Bilis bingon Ayub mbigom kin bu
2
1 Bitto bou dem mem mun di TUHAN pai tes nya ei gwamti induk yam kwei hanyen bigya ei Noho bei. Lene Bilis cem ningat rima ei ikieti. 2 TUHAN hig ser noni <<Akwei leu hantou i?>>Lene Bilis buhup <<Diya-ya nyen binggi dihyeisi hagom.>>
3 TUHAN hig ser noni <<Angig ayai kep Ditde awak di Ayub tu e? No dima ningon gom cem ningon kwes cem dor njiriek tungwatu dihyeisi dini hagom. Noni kuk no biDa bimbres no leu mun di kinei hagom cem. Mbro nok gino abrim angkek kep Da leu binhyepo disindui sut ba, abingon noni mikui-kausi pima lo, ningon gom tut Da kikau.>>
4 Noro Bilis buhup <<Niyaijoti kin ninghuisi kwesti nibok kak bibor dor njiriek ndigban nibok a. Tungwatu nya isindui sut ba, ide ndigban hagom sar bingwig leu yok leu binhyepo ibipek ide niyaijoti. 5 Gino abindei ba, Ayub nggwen lene mbigom nihyet miwer mpiahi tut Na di TUHAN hak ug!>>
6 Lene TUHAN pai bak Bilis <<Nna ba abibon Ayub bit leu angon kanti noro ma ayai nimai bak au.>>
7 Leu api Bilis om no leu TUHAN Noho bei bimbut. Noni bindei ba, buhwei com Ayub bidem ningkek dip hagom leu nimig jou kikau ug bipek kin nibou nggram him. 8 Apino Ayub ug gwam ei mumpiang nghousi leu api ba den sra ninggre gom bikak nyen nibok nya. 9 Lene nitnem hig ser noni <<Nggon rino angon gom tut Allah kikau i? Ambriom Noni hak leu binhyepo amai ug!>>
10 Noro Ayub buhup <<Mbenjen! Ambrap nok mibbwe mbrapti! Mpe di Allah njei mun di kei bak sani lene siyai leu Noni lo, mpe di Noni yai mun di buhun bisa lene sikou sut e?>> Mbro nok gino mun di buhun bibor cut igkep Ayub tu lo, nihyet wer mpiahi tut Allah bi sren.
Ayub nisut bat nya ikwei gwam ser ningona
11 Tirigi mun di buhun bibor di cut igkep Ayub tibim ei nisut bat nya Elifas di timiei minu Teman kin Bildad di timiei minu Suah kin Zofar di timiei minu Naamah itingou nsi lene ibicom yam mem gima yuug gwam ser ningona. 12 Tirigi igya ei minu ting bingat Ayub lene ingat igbit noni bi. Noro tirigi ingat igbit noni tu rino ipim kep ba, igyai nggwei kibor birik ide sinsun ei yo him cem lene ikam dihyei ndung ba, igimahap hi kui lene ikes hi ei ibou nggram him cem. Igyaisi dima bindo bipia ingon ngguk bibor. 13 Lene igwam bit noni ei dihyeisi mem mmun-njap muhwindacan lo, yahap iji bi lewo ingat igbit nide ninggwenti di buhun bibor dima.