Doia nibikiek nibindei timek siceu nyati
144
1 Doia Daud.Ma jikon TUHAN di ya srak ko hagau da ninyenga! Noni pingok da tut nihwen munti bingginau da tut nikon pranti.
2 Noni ne No di mpu da kin No di ya srak ko hagau da kin No di teu da bidingwes ngun kin mpia di diya coi nya ri. Noni nyohou da binok mpia di dinang coi lene bindei ba, ngkiai nya ibou cut bida.
3 TUHAN e, apo tungwatu ne mindei rin i? Apino bitig dino angig ayai kep noni i? Apo no di bindei dino angig ayai kep noni dima ne tou rin i?
4 No dima dem kep ninnei di tau nuhwap nsi kin ningwes di kigyei he.
5 TUHAN e, akau Ade mpia-bbed him ba, ajuk kwei ba, angget nungug nya leu binhyepo nimmup brou bikui.
6 Acom Ade kigyei kep Ade siceu nya leu binhyepo abintek gimahap yok binang. Akri Ade tibor ba, akes igkep yok leu binhyepo idrui sut.
7 Asu anda kwei leu gwamti ba, ateu da bidingwes ngun leu minyei di su. Ateu da bidingwes ngun leu ngkiai nya inda nsi.
8 Yo dima ipai-pai wai biris mun igkei ba, iba neheng boom biei kep nikei nya cem.
9 Allah e, apingok dingonti tut doia nijep ba, dikek nggong mbrei tirigi dipai doia dima biNa.
10 Abindei ba, nibou ndig nya ibindei timek ide siceu nya ba, abikwek Ade awak di dani cem.
11 Abindei bidingwes ngun leu siceu di isibut bibor nya ide singau simeda ninggwenti. Ateu da bidingwes ngun leu mben ngkiai di ipai-pai wai di iris mun igkei ba, iba neheng boom biei kep nikei nya cem inda nsi.
12 Ma asindui sut ba, nyeni nipmot bat nya idem kep ndia kioi di hei bindig nut mem nijam di ipilei ug. Ba, nipmisop bat nya idem kep dihim di ubbu ngat di ibimau ig nibou ndig de nuhuisi nya.
13 Asindui sut ba, nyende ig gudan nya mpung tut ningat ninyeng hagom ba, domba ngot di igya sus ndigsi nya cem ibep ba, imangti ug ei ningot sribu-ribu.
14 Asindui sut ba, nyende sapi nya nimangti kum eisi kikau lene hi di pror ba, nipmot tis bi cem. Asindui sut ba, nimiap nahara niweisi kak puig ngot di jo bidem nyende minu ndig bi.
15 Mun dini yok hagom mibindei ba, mben dima ingon nggei-hi-nggei. Limwa di ide Allah ne TUHAN rin cem mingon nggei-hi-nggei!