Ahasyweros kin Mordekhai inyeng jeisi
10
1 Nibou Ndig Ahasyweros bindei ba, nide limwa nya di ibong les him kin mios nya he igo belasten gau yonti bi. Noro mem yo di ibong mukti kin nungug him cem. 2 Nibon munti di mang bibor cem mindur cem kin nipui sut nikon Mordekhai di kui bigwam nok nibou di ninyeng jei cem hagom leu nimbie him kikau ug bipek ningwigsi jo ei srat nibohon nibou ndig minu Persia kin Media nyati. 3 Mordekhai di mben Yahudi yai ninyeng di jei ba, noni ne no di ya kui Nibou Ndig Ahasyweros binok nide wakil mem nijam di nibou ndig ninyeng tak kepti ri. Limwa Yahudi nya ingon kei sut Mordekhai ba, ibou cut binoni cem. Noni brim ningkek bibindei ba, nide mben ingwes ngun leu mun di cut igkep yok ba, ibong kei igwam kei cem. Ba, noni yai igbit niyaisi dima tut ide nintun him yamti di bram yam nya cem.