Ayub lua-lua nyen bak Allah
3
1 Leu api Ayub sindi hap niji ba, sigion njap di nipmem srek tut noni,2-3 bipai, <<Allah e, ma asigion njap di dipmem gwam tut da kin mmun di dicig-dipmem igyem njita tut yam pima!
4 Allah e, ma abindei ba, njap pima dindi-kai ba, angon prion ser. Ma asindui sut ba, nipigati piga digai njap pima bu bi sren.
5 Abindei ba, mmun ken kin nidinditi di dindi-kai kin bumbuhui nggai kep njap pima bibindei ba, mpia com kan bi.
6 Ma abindei ba, mpe di ikwop kep ari bingwam kin bed lene ma iciu ser mmun pima bindat kep au.
7 Abindei ba, hi yai nillei au lewo njap pima dem kep njap nipijet.
8 He je di nung kui je kin je di jinyeng tak kep Lewiatanf e, ma jimbriom njap pima ba, jisigion cem.
9 Ma jibindei ba, hambong jimjit mem njap pima au. Ma jisindui sut ba, gwam ntui mem njap pima au! Ma jibindei ba, mmun dima ba ningon com njap nitekti mikui-kausi.
10 Ma jimbriom mmun di kinei bibor di dipmem srek tut da eisi pima lewo mmun dima ne nitriti mem mun di buhun hagom di tak kep da ri.
11 Nggon rino dimai hak ei dipmem ninghopti bi i? Nggon rino dinnei kimbas hammi tirigi dipmem gwam tut da bi i?
12 Nggon rino dipmem kes da bidigwam nimigsi i? Nggon rino noni yai do bida i?
13 Gino dimai hak mem njap pima lene njap di ammani dibong kep dinghuisi ei jui dip,
14 dem kep nok nibou ndig nya kin yo di inyeng jei nya di ingot ig nibitto nimai mem yonti leu api ibong kep inghuisi eisi.
15 Gi nok gima ne dibong kep dinghuisi mem njap di ammani noyam kin nibou ndig ipmot bat nya po inju mas kin perak bimpung kei ei ide ig pima lo, ikes hagom ei bimai leu su ba,
16 noyam kin munggwom di nipmem gwam tut kinei cem.
17 Yo di imbuk nya ibong ei minu nimai nya ide bikes hon ba, imbuk bu bi. Yo di igyai inghuisi di wei bibor drek dip midyai di buhun bibor di igyai nya ibong kep inghuisi ei sirima.
18 Yo di isima hukum nya isima bu bi. Ingon jo nyahan ei minu ting leu nibou ig bui nya di ihwen bit yok.
19 Yo di inyeng jei nya kin yo di ibon inyeng bi nya yahagom noyam ba, awak nya igyati kwes ei mpia dima.
20 Nggon rino asindui sut tungwatu nya ba, mun di buhun bibor cut igkep yok kikau i? Nggon rino asindui ba, nipigati piga digai yo di ingon ngguk bibor i?
21 Imem kep ser imaisi noro imaisi hatap yok bi sren. Ijoi sut jui nsi nindig dor njiriek ndigban di inyeng tut nya.
22 Ingon nggei-hi-nggei bi bibou innei kimbas bibong ei jui nsi ug e.
23 Na di Allah aku mun di mipek kep mem yok ei nidipti bu bijo nding leu yok lewo ayon ttai yok ei nite hi nite hi.
24 Ningon ngguk biborti bindei ba, dinggum bi. Dilua-lua nyen kikau buug hon nohonti bi.
25 Mun di dittin tut bidikrau dingon tut hagom cut igkep da.
26 Bit bon dingon jo nyahan kan bi. Mun di buhun bibor cut igkep da bijo ninno bijo kikau.>>