Ester 7

1 Gima rino nibou ndig kin Haman igyem njita nimbican bit Ester. 2 Tirigi nibou ndig dut kep ba anggur ngei lene hig ser Ester <<Sop Nibou Ndig na e, ahara da tut mindei i? Mbro nok gino ahara da tut gima anyeng tak kep dinyeng tak kepti dini nite hi rin lo, apai hak bida leu api midikes bina.>>

3 Lene Ester di Sop Nibou Ndig buhup <<Gino Na Di Anyeng Jei angon ngakei ade awak di dani ne dahara Na Di Anyeng Jei leu binhyepo dani kin ditde mben nya nitug ndei nimai bi noro niyaijo hak ug. 4 Lewo tungwagom tri dani kin ditde mben tu apino minitug ndei nimai biningwig ug ri! Gino no dima mitri nye bininok awak mem hiter he lene midibindin-ndin nyen Na Di Anyeng Jei bi noro midikuk da bidahap diji bi. Noro jei bi lene no dima mibindei sar nahagom bicok tut nye biningwig leu ade ninyeng tak kepti nisurti-nipekti hagom ug ri!>>

5 Leu api Nibou Ndig Ahasyweros hig ser Sop Nibou Ndig Ester <<Tou rino brim ningkek di bon nok gima i? No dima no hantou i?>>

6 Ester buhup <<No di sibut tut nye di ba nitok binye bitin ei mem gima cok tut nye dima ne Haman ri!>>

Haman digit tut nindig bibor lene ba ningon di digit bibor bitou kep nibou ndig kin sop nibou ndig. 7 Apino nibou ndig gga Haman bibor bikiju leu banggo mbrei di gwam niti ba, hei hak buug biya-ya nyen ei nide miai mitou nghousi. Haman kan tut bipia nibou ndig kos tut mikes hukum ei noni dip tu. Gima rino gwam kikau bit sop nibou ndig Ester bahara bak leu binhyepo teu no biningwes ngun leu hukum nimai. 8 Noni ba ningon di buhun binjei nonti ei bilen di nggriu-nggrop kei di Ester gwam dip bahara bak Ester leu binhyepo teu no leu hukum di nibou ndig mikes ei noni dip a. Noro tirigi noni hara kep bak Ester nok rino nibou ndig ngkwei hanyen kwei leu nide miai mitou nghousi. Tirigi noni ngat Haman niyai munti dima lene hara <<Mei! No brim ningkek ba, suar nggek sop nibou ndig ei mpia dini bou diyai him ei ditde ig dini cem e?>>

Hara nok rino mindor nya ibipbur bitau kwei lene iba minghas binggai ser Haman niboua. 9 Lene Harbona pai <<Na Di Anyeng Jei e, cou dihim gom di nijeisi dem meter nyatungwagom ba, can di mem ipindur tungwatu eisi no itas dideu Haman de ig him. Haman tas cou dihim dima ei mem gima pindur Mordekhai ei niti ri. Lo, Mordekhai dima ne no po nyohou na Di Anyeng Jei ayaisi ba, angwes ngun ri!>>

Lene nibou ndig cuk yok <<Ma jipindur Haman hak ei cou dihim di jei ndig dimati!>>

10 Apino yoni ipindur Haman ei cou dihim di Haman nonti tas ei mem gima bipindur Mordekhai eisi leu api nibou ndig ningon cut leu nigga biborti.