Nadi nahara mem Allah nimpu noti
143
1 Doia Daud.TUHAN e, amiap kep ditde nadi ba, angig atingou mem ditde nahara Nati. Aba Ade ningon gomti kin Ade ningon sren-srausi bibuhup dihyet.
2 Ma ambus Ade awak di dani dingonti au. Lewo hi di ningon ngun ei ayai him bi.
3 Ditde siceu huk-huk nyen da ba, bindei timek da tu. Noni kat da bicom da ei ig bui nsi di dindi-kai ba, didem kep nimai di itig mimbrek tu.
4 Dingon dahat leu ba, dingon tai-tai bou tu.
5 Dikan kep njap gi nipousi nya. Dibisrip tut Ade niyai munti nya bidikan-kan nyen tut Ade midyai di abon bou anda him nya hagom.
6 Disu dinda bidingat nadi biNa. Dingon dem kep nok dihyei di ngak-cai ba, dibimbeu sut Nani.
7 TUHAN e, abipbur ba, abuhup dihyet lewo dingon wei bibor. Ma aku Na bijo nding leu da au. Leu gi nok ne didem kep yo di ijuk ug ei minu nimai ide.
8 Awin kep dingonti tut Ade ningon ngakeisi bikwop njap tekti lewo diba dingon com Nani tu. Ando puig di suar dimbut kak bida lewo dingat nadi biNa.
9 TUHAN e, dihwou ya ei Aho bei mem gima digwam coi Nani. Akwek da leu ditde siceu nya inda nsi.
10 Angginau da leu binhyepo diyai igbit angon kanti lewo Nani ne ditde Allah ri. Ma asingat tut da ba, abie tut da kak puig di sur yam kei.
11 TUHAN e, ateu da bidingwes ngun bit leu nok apreu ei mem dati. Akwek da leu mun di buhun tak da tug hon Ade nisingat tut dati.
12 Asiber siceu nya yahagom inggrom drek dip Ade ningon ngakei dati. Abindei sar yo di ico kep da nya yahagom lewo dani ne Ade awak ri.