Mben Yahudi injei siceu bihwen ide niceu nya
9
1 Ug ei njap gi nisimnaibrimigningai mem Bed Adar. Gima ne tto bou mem gima igyai igbit nibou ndig de nicukti bicok tut mben Yahudi ri. Mben Yahudi ide nitok joti nya ibet ingon mem tto bou dima nitausi leu binhyepo icok tut yok bingwig. Noro ningat ne mben Yahudi rino ibindei timek ide nitok joti nya. 2 Mben Yahudi rino ibicom yam nok nimpung gom bidem minu ndig nya hagom bitindei ser ide nitok joti di ingon sibui bibor tut yok nya yahagom. Timiei nya bidem minu di tou minu di tou yahagom ittin tut yok apino bit bon tungwagom ngat leu timiei dima yok ikieti brim ningkek mem gima hwen mben Yahudi bi. 3 Nibou di inyeng jei bidem hanjop nsi nya kin nibou hanjop nsi nya kin yo di igya kui yok nya yahagom yuusap mben Yahudi lewo yahagom idigit tut Mordekhai. 4 Tungwatu nya yahagom ei ninyeng tak kepti dima ikan tut bipia Mordekhai bindei ba, timiei ig nibou ndig nya yahagom iba ingon com noni tu. Tug hon nisinati dima lene nide nisindemti kum eisi kikau. 5 Hi srep tut mben Yahudi bi apino igya kep ide nitok joti nya bit leu yonti ijoi sutti. Iba ide simeda bikon pran bit yok ba, ibihwen yok.6 Ei nituti dima lene mben Yahudi igyai nimai bak ibou sratus muhwi ei minu ndig Susan di nok minu Persia ninyeng tak kepti nibousi. 7-10 Ibou sratus muhwi di iwer nimbiam dima ne Haman di Hamedata nipmot di ba nitok bibor bak mben Yahudi pima nipmot bat nya ibou simnai ri. Yo dima inyeng rino Parsandata kin Dalfon kin Aspata kin Porata kin Adalya kin Aridata kin Parmasta kin Arisai kin Aridai kin Waizata. Noro mben Yahudi igipos ndigban di ide nya bi sren.
11 Njap dima ne tungwatu nya ipai sut yo di itug ndei nimai ei minu ndig Susan imangti hagom bak nibou ndig. 12 Lene noni pai bak Sop Nibou Ndig Ester <<Mben Yahudi igyai nimai bak timiei minu ndig Susan he imangti ibou sratus muhwi tu. Ibou sratus muhwi dima ne bitut Haman nipmot bat nya ibou simnai pima cem ei minu ndig Susan ningkom he rin yo. Ne gino iba yo di itug ndei nimai ei hanjop nsi nya bukum bu lene dor tunggwei bu! Bit bon igikan tut niya kep yokti ei hanjop nsi nya kan bi! Nogindini ahara da tut mindei bu i? Apai angon kanti bida hak ug. Lewo mporo atug ndei mun dima leu da ug.>>
13 Ester buhup <<Gino Na Di Anyeng Jei angon ngakei da lene ma asindui sut ba, mben Yahudi di ibong timiei ei minu ndig Susan ihwen bihi bu noyam kin gi ihwen yok di itug ndei nimai ei njap di ammani pima hanyen bu mem njap tekti di hyep bu. Lene ma ipindur Haman nipmot bat di iwer nimbiam nya cem ingut ei cou dihimti.>> 14 Pai nok rino nibou ndig cuk awak nya yuug bon igbit Ester nahara nibou ndigti. Leu api noni bindei hei srat nibicukti mem gima mben Yahudi di ibong ei minu ndig pmem Susan igya kep ide nitok joti mbigom kin bu ba, ibipindur Haman nipmot bat nya ibou simnai pima ingut cem. 15 Ba, limwa Yahudi di ibong ei minu ndig Susan injei siceu hanyen bigyai nimai bak timiei minu ndig Susan di ide nitok joti nya ibou sratus ningai bu ei njap gi nisimnaibrimigtai mem Bed Adar. Noro igipos ndigban di ide nya ei nihwen yokti gi nimbican dini cem bi.
16 Lene mben Yahudi di ibong bidem hanjop nsi nya cem injei siceu ba, ikon pran gau yonti leu api ibindei timek ide nitok joti nya. Ba, ibiyai nimai bak ide siceu nya ibou sribu ningot muhwindacan muhwi. Noro igipos ndigban di ide nya ei nihwen yokti dini bi. 17 Ibindei timek ide nitok joti nya ei njap gi nisimnaibrimigningai mem Bed Adar. Njap gi nisimnaibrimigtai gi bram bu lene mben Yahudi di ingat rin ei hanjop nsi nya igikon pran bit ide nitok joti nya bu bi. Noro iba ingon di nggan-triot kei bibon pesta kep njap ndig dima. 18 Lo bi lene mben Yahudi di ibong timiei ei minu ndig Susan ibon pesta kep njap ndig ei njap gi nisimnaimuhwidip lewo igyai nimai bak ide nitok joti nya ei njap gi nisimnaibrimigningai kin gi nisimnaibrimigtai ei Bed Adar. Leu api ikes hon ei njap gi nisimnaimuhwidip. 19 Gima rino mben Yahudi di ibong timiei ei minu mien nya ibon pesta dima ei njap gi nisimnaibrimigtai ei Bed Adar ba, gima ne ide njap gi ingon nggan-triot kei ri. Njap dima bon nituti mem ibon pesta ba, ibinjei njita di kei biyam cem.
Midut Njap Ndig Purim
20 Ikes inda tut gima leu api Mordekhai pas kep mun di pek kep mem yo dima hagom ei srat nyati bipinak srat nya tut bak mben Yahudi di ibong bidem minu Persia ninyeng tak kepti nisurti-nipekti hagom bitut yo di ibong minu ting kin yo di ibong dideu cem. 21 Noni ba srat dima bicuk yok leu binhyepo ibon midut njap ndig nibiyok ngon kep njap gi nisimnaibrimigtai kin gi nisimnaimuhwidip ei Bed Adar bikwop ari bingwam hagom. 22 Lewo ibindei timek ide nitok joti nya ei njap dima yok apino ningon nggukti kin ningon buhunti cut leu yoni ba, ningon nggei-hi-nggei kin ningon jo nyahan luei bu. Gima rino suar idem yam ei bibon midut niyem pesta bit yam bikwas njita tut yam cem tut yo di yuhui mbum nya cem ninyen. 23 Mben Yahudi igyai igbit Mordekhai nicuk yokti dima. Midut di ibon dima ne midut di ikos tut bikrau kep bikwop ari bingwam hagom ri.
Niprios bramti
24 Haman di Hamedata nipmot di ntun Agag him pima ba nitok bak mben Yahudi nindig bibor. Gima rino noni ko binggok tut njap tto bou mem gima timiei minu Persia igyai nimai bak mben Yahudi sinsiou. Ijem mun di iko di ibinggok tut dima ninyeng Purim. Haman tin ei ningon kanti mem gima cok tut yoni yahagom. 25 Noro Ester bisau buug ngat nibou ndig apino nibou ndig pas srat nibicukti ug a. Srat nibicukti dima ribindei dino Haman nitin ei ningon kanti di kinei bibor pima ngkwei hanyen di ndei nonti ug a. Niyai munti dima bindei ba, ipindur noni kin nipmot bat nya yahagom ei cou dihim nya di ibipindur tungwatu eisi hak ug a. 26 Gima rino ijem njap nindig dima ninyeng Njap Ndig Purim. Mordekhai de srat di pas tut mun di cut igkep yok nya, 27 bindei ba, ibon nicukti gom mem yonti njem kin ide nintun him yamti di bram yam nya kin yo di icoi bit yok nok limwa mben Yahudi nya cem yahagom. Suar ibon midut nibiyok ngon kep njap cin di Mordekhai kos tut ei dima bikwop ari bingwam hagom bit leu nicukti dima nitibimti. 28 Ikos tut bipia suar bikwop mben Yahudi ide ig bei nsi nya yahagom igyok ngon kep Njap Ndig Purim leu binhyepo ide nintun him yamti di bram yam nya di ibong bidem hanjop nsi kin minu ndig nya cem yahagom ibon midut nibiyok ngon kepti dima bijo ninno bijo kikau.
29 Ester di Abihail nipmisop di Sop Nibou Ndig dima pas srat gi nican cem bipinak bibit srat di Mordekhai pas. Sop Nibou Ndig ba srat di pas dima buusap Mordekhai tut mun di pas ei nide sratti di bitut Njap Ndig Purim. 30 Lene ipinak srat cin dima ug bak mben Yahudi yahagom. Lene ipas kep srat bokti dima bu ei srat di nibimbiti bit yam hi kin bu bipinak bidem hanjop nsi sratus gom ningot can ba, muhwindacan di coi minu Persia ninyeng tak kepti nisurti-nipekti hagom. Lene ingat nadi tindei srat dima leu binhyepo bindei ba, mben Yahudi yahagom ibong kei igwam kei. 31 Iba srat dima bipingok yok leu binhyepo ibon midut nibiyok ngon kep Njap Ndig Purimti ei njap di ikos tut ei tu. Gima bit leu nok ide midut nibiyok ngon kep nijam niyem njita bi mem nituti poisi kin nijam ningon nggukti cem. Nipas kepti dima jo ei srat cin di Mordekhai kin Sop Nibou Ndig Ester ipinak pimati. 32 Ipas kep Ester nicuk yokti di bikos tut Njap Ndig Purim di suar ikrau kep dima nimbutti ei srat kijumti.