Nibou ndig bindei ba, Mordekhai yai ninyeng jei
6
1 Bit bon nibou ndig gibong mai mem mmun dima bi. Gima rino cuk yo di igya kui noni bittei srat nibohon di ipas kep mun di pek kep ei nide ninyeng tak kepti tu nya eisi bicuk yo dima bikwop kep srat bokti di ipas ei su nya bak. 2 Leu api yuum nipas kepti tut Mordekhai di bakilak Bigtan Teres nya di igyok ingon gom mem gima igyai nimai bak nibou ndig pima. Yo cin dini ne mindor di igya ser nibou ndig de nghim nsi pijum ri. 3 Lene nibou ndig hig ser yok <<Iba mindei rino bibuhup bak Mordekhai tug hon mun di bindo bipia ipai sigyo bak binjei mun di kei bak cem drek dip nituti di noni bakilak yo dima i?>>Yo di igya kui noni ibuhup <<Mordekhai gitug ndei mun nyeng hi drek dip bi.>>
4 Gima rino nibou ndig hig ser yok <<Yo di igya kui da tou rino ningat rin ei ditde ig dini nogindini i?>>
Tirigi hig ser yok nok rino Haman coi kwei biya ei mpia di jo bas hak di iba ngug tig bikrop ttai ma kwei lewo ningon ya mem gima hara nibou ndig leu dima pindur Mordekhai ei cou dihim di jei ndig di tas ei pima him ri. 5 Yo di igya kui nibou ndig dima ibuhup <<Haman ningat rin ei mpia di jo bas hak di iba ngug tig bikrop ttai ma kwei bimem kep ser nituti tirigi pai ningon kanti biNa Di Anyeng Jei.>>
Lene nibou ndig cuk yok <<Jibuwak noni kwei.>>
6 Tirigi Haman coi kwei lene nibou ndig hig ser <<Dijoi sut mem gima diyai ninyeng di jei bak tungwagom lo, midibon ndei notou i?>>
Lo, Haman kan <<Tou rima nibou ndig miyai ninyeng di jei bak nya i? Hiter hi bi. Sangkom ngat he.>>
7-8 Apino buhup bak nibou ndig <<Ma ayai sinsun nibou ndig di Na Di Anyeng Jei nanti ajuk kikep bak no dima. Leu api aba ade miep ho di bindo tut ade ninyeng tak kep nisindemti bimau ade kuda ningwak.c 9 Lene ma adimig no di ninyeng jei bibor ei minu dini gom ei leu api noni rima mijuk sinsun dima ei no di Na Di Anyeng Jei ayai ninyeng di jei bak dima lene ma no dima kui bigwam ei Na Di Anyeng Jei ade kuda dip. Leu api inggai ba, imbut-mbut nyen tut bidem biyati ndig ei minu ndig dini. Ma no di ninyeng jei bibor dima mbut bibie kuda noho bimbos-hi-mbos kak nimbutti bipai <Jingat i! Nibou ndig buhup bak no di noni joi sut binibou cut bak tug hon nisinati dini rin o!> >>
10 Lene nibou ndig cuk Haman <<Ma abipbur ba, aug yai sinsun kin kuda dima kwei leu binhyepo abikon Mordekhai di mben Yahudi ninyeng a. Abibon bidem igbit apaisi di aponi pima hagom bak. Ma acut gom leu cem au. Aug um noni ei dimbou hui ei ditde ig him dini lewo no gwam ei mpia dima bit leu niyai kepti.>>
11 Haman ug yai sinsun kin kuda pima leu api juk sinsun ei Mordekhaiti. Tirigi Mordekhai kui bigwam kuda dima dip leu su lene Haman buwak bibie tut ug ei biyati ndig ei minu ndig pmem dima. Noni mbos-hi-mbos kak nimbutti bipai <<Jingat i! Nibou ndig buhup bak no di noni joi sut binibou cut bak tug hon nisinati dini rin o!>>
12 Gima leu lene Mordekhai ngkwei hanyen buug bigwam kui dimbou hui ei ig nibou ndig de pima. Noro Haman bisau bingkwei hanyen ug ei nide ig binggai niimaisi ser nhyema hiter ingat noni bi lewo mmai sut nonti bibor. 13 Noni ndat kep mun di um dima hagom bak nitnem kin nisut bat nya yahagom. Lene nitnem kin nisut bat di ingon ki dima ipai bak <<Sindi Mordekhai de nisindemti om kep ade nisindemti. Noni ne mben Yahudi rin ba, bit bon aom kep nide nisindemti dima kan bi. Ningat ne noni mibindei timek nani ug ri.>>
Haman tug ndei nimai
14 Tirigi imbrap kep bit Haman bingwig bigyo lene nibou ndig de mindor pima iba ibinang bikwei buwak Haman ug ei pestati di Ester bon ei mem nibou ndig kin Haman.