فصلِ دوّم
ترتِیبِ خَیمه‌گاهِ طایفه ها
1 اوخته خُداوند قد مُوسیٰ و ھارُون گپ زَده گُفت: 2 ”بَنی اِسرائیل هر کُدَم شی باید دَ نزدِیکِ بَیرَق و نشانِ خانَوارِ بابه‌کَلونای خُو خَیمه بِزَنه؛ اُونا باید رُوی سُون خَیمِه مُلاقات دَ چارطرف شی خَیمه بِزَنه.
3 کسای که طرفِ شَرق سُون آفتَو بُرشُد باید خَیمه بِزَنه، لشکر های اَسته که مربُوطِ بَیرَق و خَیمه‌گاهِ یهُودا مُوشه؛ رهبرِ مردُمِ یهُودا نَحشون باچِه عمِیناداب بَشه. 4 کسای که دَ لشکرِ ازُو حِساب شُد، هفتاد و چار هزار و شَش صد نفر بُود.
5 کسای که دَ پالُوی ازوا باید خَیمه بِزَنه، طایفِه یسّاکار بَشه؛ رهبرِ مردُمِ یسّاکار نَتَنئیل باچِه صوعَر بَشه. 6 کسای که دَ لشکرِ ازُو حِساب شُد، پِنجاه و چار هزار و چار صد نفر بُود.
7 طایفِه زِبُولُون ام دَ پالُوی ازوا بَشه؛ رهبرِ مردُمِ زِبُولُون اِلیاب باچِه حیلون بَشه. 8 کسای که دَ لشکرِ ازُو حِساب شُد، پِنجاه و ھفت هزار و چار صد نفر بُود.
9 تِعدادِ پگِ کسای که دَ خَیمه‌گاهِ سَمتِ یهُودا مُطابِقِ لشکر های خُو حِساب شُد، یگ صد و هشتاد و شَش هزار و چار صد نفر بُود. اُونا باید اوّل کوچ کُنه.
10 طرفِ جنُوب بَیرَق و خَیمه‌گاهِ رئوبین دَ مُطابِقِ لشکر های ازوا بَشه و رهبرِ مردُمِ رئوبین اِلِیصُور باچِه شِدیئور بَشه. 11 کسای که دَ لشکرِ ازُو حِساب شُد، چِل و شَش هزار و پَنج صد نفر بُود.
12 کسای که دَ پالُوی ازوا باید خَیمه بِزَنه، طایفِه شِمعون بَشه؛ رهبرِ مردُمِ شِمعون شلُومِیئیل باچِه صُوری‌شَدای بَشه. 13 کسای که دَ لشکرِ ازُو حِساب شُد، پِنجاه و نُه هزار و سِه صد نفر بُود.
14 طایفِه جاد ام دَ پالُوی ازوا بَشه؛ رهبرِ مردُمِ جاد اِلیاساف باچِه رعوئیل بَشه. 15 کسای که دَ لشکرِ ازُو حِساب شُد، چِل و پَنج هزار و شَش صد و پِنجاه نفر بُود.
16 تِعدادِ پگِ کسای که دَ خَیمه‌گاهِ سَمتِ رئوبین مُطابِقِ لشکر های خُو حِساب شُد، یگ صد و پِنجاه و یگ هزار و چار صد و پِنجاه نفر بُود. اُونا باید دوّم کوچ کُنه.
17 بعد ازُو خَیمِه مُلاقات قد خَیمه‌گاهِ لاویا دَ مینکلِ خَیمه‌گاه های دِیگه کوچ کُنه. اُونا امُو رقم که خَیمه مِیزَنه، امُو رقم هر کُدَم شی باید دَ مَوقعیت خُو دَ زیرِ بَیرَق خُو حَرکت کُنه.
18 طرفِ غَرب بَیرَق و خَیمه‌گاهِ اِفرایم دَ مُطابِقِ لشکرهای ازوا بَشه و رهبرِ مردُمِ اِفرایم اِلِیشَمَع باچِه عمِیهُود بَشه. 19 کسای که دَ لشکرِ ازُو حِساب شُد، چِل هزار و پَنج صد نفر بُود.
20 کسای که دَ پالُوی ازوا بَشه، طایفِه مَنَسّی اَسته؛ رهبرِ مردُمِ مَنَسّی جَمَلِیئیل باچِه فدهصُور بَشه. 21 کسای که دَ لشکرِ ازُو حِساب شُد، سی و دُو هزار و دُو صد نفر بُود.
22 طایفِه بِنیامِین ام دَ پالُوی ازوا بَشه؛ رهبرِ مردُمِ بِنیامِین اَبِیدان باچِه جدعونی بَشه. 23 کسای که دَ لشکرِ ازُو حِساب شُد، سی و پَنج هزار و چار صد نفر بُود.
24 تِعدادِ پگِ کسای که دَ خَیمه‌گاهِ سَمتِ اِفرایم مُطابِقِ لشکرهای خُو حِساب شُد، یگ صد و هشت هزار و یگ صد نفر بُود. اُونا باید سِوّم کوچ کُنه.
25 طرفِ شمال بَیرَق و خَیمه‌گاهِ دان مُطابِقِ لشکرای ازوا بَشه؛ رهبرِ مردُمِ دان اَخی‌عِزِر باچِه عمِیشَدای بَشه. 26 کسای که دَ لشکرِ ازُو حِساب شُد، شصت و دُو هزار و ھفت صد نفر بُود.
27 کسای که دَ پالُوی ازوا باید خَیمه بِزَنه، طایفِه اَشِیر بَشه؛ رهبرِ مردُمِ اَشِیر فَجعِیئیل باچِه عُکران بَشه. 28 کسای که دَ لشکرِ ازُو حِساب شُد، چِل و یگ هزار و پَنج صد نفر بُود.
29 طایفِه نَفتالی ام دَ پالُوی ازوا بَشه؛ رهبرِ مردُمِ نَفتالی اَخِیرَع باچِه عینان بَشه. 30 کسای که دَ لشکرِ ازُو حِساب شُد، پِنجاه و سِه هزار و چار صد نفر بُود.
31 تِعدادِ پگِ کسای که دَ خَیمه‌گاهِ سَمتِ دان حِساب شُد؛ یگ صد و پِنجاه و ھفت هزار و شَش صد نفر بُود. اُونا باید دَ زیرِ بَیرَق های خُو آخِر کوچ کُنه.“
32 اینَمیا حِساب شُده های بَنی اِسرائیل دَ مُطابِقِ خانَوار های بابه‌کَلونای ازوا بُود؛ تِعدادِ پگِ کسای که دَ خَیمه‌گاه ها دَ لشکرای خُو حِساب شُد، شَش صد و سِه هزار و پَنج صد و پِنجاه نفر بُود. 33 لیکِن لاویا دَ مینکلِ بَنی اِسرائیل حِساب نَشُد، امُو رقم که خُداوند دَ مُوسیٰ اَمر کدُد. 34 پس بَنی اِسرائیل هر چِیزی ره که خُداوند دَ مُوسیٰ اَمر کدُد، انجام دَد. دَمزی ترتِیب اُونا دَ نزدِیکِ بَیرَق خُو خَیمه مِیزَد و دَ وختِ کوچ کدو هر کُدَم شی قد اَولادِ بابه و خانَوارِ بابه‌کَلون خُو حَرکت مُوکد.