فصلِ سیزدَهُم
جاسُوسی از کِنعان
1 خُداوند قد مُوسیٰ گپ زَده گُفت: 2 ”نفرا ره بَلدِه جاسُوسی دَ سرزمِینِ کِنعان رَیی کُو، دَ سرزمِینی که ما دَ بَنی اِسرائیل مِیدیُم. از ھر طایفِه بابه‌کَلونای ازوا یگ نفر ره رَیی کُو، نفری ره که دَ مینکلِ ازوا رهبراَسته.“ 3 پس مُوسیٰ دَ اَمرِ خُداوند اُونا ره از بیابونِ پاران رَیی کد که پگِ ازوا رهبرای بَنی اِسرائیل بُود. 4 اینیا نام های ازوا اَسته:
از طایفِه رئوبین، شَمُوعَ باچِه زَکّور؛
5 از طایفِه شِمعون، شافاط باچِه حوری؛
6 از طایفِه یهُودا، کالیب باچِه یفُنّه؛
7 از طایفِه یسّاکار، یِجال باچِه یوسُف؛
8 از طایفِه اِفرایم، هوشِعَ باچِه نُون؛
9 از طایفِه بِنیامِین، فَلطی باچِه رافُو؛
10 از طایفِه زِبُولُون، جدِیئیل باچِه سودی؛
11 از طایفِه یوسُف، یعنی از طایفِه مَنَسّی، جَدّی باچِه سُوسی؛
12 از طایفِه دان، عمِیئیل باچِه جِمَلّی؛
13 از طایفِه اَشِیر، سِتُور باچِه مِیکائیل؛
14 از طایفِه نَفتالی، نَحبی باچِه وُفسی؛
15 و از طایفِه جاد، جاوئیل باچِه مَکی.
16 اینَمیا نام های کسای بُود که مُوسیٰ بَلدِه جاسُوسی دَ سرزمِینِ کِنعان رَیی کد. و مُوسیٰ نامِ هوشِعَa باچِه نُون ره دَ یوشِعb تبدِیل کد.
17 وختِیکه مُوسیٰ اُونا ره بَلدِه جاسُوسی دَ سرزمِینِ کِنعان رَیی کد، اُو دَزوا گُفت: ”دَ جنُوبِ امزُو سرزمی رفته دَ کوھِستو بُر شُنِید 18 و امُو سرزمی ره توخ کُنِید که چی رقم اَسته: آیا مردُمی که دَز شی زِندگی مُونه قَوی اَسته یا ناتو، کم اَسته یا کَلو؟ 19 و خودِ امزُو سرزمی که اُونا دَز شی بُود-و-باش دَره چی رقم معلُوم مُوشه: خُوبه یا بَد؟ و شارای که اُونا دَزشی زِندگی مُونه، چی رقم اَسته: بےدیواله یا دیوالدار؟ 20 و زمِین شی چی رقم اَسته: حاصِلخیز یا بوره؟ دِرخت دَره یا نَه؟ باجُراَت بَشِید و از میوِه امزُو سرزمی گِرِفته بَیرِید.“ امُو غَیت فصلِ حاصِلِ نَوِ انگُور بُود.
21 پس اُونا سُون باله رفته از بیابونِ صِین تا رِحوب که نزدِیکِ لِبو-حمات بُود، دَ بارِه امزُو سرزمی جاسُوسی کد. 22 اُونا از جنُوبِ امزُو سرزمی رفته دَ حِبرون رسِید، دَ شاری که اَخِیمان، شیشای و تَلمای اَولادِه عَناق بُود-و-باش دَشت. حِبرون ھفت سال پیش از صوعَنِ مِصر آباد شُدُد. 23 بعد ازُو اُونا دَ دَرِّه اِشکولc اَمَد و ازُونجی یگ شاخچه ره که یگ خوشه انگُور دَشت کَند و اُو ره دَ مَنِه یگ خُرجِین که دَ بَلِه یگ سوٹه-چیو دَ سرِ شانِه دُو نفر بُود قد یگ مِقدار اَنار و انجِیر گِرِفته اَوُرد. 24 امُو جای بخاطرِ خوشِه انگُوری که بَنی اِسرائیل ازُونجی کَندُد، دَرِّه اِشکولd نام ایشته شُد.
پس اَمَدونِ جاسُوسا
25 بعد از چِل روز اُونا از جاسُوسی امزُو سرزمی پس دَ جای خُو رفت. 26 اُونا دَ پیشِ مُوسیٰ و ھارُون و پگِ جماعتِ بَنی اِسرائیل دَ قادِش دَ بیابونِ پاران اَمَد و بَلدِه ازوا و بَلدِه پگِ جماعت خبر اَوُرده میوِه امزُو سرزمی ره ام دَزوا نِشو دَد. 27 اُونا دَ مُوسیٰ نقل کده گُفت: ”دَ سرزمِینی که مو ره رَیی کدی، مو رفتی؛ واقِعاً که دَزُو شِیر و عسل جاری اَسته، اینی ام میوِه شی. 28 مگم مردُمای که دَ امزُو سرزمی زِندگی مُونه قَوی اَسته و شارای شی دیوالدار و غَدر کٹه؛ علاوِه ازی، مو اَولادِه عَناق ره ام دَ اُونجی دِیدی. 29 عمالیقیا دَ سرزمِینِ جنُوب زِندگی مُونه و حِتیا و یبُوسیا و اَموریا دَ کوهِستو بُود-و-باش دَره؛ و کِنعانیا دَ نزدِیکِ دریای کٹهe و دَ بَغلِ دریاچِه اُردُن زِندگی مُونه.“
30 اوخته کالیب مردُم ره دَ پیشِ مُوسیٰ آرام کد و گُفت: ”آماده شُنِید که بوری و اُو ره تَصَرُف کنی، چُون کامِلاً تَوانایی شی ره دَری که دَ بَلِه ازُو پیروز شُنی.“ 31 لیکِن نفرای که قد ازُو رفتُد گُفت: ”مو نَمِیتَنی که دَ ضِدِ امزُو مردُما بوری، چراکه اُونا از مو کده قَوی‌تَر اَسته.“ 32 اوخته امُو نفرا که دَ بارِه امزُو سرزمی جاسُوسی کدُد، اُونا خبرِ بَد ره دَ مینکلِ بَنی اِسرائیل پَخش کده گُفت: ”سرزمِینی که مو بَلدِه جاسُوسی دَ مَنِه شی گشت-و-گُذار کدی، سرزمِینی اَسته که باشِنده های خُو ره قُورت مُونه؛ و پگِ مردُمای ره که مو دَ اُونجی دِیدی، مردُمای قد بِلند-و-کٹه بُود. 33 دَ اُونجی مو آدمای غول‌پَیکر یعنی اَولادِه عَناق ره دِیدی که اَولادِه مردُمای غول‌پَیکر اَسته؛f و مو دَ برابرِ ازوا دَ نظر خُو رقمِ مَلَخ بُودی و دَ نظرِ ازوا ام امُو رقم معلُوم مُوشُدی.“