SRAT AYUB
NIHYET GI BIBIE TUT
Srat Ayub pai sut mun di buhun bibor di cut igkep tungwagom di ningon kwes kei. Nimunggwom bat nya yahagom imai kros lene nide awak nya kin nide mindhe-ndhe nya hagom sar bingwig leu noni lene buhwei com ningkek dip titut yam ba, hagom cut igkep noni mem njap gom ngat. Srat dini pai sut notou Ayub kin nisut bat nya ibou ningai ibuhup biyam tut mun di buhun bibor dima. Allah de nibibon tungwatu nyati jo nibreisi tug hon yo dini ide nibuhup biyamti ba, gima bon ninyeng mem nye. Leu api Allah ndo Nonti bak Ayub ei srat ninggrupti.
Ayub nisut bat nya ipai mingat tut mun di cut igkep noni bit leu yonti ingon dor niti tut Allah niyai kepti nya. Yoni ikan bigya Allah njei mun di kei bak yo di ingon kwes lene kes hukum ei yo di imbuk nya dip bit leu nok igyai kepti nya. Gima rino ikan bigya mun di buhun cut igkep Ayub lewo noni bon sisar. Noro Ayub srep tut ide nimbus kep ningonti nok gima. Mun di cut igkep noni dem mem bi lewo noni ta nibou ei niyai munti di kwes kei nya dor njiriek nindigsi nya. Ningon kiowi tut Allah de nibibon noti. Nggon rino Allah sindui sut mun di buhun bibor dima bicut igkep no di ningon kwes kei i? Leu api Ayub brim ningkek bisrep huk Allah. Noni krau kep nide niba ningon com Allahti kikau. Noro noni joi sut bipia Allah pai sut noni bipia ningon kwes kei lene suar tungwatu nya cem iba ingon srip huk noni bipia no di ningon kwes kei.
Allah buhup Ayub ningon kiowiti nya bi. Noro Noni buhup Ayub niba ningon comti tug hon gi ndo Nide nisindemti kin ningon di ki di mindur nya bak noni. Gima rino Ayub kuk no bak Allah ningon kiti kin nikei-kau-keisi cem. Leu api noni ttin ser nihyet di wer mpiahi tut Allah kin nigga biborti.
Srat ninggrupti pai sut Allah di bindei ba, Ayub bon nimunggwom bat nya hi kin bu binyeng tut ndigban nindig bibor dor njiriek mun po sar leu noni habiei ei nimbie him pima hanyen. Allah sinsam Ayub nisut bat nya drek dip gi yoni ingon dorti tut mun di buhun di cut igkep Ayub pima bi. Ayub nongkom ningon dorti tut Allah niyai kepti kin nisinati nya lewo hagom kei bibor kei. Noro nisut bat nya ingon gidor niti tut Allah niyai kepti kin nisinati nya bi sren.
Nirop Ninda Ndigsi
Mun di Ayub nyeng tut nya hagom sar leu noni bihigom 1:1--2:13
Ayub kin nisut bat nya ihig kiek yamti 3:1--31:40
a. Ayub lua sok tut mun di cut igkep noni 3:1-26
b. Iba ighyet dahat yam gi nigom 4:1--14:22
d. Iba ighyet dahat yam gi niningai 22:1--27:23
e. Ningon ki nikwei leusi 28:1-28
f. Ayub nisimbot datti ningwig honti 29:1--31:40
Elihu ngginau Ayub nya 32:1--37:24
TUHAN nibuhup Ayubti 38:1--42:6
Mun di pek kep mem Ayub ei ningwigsi 42:7-17