیا اَولادِه بِنیامِین دَ مُطابِقِ اَولادِ بابه های خُو بُود؛ کسای که از جَم ازوا حِساب شُد، چِل و پَنج هزار و شَش صد نفر بُود.
42 اَولادِه دان دَ مُطابِقِ اَولادِ بابه های ازوا:
از شُوحام، اَولادِ بابِه شُوحامیا دَ وجُود اَمَد.
اینمیا اَولادِه دان دَ مُطابِقِ اَولادِ بابه های خُو بُود. 43 از تمامِ اَولادِ بابه های شُوحامیا کسای که حِساب شُد، شصت و چار هزار و چار صد نفر بُود.
44 اَولادِه اَشِیر دَ مُطابِقِ اَولادِ بابه های ازوا:
از اِیمنه، اَولادِ بابِه اِیمنیا؛
از یِشوِی، اَولادِ بابِه یِشوِیا؛
از بِریعه، اَولادِ بابِه بِریعیا دَ وجُود اَمَد.
45 اَولادِه بِریعه:
از حِبِر، اَولادِ بابِه حِبِریا؛
از مَلکی‌ئیل، اَولادِ بابِه مَلکی‌ئیلیا دَ وجُود اَمَد.
46 و نامِ دُخترِ اَشِیر ساره بُود.
47 اینَمیا اَولادِ بابه های نسلِ اَشِیر بُود؛ کسای که از جَمِ ازوا حِساب شُد، پِنجاه و سِه هزار و چار صد نفر بُود.
48 اَولادِه نَفتالی دَ مُطابِقِ اَولادِ بابه های ازوا:
از یَحصئیل، اَولادِ بابِه یَحصئیلیا؛
از جُونی، اَولادِ بابِه جُونیا؛
49 از یِصِر، اَولادِ بابِه یِصِریا؛
از شِلّیم، اَولادِ بابِه شِلّمیا دَ وجُود اَمَد.
50 اینَمیا نسلِ نَفتالی دَ مُطابِقِ اَولادِ بابه های خُو بُود؛ کسای که از جَمِ ازوا حِساب شُد، چِل و پَنج هزار و چار صد نفر بُود.
51 اینَمیا حِساب شُده های بَنی اِسرائیل بُود: جُمله شَش صد و یگ هزار و ھفت صد و سی نفر.
52 بعد از سرشُماری خُداوند قد مُوسیٰ گپ زَده گُفت: 53 ”زمی باید بَلدِه امزیا دَ مُطابِقِ تِعدادِ نام های ازیا دَ عِنوانِ مُلکیَت تقسِیم شُنه. 54 بَلدِه طایفِه کٹه تقسِیمِ کٹه بِدی و بَلدِه طایفِه ریزه تقسِیمِ ریزه بِدی؛ بَلدِه هر طایفه باید دَ مُطابِقِ حِساب شُده های شی تقسِیم شی دَده شُنه. 55 مُتَوَجِه بَش که زمی دَ وسِیلِه پِشک تقسِیم شُنه؛ اُونا دَ مُطابِقِ نام های طایفه های بابه‌کَلونای خُو صاحِبِ زمی شُنه. 56 اَرے، زمی دَ وسِیلِه پِشک دَ بَینِ طایفه های کٹه و ریزه تقسِیم شُنه.“
57 اینیا حِساب شُده های لاویا اَسته دَ مُطابِقِ اَولادِ بابه های ازوا:
از جِرشون، اَولادِ بابِه جِرشونیا؛
از قُهات، اَولادِ بابِه قُهاتیا؛
از مِراری، اَولادِ بابِه مِراریا دَ وجُود اَمَد.
58 اینیا ام اَولادِ بابه های لاویا اَسته:
اَولادِ بابِه لِبنیا،
اَولادِ بابِه حِبرونیا،
اَولادِ بابِه مَحلیا،
اَولادِ بابِه موشیا،
و اَولادِ بابِه قورَحیا.
قُهات آتِه عَمرام بُود. 59 نامِ خاتُونِ عَمرام یوکابِد بُود، یوکابِد اَولادِه لاوی بُود که بَلدِه لاوی دَ مِصر پَیدا شُدُد؛ اُو بَلدِه عَمرام هارُون و مُوسیٰ و خوارِ ازوا مریَم ره زَید. 60 بَلدِه هارُون ناداب، اَبِیهُو، اِلعازار و اِیتامار پَیدا شُد. 61 ناداب و اَبِیھُو وختِیکه آتِشِ غَیرِ مجاز ره دَ حُضُورِ خُداوند تقدِیم کد، مُرد. 62 تِعدادِ حِساب شُده های ازوا، یعنی پگِ مَردا و باچه های یگ ماهه و باله‌تَرِ ازوا که حِساب شُد، بِیست و سِه هزار نفر بُود. اُونا دَ مینکلِ بَنی اِسرائیل حِساب نَشُد، چراکه هیچ تقسِیمِ زمی دَ مینکلِ بَنی اِسرائیل بَلدِه ازوا دَده نَشُد.
63 اینَمیا کسای بُود که دَ وسِیلِه مُوسیٰ و اِلعازار پیشوا حِساب شُد دَ غَیتِیکه اُونا بَنی اِسرائیل ره دَ دَشتِ موآب، دَ بَغل دریای اُردُن رُوی دَ رُوی اَریحا حِساب کد. 64 دَ مینکل امزیا هیچ کُدَمِ امزُو کسا وجُود نَدَشت که دَ وسِیلِه مُوسیٰ و هارُون پیشوا حِساب شُدُد دَ وختِیکه اُونا بَنی اِسرائیل ره دَ بیابونِ سِینا سرشُماری کدُد، 65 چُون خُداوند دَ بارِه ازوا گُفتُد که ”یقِیناً، اُونا دَ بیابو مُومُره.“ پس حتیٰ یکی ازوا ام زِنده نَمَند، بغَیر از کالیب باچِه یفُنّه و یوشِع باچِه نُون.