Doia nibikon Allah ninyenga
145
1 Daud de doia nibinggei sut TUHAN.Ditde Allah kin ditde Nibou Ndig e, miditri tut anyeng di jei bidipai sigyo biNa bijo ninno bijo kikau.
2 Dipai sigyo biNa bikwop mmun-njap bidinggei sut Na bijo ninno bijo kikau.
3 TUHAN ninyeng jei bibor. Gima rino ma tungwatu nya inggei sut Noni nindig bibor. Bit bon nye di tungwatu ingon dorti tut ninyeng jeisi kan bi.
4 Tungwatu nya mitri tut Ade midyai di mindur nya bak ide nintun him yamti di bram yam nya sindam bitri tut mimbri di kui angkek cem.
5 Yoni misimbot kep biyam tut Ade nikei-kau-keisi kin anyeng jeisi cem. Midikim mbrap tut Ade midyai di mindur nya.
6 Tungwatu nya misimbot kep biyam tut ayai munti di sindem bibor nya. Dani cem miditri tut anyeng jeisi.
7 Yoni mitri tut Ade nisingat tut nyeti biba doia bikiek angon sren-srausi.
8 TUHAN ningon ngakei tungwatu nya ba, ngondut yok cem. Ningon sibui sut yok haninyai bi ba, ningon ngakei yokti ug hon nohonti bi sren.
9 Noni singat tut tungwatu nya yahagom ba, ningon nggriu sut mun di Noni pai tes nya hagom.
10 TUHAN e, mun di apai tes nya hagom minggei sut Na. Ade limwa nya yahagom mipai sigyo hanyen biNa!
11 Yoni misimbot kep biyam tut Ade ninyeng tak kep limwa nyati di kei-kau bipui sut ade nisindemti,
12 leu binhyepo tungwatu nya yahagom mikan tut Ade midyai di mindur nya kin Ade ninyeng tak kep limwa nyati di kei-kau cem dia-diau kei cem.
13 Ade ninyeng tak kep limwa nyati jo ninghig-niker. Ade nisindemti ug hon nohonti bi sren.
TUHAN ningon gom biyai igbit nipreu eisi nya hagom. Noni ba ningon di nggriu sut nye biyai Nide midyai nya hagom.
14 Tirigi mun di buhun bibor cut igkep tungwatu nya ne Noni mpu yok. Noni mikon yo di icut nya buusap yok.
15 Mun di ninnei tau nuhwap nsi nya hagom igyok ingon mem Na di TUHAN lewo akwas njita kin mikwau tut yok dem igbit nijama.
16 Akwas njita di isuar nya nok gi dem tut yok leu api yahagom igyemti dem mem yok.
17 TUHAN ba ningon di sren kin ningon di nggriu biyai kep Nide midyai nya hagom.
18 Noni kwei ya kui yo di yahara Noni kin yo di iba ingon gom bingat nadi biNoni cem.
19 Noni miyai mun di indwau sut nya bak yo di inggei sut Noni. Noni ngig nitingou mem ighyet tirigi yahara Noni apino Noni teu yok bingwes ngun.
20 Noni miya srak ko hagau yo di ingon ngakei Noni yahagom. Noro bindei timek yo di isibut nya.
21 Dinggei sut TUHAN kikau. Ma Nide mun di pai tes nya hagom inggei sut ninyeng di kwes-kwau bijo ninno bijo kikau.