عدَدها
کِتابِ تَورات - بَخشِ چارُم
فصلِ اوّل
اوّلِین سرشُماری مَردای بَنی اِسرائیل که مِیتنِست شامِل لشکر شُنه
1 دَ اوّلِین روزِ ماهِ دوّمِ سالِ دوّم بعد از بُر شُدونِ بَنی اِسرائیل از سرزمِینِ مِصر، خُداوند دَ بیابونِ سِینا دَ خَیمِه مُلاقات قد مُوسیٰ گپ زَده گُفت: 2 ”تمامِ جماعتِ بَنی اِسرائیل ره دَ مُطابِقِ اَولادِ بابه ها و خانَوار های بابه‌کَلونای ازوا سرشُماری کُنِید و تِعدادِ نام های پگِ مَردا ره یگ یگ، ثَبت کُنِید. 3 مَردای بِیست ساله و باله‌تَر ره، یعنی هر کسی ره که از اِسرائیل بِتَنه دَ جنگ بوره، تُو و هارُون دَ لشکر های ازوا حِساب کُنِید. 4 از هر طایفه باید یگ نفر قد شُمو بَشه که هر کُدَم شی کٹِه خانَوارِ بابه‌کَلونای خُو بَشه. 5 نام های کسای که باید قد شُمو بَشه اینیا اَسته:
از طایفِه رئوبین، اِلِیصُور باچِه شِدیئور؛
6 از طایفِه شِمعون، شلُومِیئیل باچِه صُوری‌شَدای؛
7 از طایفِه یهُودا، نَحشون باچِه عمِیناداب؛
8 از طایفِه یسّاکار، نَتَنئیل باچِه صوعَر؛
9 از طایفِه زِبُولُون، اِلیاب باچِه حیلون.
10 از اَولادِه یوسُف:
از طایفِه اِفرایم، اِلِیشَمَع باچِه عمِیهُود؛
از طایفِه مَنَسّی، جَمَلِیئیل باچِه فدهصُور؛
11 از طایفِه بِنیامِین، اَبِیدان باچِه جدعونی؛
12 از طایفِه دان، اَخی‌عِزِر باچِه عمِیشَدای؛
13 از طایفِه اَشِیر، فَجعِیئیل باچِه عُکران؛
14 از طایفِه جاد، اِلیاساف باچِه دعوئیل؛
15 از طایفِه نَفتالی، اَخِیرَع باچِه عینان.“
16 اینَمیا کسای بُود که از جماعتِ بَنی اِسرائیل اِنتِخاب شُد و رهبرای طایفه های بابه‌کَلونای خُو بُود؛ هر کُدَم امزیا سرکردِه دِسته های هزار نفری اِسرائیل بُود.a 17 پس مُوسیٰ و هارُون امی کسا ره که نام های شی مُشَخَص شُدُد، قد خُو گِرِفت 18 و دَ روزِ اوّلِ ماهِ دوّم، پگِ جماعت ره جَم کد. اوخته مردُم خودون ره دَ مُطابِقِ اَولادِ بابه ها و خانَوار های بابه‌کَلونای خُو ثَبت کد که مَردای بِیست ساله و باله‌تَر نام شی یگ یگ ثَبت شُد، 19 امُو رقم که خُداوند دَ مُوسیٰ اَمر کدُد. پس مُوسیٰ اُونا ره دَ بیابونِ سِینا حِساب کد.
20 نتِیجِه سرشُماری اینی بُود:
از اَولادِه رئوبین باچِه اوّلباری اِسرائیل، نام های مَردای بِیست ساله و باله‌تَر، پگِ کسای که مِیتنِست دَ جنگ بوره، دَ مُطابِقِ پُشت نامه ها، اَولادِ بابه ها و خانَوارِ بابه‌کَلونای ازوا، یگ یگ حِساب شُد: 21 تِعدادِ حِساب شُده های طایفِه رئوبین چِل و شَش هزار و پَنج صد نفر بُود.
22 از اَولادِه شِمعون، نام های مَردای بِیست ساله و باله‌تَر، پگِ کسای که مِیتنِست دَ جنگ بوره، دَ مُطابِقِ پُشت نامه ها، اَولادِ بابه ها و خانَوارِ بابه‌کَلونای ازوا، یگ یگ حِساب شُد: 23 تِعدادِ حِساب شُده های طایفِه شِمعون پِنجاه و نُه هزار و سِه صد نفر بُود.
24 از اَولادِه جاد، نام های مَردای بِیست ساله و باله‌تَر، پگِ کسای که مِیتنِست دَ جنگ بوره، دَ مُطابِقِ پُشت نامه ها، اَولادِ بابه ها و خانَوارِ بابه‌کَلونای ازوا حِساب شُد: 25 تِعدادِ حِساب شُده های طایفِه جاد چِل و پَنج هزار و شَش صد و پِنجاه نفر بُود.
26 از اَولادِه یهُودا، نام های مَردای بِیست ساله و باله‌تَر، پگِ کسای که مِیتنِست دَ جنگ بوره، دَ مُطابِقِ پُشت نامه ها، اَولادِ بابه ها و خانَوارِ بابه‌کَلونای ازوا حِساب شُد: 27 تِعدادِ کسای که از طایفِه یهُودا حِساب شُد، هفتاد و چار هزار و شَش صد بُود.
28 از اَولادِه یسّاکار، نام های مَردای بِیست ساله و باله‌تَر، پگِ کسای که مِیتنِست دَ جنگ بوره، دَ مُطابِقِ پُشت نامه ها، اَولادِ بابه ها و خانَوارِ بابه‌کَلونای ازوا حِساب شُد: 29 تِعدادِ کسای که از طایفِه یسّاکار حِساب شُد، پِنجاه و چار هزار و چار صد نفر بُود.
30 از اَولادِه زِبُولُون، نام های مَردای بِیست ساله و باله‌تَر، پگِ کسای که مِیتنِست دَ جنگ بوره، دَ مُطابِقِ پُشت نامه ها، اَولادِ بابه ها و خانَوارِ بابه‌کَلونای ازوا حِساب شُد: 31 تِعدادِ کسای که از طایفِه زِبُولُون حِساب شُد، پِنجاه و هفت هزار و چار صد نفر بُود.
32 از باچه های یوسُف:
از اَولادِه اِفرایم، نام های مَردای بِیست ساله و باله‌تَر، پگِ کسای که مِیتنِست دَ جنگ بوره، دَ مُطابِقِ پُشت نامه ها، اَولادِ بابه ها و خانَوارِ بابه‌کَلونای ازوا حِساب شُد: 33 تِعدادِ کسای که از طایفِه اِفرایم حِساب شُد، چِل هزار و پَنج صد نفر بُود.
34 از اَولادِه مَنَسّی، نام های مَردای بِیست ساله و باله‌تَر، پگِ کسای که مِیتنِست دَ جنگ بوره، دَ مُطابِقِ پُشت نامه ها، اَولادِ بابه ها و خانَوارِ بابه‌کَلونای ازوا حِساب شُد: 35 تِعدادِ کسای که از طایفِه مَنَسّی حِساب شُد، سی و دُو هزار و دُو صد نفر بُود.
36 از اَولادِه بِنیامِین، نام های مَردای بِیست ساله و باله‌تَر، پگِ کسای که مِیتنِست دَ جنگ بوره، دَ مُطابِقِ پُشت نامه ها، اَولادِ بابه ها و خانَوارِ بابه‌کَلونای ازوا حِساب شُد: 37 تِعدادِ کسای که از طایفِه بِنیامِین حِساب شُد، سی پَنج هزار و چار صد نفر بُود.
38 از اَولادِه دان، نام های مَردای بِیست ساله و باله‌تَر، پگِ کسای که مِیتنِست دَ جنگ بوره، دَ مُطابِقِ پُشت نامه ها، اَولادِ بابه ها و خانَوارِ بابه‌کَلونای ازوا حِساب شُد: 39 تِعدادِ کسای که از طایفِه دان حِساب شُد، شصت و دُو هزار و هفت صد نفر بُود.
40 از اَولادِه اَشِیر، نام های مَردای بِیست ساله و باله‌تَر، پگِ کسای که مِیتنِست دَ جنگ بوره، دَ مُطابِقِ پُشت نامه ها، اَولادِ بابه ها و خانَوارِ بابه‌کَلونای ازوا حِساب شُد: 41 تِعدادِ کسای که از طایفِه اَشِیر حِساب شُد، چِل و یگ هزار و پَنج صد نفر بُود.
42 از اَولادِه نَفتالی، نام های مَردای بِیست ساله و باله‌تَر، پگِ کسای که مِیتنِست دَ جنگ بوره، دَ مُطابِقِ پُشت نامه ها، اَولادِ بابه ها و خانَوارِ بابه‌کَلونای ازوا حِساب شُد: 43 تِعدادِ کسای که از طایفِه نَفتالی حِساب شُد، پِنجاه و سِه هزار و چار صد نفر بُود.
44 اینَمیا کسای بُود که حِساب شُد، کسای که مُوسیٰ و هارُون دَ کومَکِ دوازده رهبرِ اِسرائیل اُونا ره حِساب کد؛ هر کُدَم امزُو دوازده نفر از خانَوارِ بابه‌کَلون خُو نُمایندَگی مُوکد. 45 تعدادِ تمامِ بَنی اِسرائیل که بِیست ساله و باله‌تَر بُود و هر کُدَم شی مِیتنِست دَ لشکرِ اِسرائیل دَ جنگ بوره، مُطابِقِ خانَوارِ بابه‌کَلونای ازوا حِساب شُد. 46 تِعدادِ حِساب شُده ها شَش صد و سِه هزار و پَنج صد و پِنجاه نفر بُود.
47 لیکِن لاویا مُطابِقِ طایفِه بابه‌کَلونای خُو قد ازوا حِساب نَشُد، 48 چُون خُداوند قد مُوسیٰ گپ زَده گُفتُد: 49 ”طایفِه لاوی ره حِساب نَکُو و اُونا ره قد بَنی اِسرائیل شامِلِ سرشُماری نَکُو. 50 بَلکِه لاویا ره مسئُولِ جایگاهِ صندُوقِ شهادَتb و تمامِ اَسباب شی و هر چِیزی که دَزُو تعلُق دَره تعیِین کُو؛ اُونا وظِیفه دَره که جایگاه و تمامِ اَسباب شی ره کوچ بِدیه و ازُو نِگاهداری کُنه و دَ گِرد-و-بَر شی خَیمِه بِزَنه. 51 وختِیکه جایگاه کوچ دَدَنی مُوشه، لاویا باید اُو ره جَم کُنه و غَیتِیکه جایگاه ایستَلجی کدَنی مُوشه، لاویا باید اُو ره ایستَلجی کُنه. بغَیر ازوا هر کسِ دِیگهc که دَ جایگاه نزدِیک شُنه، باید کُشته شُنه. 52 بَنی اِسرائیل ھر کُدَم شی باید دَ خَیمه‌گاهِ خود خُو و دَ نزدِیکِ بَیرَقِ خود خُو قد لشکر خُو خَیمه بِزَنه؛ 53 لیکِن لاویا باید دَ گِرد-و-بَرِ جایگاهِ صندُوقِ شهادَت خَیمه بِزَنه تا غَضَب مه دَ بَلِه جماعتِ بَنی اِسرائیل نازِل نَشُنه؛ و لاویا وظِیفه دَره که از جایگاهِ صندُوقِ شهادَت نِگاهوانی کُنه.“ 54 پس بَنی اِسرائیل امُو رقم کد؛ اُونا هر چِیزی ره که خُداوند دَ مُوسیٰ اَمر کدُد، دَ جای اَوُرد.