NIBUHUP BIYAMTI GI NIGOM
4:1--14:22
Elifas pingok Ayub ningonti
4
1 Lene Elifas pai,2 <<Ayub e, gino dipai dihyet gom bina lene ma andron da drek dip bi e? Lewo bit bon dikimut duhui kikau kan bi.
3 Na di Ayub angginau tungwatu nya imang bibor ba, asindem tut yo di inghuisi jet nya tu.
4 Ade nipingok tungwatu nyati bindei ba, yo di icut kin yo di inghuisi jet kin yo di igyai nggrop buhun yahagom igyai nisindemti bibrim ingkek hanyen.
5 Noro tini bu ne tto bou dem mem mun di buhun dima cut igkep nanti bu lo, anghuisi mpig sut ba, angon cut leu su.
6 Akuk na bak Allah lene abon mun tunggwei sut Noni hi bi sren. Gi nok lene gi igbit rino aba angon com ba, ayok angon mem Noni.
7 Ma akan-kan nyen tut gini ug e. Mun di buhun bibor hi cut igkep tungwa di ningon sren tu e?
8 Dingat bou diyai him bipia yo di ikkin dihyei ei miai sisarti kin yo di yahap mun di sibut bibor di noyam kin njita ngan ei dihyei suti yahagom igyai ningat di kinei kin ningat di suwok cem!
9 Allah ningon sibui sut yok noyam kin sigau di yem tungwatu nya bingwig.
10 Yo di isibut nya igyau-yau nyen ba, inggiling noyam kin mindhe singa noro Allah kimut ninda kep yok bibindei ba, ikwai hagom hwop tu.
11 Yahagom imai noyam kin singa di ninggum hwen bibindei ba, imien bat nya ibou buwei bintek gimahap.
12 Mpe di gom ne nihyet gom tibim kwei lo, gima noyam kin nihyet di nggan kei ei ditingou nsi.
13 Dibong dibongti noro mumpriem di buhun gom bindei bidibong mai kan bi lewo nihyet dima bindin da,
14 leu api dingon digit ba, dinghuisi mpig sut cem.
15 Hou di nimig mbris kei gom kui diimaisi bibindei ba, dingkek pikou bibor.
16 Dingat lo, tungwagom ningwes ya bibie doho bei. Ditou kep ningwes dima noro dingat igbit ningat bi. Lene dimiap nihyet gom di tibim kwei leu nimbum-brati di hig ser da,
17 <Tou ridem mem gima ba ningon di sren biya ei Allah Noho bei i? Tou ridem mem gima ba ningon di kwes biya ei Nipai Tes Cig Noho bei i?
18 Ningat ne Allah ba ningon com Nide awak ei gwamti nya bi. Noni ngat lo, Nide malaikati nya cem ibon mun tunggwei.
19 Gi nok lene notou mem mun di Noni ba dihyei ndung bipai tes i? Gima yok noyam kin atimai di tungwatu nya ico kep.
20 Mbro nok gino ninnei jo tungwa hi nuhwap nsi mem njap bigyoti lo, mai binongkom mem mmunti leu api yahagom ingon prion ser noni hanyen bu.
21 Nide ndigban di nyeng tut nya hagom sar bingwig leu noni leu api noni mai lo, yai ningon ki leu Allah bigyo.>