عدَد‌ها 3

فصلِ سِوّم

سرشُماری و مُقرَر شُدونِ لاویا بَلدِه خِدمت

‏1 اِی دَ بارِه نسلِ هارُون و دَ بارِه مُوسیٰ اَسته از زمانی که خُداوند دَ کوهِ سِینا قد مُوسیٰ توره گُفت. ‏2 نام های باچه های هارُون اینیا اَسته: ناداب باچِه اوّلباری، اَبِیهُو، اِلعازار و اِیتامار. ‏3 اینَمیا نام های باچه های هارُون بُود که پیشوایونِ مَسَح شُده بُود و مُقرَر شُدُد تا دَ عنوانِ پیشوایو خِدمت کنه. ‏4 از جمِ ازوا ناداب و اَبِیهُو دَ حُضُورِ خُداوند مُرد، چراکه اُونا دَ بیابونِ سِینا آتِشِ غَیرِ مجاز ره دَ حُضُورِ خُداوند تقدِیم کد؛ و اُونا هیچ اَولاد نَدَشت. مگم اِلعازار و اِیتامار دَ حُضُورِ آتِه خُو هارُون دَ عِنوان پیشوایو خِدمت مُوکد.

‏5 خُداوند قد مُوسیٰ گپ زَده گُفت: ‏6 ”طایفِه لاوی ره نزدِیک اَوُرده دَ پیشِ هارُون پیشوا حاضِر کُو تا اُونا دَز شی کومَک کُنه. ‏7 اُونا وظِیفِه خُو ره بَلدِه ازُو و بَلدِه تمامِ جماعتِ بَنی اِسرائیل دَ پیشِ رُوی خَیمِه مُلاقات انجام دَده دَ جایگاهِ مُقَدَّس خِدمت کُنه؛ ‏8 اُونا مسئُولِ تمامِ اَسبابِ خَیمِه مُلاقات بَشه و وظِیفِه خُو ره بَلدِه بَنی اِسرائیل انجام دَده دَ جایگاهِ مُقَدَّس خِدمت کُنه. ‏9 لاویا ره دَ هارُون و باچه های شی تسلِیم کُو؛ اُونا از مینکلِ بَنی اِسرائیل کامِلاً دَزُو دَده شُده. ‏10 ھارُون و باچه های شی ره مُقرَر کُو تا اُونا وظِیفِه پیشوایی خُو ره دَ جای بَیره، بغَیرِ ازوا هر نفرِ دِیگه که بَلدِه وظِیفِه پیشوایی نزدِیک بییه، باید کُشته شُنه.“

‏11 و خُداوند قد مُوسیٰ گپ زَده گُفت: ‏12 ”اینه، ما لاویا ره از مینکلِ بَنی اِسرائیل دَ عِوَضِ تمامِ باچه های اوّلباری بَنی اِسرائیل که رَحم ره واز کده، بَلدِه مقصد خُو اِنتِخاب کدیم. پس لاویا از مه اَسته، ‏13 چراکه پگِ اوّلباری ها از مه یَه. وختِیکه تمامِ اوّلباری ها ره دَ سرزمِینِ مِصر کُشتُم، ما تمامِ اوّلباری های اِسرائیل ره بَلدِه خُو تقدِیس کدُم، ام اِنسان و ام حَیوان ره؛ اُونا دَز مه تعلُق دَره. ما خُداوند اَستُم.“

‏14 اوخته خُداوند قد مُوسیٰ دَ بیابونِ سِینا گپ زَده گُفت: ‏15 ”لاویا ره دَ مُطابِقِ خانَوار های بابه‌کَلونا و اَولادِ بابه های ازوا حِساب کُو؛ هر باچِه یگ ماهه و باله‌تَر ره حِساب کُو.“ ‏16 پس مُوسیٰ اُونا ره دَ مُطابِقِ تورِه خُداوند حِساب کد، امُو رقم که دَ بَلِه ازُو اَمر شُدُد.

‏17 باچه های لاوی مُطابِقِ نام های خُو اینیا بُود: جِرشون، قُهات و مِراری. ‏18 نام های باچه های جِرشون مُطابِقِ اَولادِ بابه های ازوا اینیا بُود: لِبنی و شِمعی. ‏19 باچه های قُهات مُطابِقِ اَولادِ بابه های ازوا اینیا بُود: عَمرام، یصهار، حِبرون و عُزِیئیل. ‏20 باچه های مِراری مُطابِقِ اَولادِ بابه های ازوا اینیا بُود: مَحلی و مُوشی. اینَمیا اَولادِ بابه های لاویا دَ مُطابِقِ خانَوار های بابه‌کَلونای ازوا بُود.

‏21 از جِرشون اَولادِ بابِه لِبنی و اَولادِ بابِه شِمعی دَ وجُود اَمَد؛ اینَمیا اَولادِ بابه های جِرشونی بُود. ‏22 کسای که از جَمِ ازوا حِساب شُد، تِعدادِ پگِ باچه های یگ ماهه و باله‌تَر و پگِ مَردای ازوا ھفت هزار و پَنج صد نفر بُود. ‏23 اَولادِ بابه های جِرشونی دَ پُشتِ جایگاهِ مُقَدَّس طرفِ غَرب خَیمه مِیزَد؛ ‏24 اِلیاساف باچِه لایل کٹِه خانَوارِ بابه‌کَلونای جِرشونیا بُود. ‏25 وظِیفِه اَولادِه جِرشون دَ خَیمِه مُلاقات، اینی کارا بُود: کوچ دَدو و نِگاهداری خَیمِه مُقَدَّس و پوشِشِ خَیمه، پردِه درگِه خَیمِه مُلاقات، ‏26 پرده های چاردیوالی حَولی، پردِه درگِه حَولی که خَیمِه مُقَدَّس و قُربانگاه دَ مَنِه شی بُود، ریسپونای شی و هر خِدمتی که مربُوطِ امزیا مُوشُد.

‏27 از قُهات، اَولادِ بابِه عَمرامیا، اَولادِ بابِه یصهاریا، اَولادِ بابِه حِبرونیا و اَولادِ بابِه عُزِیئیلیا دَ وجُود اَمَد؛ اینَمیا اَولادِ بابه های قُهاتی بُود. ‏28 کسای که از جمِ ازوا حِساب شُد، تِعدادِ پگِ باچه های یگ ماهه و باله‌تَر و پگِ مَردای ازوا هشت هزار و شَش صد نفر بُود. وظِیفه های ازوا دَ مَنِه جایگاهِ مُقَدَّس بُود. ‏29 اَولادِ بابه های قُهاتی طرفِ جنُوبِ جایگاهِ مُقَدَّس خَیمه مِیزَد. ‏30 ایلِیصافان باچِه عُزِیئیل کٹِه خانَوارِ بابه‌کَلونای اَولادِ بابه های قُهاتیا بُود. ‏31 وظِیفِه ازوا اینی کارا بُود: مسئُولیَتِ صندُوقِ شهادَت، میز، چِراغدان، قُربانگاه ها، ظرف ها-و-اَسبابِ جایگاهِ مُقَدَّس که پیشوایو بَلدِه خِدمت کدو ازوا کار مِیگِرِفت، پردِه مُقَدَّستَرِین جای و هر خِدمتی که مربُوطِ ازوا مُوشُد. ‏32 اِلعازار باچِه هارُون پیشوا کٹِه رھبرای لاویا بُود و ناظِرِ کسای که دَ جایگاهِ مُقَدَّس وظِیفه دَشت.

‏33 از مِراری اَولادِ بابِه مَحلی و اَولادِ بابِه مُوشی دَ وجُود اَمَد؛ اینَمیا اَولادِ بابِه های مِراری بُود. ‏34 کسای که از جمِ ازوا حِساب شُد، تِعدادِ پگِ باچه های یگ ماهه و باله‌تَر و پگِ مَردای ازوا شَش هزار و دُو صد نفر بُود. ‏35 صُورِیئیل باچِه اَبِیحایل کٹِه خانَوارِ بابه‌کَلونای اَولادِ بابه های مِراری بُود. اُونا طرفِ شمالِ جایگاهِ مُقَدَّس خَیمه مِیزَد. ‏36 وظِیفِه که دَ اَولادِه مِراری دَده شُد، اینی کارا بُود: مسئُولیَتِ چَوکات های خَیمِه مُقَدَّس، پُشت بند ھای شی، ستُونھای شی، پایه ھای شی، تمامِ اَسبابِ ازوا و پگِ خِدمت های که مربُوطِ ازوا مُوشُد؛ ‏37 امچُنان مسئُولیَتِ ستُونھای چارطرفِ حَولی، پایه ھای ازوا، میخا و ریسپونای ازوا.

‏38 پیشِ رُوی جایگاهِ مُقَدَّس طرفِ شَرق، یعنی پیشِ رُوی خَیمِه مُلاقات طرفِ آفتَو بُرشُد مُوسیٰ و ھارُون و باچه های شی خَیمه مِیزَد؛ اُونا وظِیفِه جایگاهِ مُقَدَّس ره انجام دَده مَراسِمِ عِبادتِ بَنی اِسرائیل ره دَ جای میوُرد؛ بغَیر ازوا ھر نفرِ دِیگه که نزدِیک میمَد، باید کُشته مُوشُد. ‏39 پگِ کسای که از جَمِ لاویا حِساب شُد، یعنی کسای ره که مُوسیٰ و هارُون مُطابِقِ اَولادِ بابه های ازوا دَ اَمرِ خُداوند حِساب کد، پگِ باچه های یگ ماهه و باله‌تَر و پگِ مَردای ازوا بِیست و دُو هزار نفر بُود.

‏40 اوخته خُداوند دَ مُوسیٰ گُفت: ”پگِ اوّلباری بَنی اِسرائیل ره یعنی باچه های یگ ماهه و باله‌تَر و مَردای ازوا ره حِساب کُو و تعدادِ نام ھای ازوا ره ثَبت کُو. ‏41 لاویا ره دَ عِوَضِ تمامِ اوّلباری های بَنی اِسرائیل بَلدِه ازمه بِگِیر و چارپایای لاویا ره دَ عِوَضِ تمامِ اوّلباری های چارپایای بَنی اِسرائیل. ما خُداوند اَستُم.“ ‏42 پس مُوسیٰ امُو رقم که خُداوند دَزُو اَمر کدُد، پگِ اوّلباری ها ره دَ مینکلِ بَنی اِسرائیل حِساب کد. ‏43 تِعدادِ پگِ اوّلباری ها که نام های ازوا حِساب شُد یعنی باچه های یگ ماهه و باله‌تَر و مَردا، بِیست و دُو هزار و دُو صد و هفتاد و سِه نفر بُود.

‏44 بعد ازُو خُداوند قد مُوسیٰ گپ زَده گُفت: ‏45 ”لاویا ره دَ عِوَضِ پگِ اوّلباری های بَنی اِسرائیل و چارپایای لاویا ره دَ عِوَضِ چارپایای ازوا بِگِیر؛ لاویا از مه اَسته. ما خُداوند اَستُم. ‏46 بَلدِه بازخرِیدِ دُو صد و هفتاد و سِه نفر اوّلباری بَنی اِسرائیل که از تِعدادِ لاویا کده اِضافه شُده، ‏47 از هر کُدَم شی پَنج مِثقال نُقره دَ مُطابِقِ مِثقالِ جایگاهِ مُقَدَّس که بِیست گیراه یگ مِثقال مُوشه، بِگِیر ‏48 و نُقرِه بازخرِیدِ کسای ره که از تِعدادِ لاویا کده اِضافه شُده، دَ ھارُون و باچه های شی بِدی.“ ‏49 پس مُوسیٰ نُقرِه بازخرِید ره از کسای گِرِفت که اِضافه شُدُد و دَ جمِ کسای نَبُود که دَ وسِیلِه لاویا بازخرِید شُدُد؛ ‏50 اُو نُقره ره از اوّلباری های بَنی اِسرائیل گِرِفت که یگ هزار و سِه صد و شصت و پَنج مِثقال نُقره دَ مُطابِقِ مِثقالِ جایگاهِ مُقَدَّس بُود، ‏51 و مُوسیٰ نُقرِه بازخرِید ره دَ مُطابِقِ تورِه خُداوند دَ هارُون و باچه های شی دَد، امُو رقم که خُداوند دَ مُوسیٰ اَمر کدُد.