SRAT AYUB
Bilis tin ei ningon kanti di kinei mem Ayub
1
1 Ayub bong ei Us.a Noni kuk no bak Allah biningon gom tut Noni. Ayub ningon sren bimbres no leu mun di kinei hagom. 2 Noni yai nipmot bat nya ibou muhwindacan kin nipmisop bat nya ibou ningai. 3 Noni nyeng tut domba nya ningut sribu muhwindacan kin unta nya ningut sribu ningai kin sapi nya ningut sribu gom kin keledai nya ningut sratus muhwi. Nide awak nya cem imang bibor. Gima rino Ayub nyeng tut ndigban nindig bibor dor njiriek yo di nindigsi di ibong ei hanjop bei mpia nipriti nya yahagom.4 Ayub nipmot bat nya ibou muhwindacan ibon pesta sindam bibikwop ide ig bit leu nok igyai kepti ba, induk ikindig bat ikinjoi bat nya kin ikwohop bat nya ibou ningai pima yahagom ba, igyem pesta bit yam. 5 Mpe di igyem pesta ba, ngwig binjap kep lene Ayub kiju mem ha yausi leu api bon midut nibiyai ningon kwesti mem nimunggwom bat nya bibindei ba, ingon kwes kin TUHAN. Lewo noni kan bipia hi rima simunggwom gom bon sisar ba, nihyet wer mpiahi tut Allah e? Sikan tut bi.
6 Bitto bou dem mem mun di TUHAN pai tes nya ei gwamtib induk yam kwei bigya ei Noho bei. Lene Bilisc cem ningat rima ei ikieti. 7 TUHAN hig ser noni <<Akwei leu hantou i?>>
Lene Bilis buhup <<Dikwei leu diya-ya nyen binggi dihyeisi hagomti ri.>> 8 TUHAN hig ser noni <<Angig ayai kep Ditde awak di Ayub tu e? No dima ningon gom ba, ningon kwes dor njiriek tungwatu dihyeisi dini hagom. Noni kuk no biDa bimbres no leu mun di kinei hagom cem.>>
9 Lene Bilis buhup <<Ade awak dima kuk no biNa mikui-kausi e? E bi! 10 Anyohou noni kin nide bat nya bitut nide ndigban hagom cem bikwop mmun-njap. Asindem tut noni mem nide midyai nya hagom ba, ayai mindhe-ndhe nok gi dem mem ikieng kep minu nisurti-nipekti binoni tu. 11 Noro gino apos mun di noni nyeng tut nya hagom bingwig leu noni lene mbigom nihyet miwer mpiahi tut Na di TUHAN hak ug!>>
12 Lene TUHAN pai bak Bilis <<Nna ba abindei Ayub de mun di nyeng tut nya bit leu angon kanti noro ma angget nonti njem binggwen au.>> Lene Bilis om no leu TUHAN Noho bei bimbut.
Ayub nimunggwom bat nya kin mun di nyeng tut nya hagom sar bingwig
13 Mpe di gom bu tirigi Ayub nimunggwom bat nya ibon pesta ei nipmot mighumbou de ig leu api, 14 nide awak gom dor kwei bipai bak <<Niba sapi bikkin dihyei ei miaisi lene keledai nya hagom igyem njita ei abris nghousi dideu nye lo, 15 mben Syebad ikwei hwen nye bipos mindhe-ndhe nya hagom bingwig leu nye leu api igyai nimai bak ade awak nya yahagom. Dangkom ngat he rino dingwes ngun bidikwei pai bak na di Andigpoi.>>
16 Nipou tirigi awak dima kes nihyet hon bigyo lene awak gom kin bu kwei krau bipai bak Ayub <<Kigyei tot domba kin gembala nya ba, yahagom imai bingwig noro dangkom ngat he rino dingwes ngun bidikwei pai sut bina di Andigpoi.>>
17 Nipou tirigi awak dima kes nihyet hon bigyo lene awak gom kin bu kwei krau bipai <<Nipos Kep Mun Cig di mben Kasdime nimpung ningai ikwei hwen nye bipos unta nya hagom bingwig leu nye leu api igyai nimai bak ade awak nya yahagom noro dangkom ngat he rino dingwes ngun bidikwei tri tut bak na di Andigpoi.>>
18 Nipou tirigi awak dima kes nihyet hon bigyo lene awak gom kin bu kwei krau bipai <<Amunggwom bat nya yahagom ibon pesta ei apmot mighumbou nide ig lo, 19 hou di nimig ten bibor cut kwei leu iggum ndigsi kros bibindei ba, ig dima lus bitak kep yahagom ba, imai bingwig noro dangkom ngat he rino dingwes ngun bidikwei tri tut bak na di Andigpoi.>>
20 Lene Ayub kiju birik nide sinsun ei no him gi bindo bipia ningon ngguk bibor. Noni kak nibou nta leu api tti ug ei dihyeisi biba ningwak bikik dihyei, 21 lene pai <<Tirigi dipmem gwam tut da ne dehei he. Mpe dino dimai lene midehei he. TUHAN yai bida leu api Noni yai hagom bingwig hanyen leu da tu. Handei kon ba, tungwatu nya inggei sut ninyenga!>>
22 Mbro nok gino mun di buhun dima hagom cut igkep Ayub lo, noni njei kep TUHAN bibon sisar tut Noni bi.