Ester 8

Nicuk mben Yahuditi mem gima ihwen bit ide siceu nya

1 Njap dima ne Nibou Ndig Ahasyweros njei Haman de ndigban di nyeng tut nya hagom bak Sop Nibou Ndig Ester lewo Haman ne mben Yahudi ide nitok joti ri. Lene Ester pai sut bak nibou ndig bipia nitom rino Mordekhai a. Apino hon njap dima kwei lene nibou ndig kes nituti bak Mordekhai ba, mbro nok gino nibou ndig hig noni kwei bi lo, noni sindui sut ba, Mordekhai coi ug-coi kwei nyen biya ei noho bei bit leu nijoi sutti. 2 Nibou ndig pas srak mas pima hanyen leu Haman biyai bak Mordekhai bu. Lene Ester kon Mordekhai ba, ninyeng tak kep ndigban di Haman de nya hagom.

3 Gima leu lene Ester ug ngat nibou ndig hanyen bu. Noni kuk no biba nibiau bicom mpia ei nibou ndig noho bei lene ba nipim bahara nibou ndig leu binhyepo dip tut nide nikos tutti di kinei bibor di Haman di ntun Agag him bon bak mben Yahudi tu pima. 4 Nibou ndig krau nide tom mas bisu bak Ester leu api Ester kiju biya lene pai bak, 5 <<Gino Na Di Anyeng Jei angon ngakei ade awak di dani ba, angondut da lene ma abindei hei srat nibicukti di biciu ser Haman de srat ngot di bicuk ade limwa nya mem gima icok tut mben Yahudi di ingat rin ei ade ninyeng tak kepti nisurti-nipekti hagom pima. 6 Dem tut gima ade awak di dani dingat ade limwa nya ei ade ninyeng tak kepti dini icok tut ditde mben bitut yo di imbier kim da ba, imai sinsiou ei bi.>>

7 Leu api Nibou Ndig Ahasyweros pai bak Sop Nibou Ndig Ester kin Mordekhai <<Ningat ne dipindur Haman ei cou dihim pima drek dip gi ba ningon kanti di kinei bibindei sar mben Yahudi pima tu. Lene dibinjei nide ndigban di nyeng tut nya hagom bak Ester tu. 8 Noro bit bon dibrim srat di dipas gau dinyeng nibou ndig biditak buk eisi tu hanyen kan bi. Mbro nok gima lo, disindui sut bijipas srat bak mben Yahudi tut mun nyeng di jikan lo, kei nya. Ma jipas srat dima gau dinyeng lene jiba ditde srak mas bitak buk eisi.>>

9 Njap dima ne njap gi ningot can ba, ningai mem Bed Siwan ri. Mordekhai hig nibou ndig de sekertaris nya kwei lene cuk yok bipas srat nya bit leu mun nyeng hagom di cuk yok tut nya. Iluei srat dima ei nihyet kin nipas kepti di timiei nya ikrau kep ei Ahasyweros ninyeng tak kepti dima nisurti-nipekti bipas gau Ahasyweros ninyeng ba, iba srak mas pima bitak buk ei srat dima yokti. Leu api ibipbur bipinak srat nicukti dima bak yo di inyeng jei nya kin nibou nya kin andigpoi ndig nya yahagom ei hanjop nsi sratus gom ningot can ba, muhwindacan pima leu minu India kikau ug bipek kin minu Sudan. Lene Mordekhai cem ba mben Yahudi ighyet kin ipasti bipas srat bak yo dima. 10 Mordekhai yok ninda ei srat dimati gau Nibou Ndig Ahasyweros ninyeng. Noni ba srak mas pima bitak buk ei srat dimati leu api cuk tungwatu di itin ei mem ittei srat nya kak bimbut tut dima leu binhyepo iba nibou ndig de kuda di dor sindem nya bittei srat ngot dima yok hi gom hi gom ug ei hanjop nsi ei Nibou Ndig Ahasyweros ninyeng tak kepti dima nisurti-nipekti hagom.

11 Srat dima yok mbot kep bipia nibou ndig sindui sut mben Yahudi di ibong bidem minu ndig nya hagom ba, injei siceu kok yam nok nimpung gom mem gima ikon pran gau yonti. Gino timiei hanjop nsi nya ikrau minggwen bihwen yok lene suar mben Yahudi ikon pran bihwen yok hanyen. Ihwen yok he bi noro ma igyai nimai bak itnem bat-imunggwom bat nya cem yahagom leu api ibipos ndigban di ide nya cem. 12 Suar ibindei mbut nicukti dima bidem hanjop nsi hagom ei minu Persia ninyeng tak kepti nisurti-nipekti hagom dem igbit tto bou di jo tu. Gima rino itri tut srat dima mem tto bou di Haman kos tut ei mem gima miyai nimai bak mben Yahudi ba, gima ne njap gi nisimnaibrimigningai mem Bed Adar di nok bed gi nisimnaibrimigcan ri. 13 Srat nibicukti di ibindei hei dima ne nibou nya ide nikos tutti rin ba, suar limwa nya ikrau kep bitri tut bak limwa nindigsi nya di ingat rin ei hanjop nsi nya hagom. Nicukti dima sindui sut mben Yahudi ba, itin ei ide minggwen nya binjei siceu mem gima ikon pran bit ide nitok joti nya mpe di tto bou pima dem tu. 14 Leu api yo di ipwoi srat dima ibri nibou ndig de kuda di dor sindem bibor nya bimbut tut srat dima bitri tut bidem hanjop nsi nya kin minu ndig pmem Susan di nibousi mem nibou ndig ninyeng tak kepti cem.

. 15 Gima leu lene Mordekhai juk sinsun no di ninyeng jei di bon nisieng nidri kin nitiei bitut sinsun ndok di jei di gwam nimig gom di bon nisieng nghei nta di iba minghas linen bibon lene ba topi no di ninyeng jei di iba mas di kei-bibor-kei bibon bijuk nibou cem. Tirigi su no gima yokti behei sut leu ig nibou ndig kwei lene timiei minu ndig Susan imbos-hi-mbos bigyai nillei bibor cem lewo yahagom ingon nggei-hi-nggei. 16 Mben Yahudi cem ingon llei bibor ba, idigit tut nibou ndig de srat nibicukti pima bu bi lewo ingon nggan-triot kei hanyen ba, ingon nggei-hi-nggei cem ingon llei cem. 17 Mben Yahudi di ibong ser minu ndig kin hanjop nsi di ikwop nibou ndig de srat nibicukti dima eisi nya yahagom ingon nggei-hi-nggei ba, ingon llei bibor lene ibon pesta kep cem. Gima yok bindei ba, timiei hanjop nsi nya imang bibor iluei ingonti bicoi bit limwa Yahudi ide ningon di jo kep Allahti lewo tini bu ne idigit tut mben Yahudi di ibong srig yoti.